വായു മലിനീകരണം: ഡൽഹിയിൽ നിയന്ത്രണം കടുപ്പിക്കുന്നു; ഇത്തരം വാഹനങ്ങൾക്ക് പ്രവേശനമില്ല

ന്യൂഡല്‍ഹി: വെള്ളിയാഴ്ച രാവിലെ ഡൽഹിയിലെ വായുഗുണനിലവാരം 'അതീവ ഗുരുതര' വിഭാഗത്തിലേക്ക് താഴ്ന്ന ശേഷം വൈകുന്നേരത്തോടെ 'വളരെ മോശം' വിഭാഗത്തിലേക്ക് നേരിയ തോതിൽ മെച്ചപ്പെട്ടതായി ഔദ്യോഗിക കണക്കുകൾ . കേന്ദ്ര ഭൗമശാസ്ത്ര മന്ത്രാലയത്തിന്റെ കണക്കുകൾ പ്രകാരം ഡൽഹിയിലെ വായു മലിനീകരണത്തിന് ഏറ്റവും കൂടുതൽ കാരണമാകുന്നത് ഗതാഗത മേഖലയാണ് (20.2%). വൈക്കോൽ കത്തിക്കുന്നത് 9.2 ശതമാനവും മലിനീകരണത്തിന് കാരണമാകുന്നു.

അന്തർസംസ്ഥാന ഏകോപന യോഗത്തിന് ശേഷം നഗരത്തിന്റെ അതിർത്തികളിലും ബദൽ പ്രവേശന പാതകളിലും പരിശോധന കർശനമാക്കാൻ ഡൽഹി ട്രാഫിക് പോലീസ് തീരുമാനിച്ചു. ഗ്രേഡഡ് റെസ്‌പോൺസ് ആക്ഷൻ പ്ലാൻ പ്രകാരമുള്ള നിയന്ത്രണങ്ങൾ ലംഘിക്കുന്ന വാഹനങ്ങൾ തലസ്ഥാനത്തേക്ക് പ്രവേശിക്കുന്നത് തടയുകയാണ് ഇതിന്റെ ലക്ഷ്യം.

"കമ്മീഷൻ ഫോർ എയർ ക്വാളിറ്റി മാനേജ്‌മെന്റ് പുറപ്പെടുവിച്ച നിർദ്ദേശങ്ങൾ കർശനമായി നടപ്പിലാക്കുന്നതിലും GRAP പ്രകാരമുള്ള വാഹന നിയന്ത്രണങ്ങൾ ശക്തിപ്പെടുത്തുന്നതിലുമാണ് യോഗം ശ്രദ്ധ കേന്ദ്രീകരിച്ചത്. നിശ്ചിത നിയന്ത്രണങ്ങൾ പാലിക്കാത്ത വാഹനങ്ങൾ കണ്ടെത്തുന്നതിനും തടയുന്നതിനും വഴിതിരിച്ചുവിടുന്നതിനുമായി അതിർത്തി പ്രവേശന കവാടങ്ങളിലും ബദൽ പാതകളിലും ആവശ്യത്തിന് പോലീസിനെ വിന്യസിക്കാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്," ഡൽഹി പോലീസ് അറിയിച്ചു.

നിലവിലെ നിയന്ത്രണങ്ങൾ അനുസരിച്ച്, ബിഎസ്-6 മലിനീകരണ നിയന്ത്രണ മാനദണ്ഡങ്ങൾ പാലിക്കാത്തതും ഡൽഹിക്ക് പുറത്ത് രജിസ്റ്റർ ചെയ്തതുമായ വാഹനങ്ങൾക്ക് നഗരത്തിലേക്ക് പ്രവേശനമില്ല. സാധുവായ പൊല്യൂഷൻ അണ്ടർ കൺട്രോൾ സർട്ടിഫിക്കറ്റുകൾക്കായുള്ള പരിശോധന ട്രാഫിക് പോലീസ് ശക്തമാക്കും. സുപ്രീം കോടതിയുടെയും ദേശീയ ഹരിത ട്രൈബ്യൂണലിന്റെയും ഉത്തരവുകൾ പ്രകാരം 10 വർഷം പഴക്കമുള്ള ഡീസൽ വാഹനങ്ങൾക്കും 15 വർഷം പഴക്കമുള്ള പെട്രോൾ വാഹനങ്ങൾക്കുമുള്ള നിയന്ത്രണങ്ങൾ ലംഘിക്കുന്നവർക്കെതിരെ കർശന നടപടിയെടുക്കുമെന്നും പോലീസ് വ്യക്തമാക്കി.

എല്ലാ വർഷവും ശൈത്യകാലത്ത് കുറഞ്ഞ കാറ്റിന്റെ വേഗതയും താഴുന്ന താപനിലയും കാരണം ഡൽഹി-എൻസിആർ മേഖലയിലും ഇൻഡോ-ഗംഗാ സമതലത്തിന്റെ വിവിധ ഭാഗങ്ങളിലും വായു മലിനീകരണം രൂക്ഷമാകാറുണ്ട്. ഒക്ടോബർ, നവംബർ മാസങ്ങളിലെ വൈക്കോൽ കത്തിക്കലും ഉത്സവ സീസണിലെ പടക്കം പൊട്ടിക്കലും വാഹനങ്ങളിൽ നിന്നുള്ള പുകയും പൊടിയും ചേർന്ന് വായുവിന്റെ ഗുണനിലവാരം കൂടുതൽ മോശമാക്കുന്നു.

CPCB മാനദണ്ഡമനുസരിച്ച് AQI 0 മുതൽ 50 വരെ 'മികച്ചത്', 51 മുതൽ 100 വരെ 'തൃപ്തികരം' , 101 മുതൽ 200 വരെ 'മിതമായത്' (Moderate), 201 മുതൽ 300 വരെ 'മോശം' , 301 മുതൽ 400 വരെ 'വളരെ മോശം' , 401 മുതൽ 500 വരെ 'അതീവ ഗുരുതരം' എന്നിങ്ങനെയാണ് തരംതിരിച്ചിരിക്കുന്നത്.

കേന്ദ്ര മലിനീകരണ നിയന്ത്രണ ബോർഡിന്റെ കണക്കനുസരിച്ച് രാവിലെ 9 മണിക്ക് 24 മണിക്കൂറിലെ ശരാശരി വായുഗുണനിലവാര സൂചിക 403 (അതീവ ഗുരുതരം) ആയിരുന്നു. വൈകുന്നേരം 4 മണിയോടെ ഇത് 373 ആയി രേഖപ്പെടുത്തി. തലേദിവസം ഇത് 313 ആയിരുന്നു. CPCB-യുടെ പ്രതിദിന ബുള്ളറ്റിനിൽ പ്രസിദ്ധീകരിക്കുന്ന വൈകുന്നേരം 4 മണിയിലെ കണക്കാണ് ആ ദിവസത്തെ ഔദ്യോഗിക AQI ആയി കണക്കാക്കുന്നത്. സൂചിക ഉയരുന്നത് വായുവിന്റെ ഗുണനിലവാരം മോശമാകുന്നതിനെയാണ് സൂചിപ്പിക്കുന്നത്.