ഡൽഹിയിൽ വായുനിലവാരം മെച്ചപ്പെട്ടു; നിയന്ത്രണങ്ങളിൽ ഇളവ്

ന്യൂഡൽഹി: ദേശീയ തലസ്ഥാനത്തെ വായുനിലവാരം മെച്ചപ്പെട്ടതിനെത്തുടർന്ന് ഏർപ്പെടുത്തിയിരുന്ന കടുത്ത മലിനീകരണ നിയന്ത്രണങ്ങളിൽ ഇളവ്. വായു ഗുണനിലവാര സൂചികയിൽ പുരോഗതി രേഖപ്പെടുത്തിയതോടെ 'ഗ്രേഡഡ് റെസ്പോൺസ് ആക്ഷൻ പ്ലാൻ' പ്രകാരമുള്ള നാലാം ഘട്ട നിയന്ത്രണങ്ങൾ പിൻവലിക്കാൻ എയർ ക്വാളിറ്റി മാനേജ്‌മെന്റ് കമ്മീഷൻ തീരുമാനിച്ചു.

നേരത്തെ വായുനിലവാരം അതീവ ഗുരുതരമായ സാഹചര്യത്തിലായിരുന്നു പുകമഞ്ഞ് മൂടിയ നഗരത്തിൽ ഗ്രാപ്പ്-4 ഏർപ്പെടുത്തിയിരുന്നത്. ഇതോടെ ട്രക്കുകളുടെ പ്രവേശന വിലക്ക് നീങ്ങുകയും നിർമ്മാണ പ്രവർത്തനങ്ങൾക്ക് ഏർപ്പെടുത്തിയിരുന്ന കർശന നിയന്ത്രണങ്ങളിൽ ഇളവ് വരികയും ചെയ്യും.

എന്നാൽ ഗ്രാപ്പ്-2 പ്രകാരമുള്ള മറ്റ് സാധാരണ നിയന്ത്രണങ്ങൾ നഗരത്തിൽ തുടരും. മലിനീകരണം കുറയുന്ന സാഹചര്യത്തിലും ജാഗ്രത തുടരണമെന്ന് അധികൃതർ നിർദ്ദേശിച്ചു. ശൈത്യകാലത്തെ കാലാവസ്ഥാ വ്യതിയാനങ്ങൾ വായുനിലവാരത്തെ ബാധിക്കാൻ സാധ്യതയുള്ളതിനാൽ നിരീക്ഷണം ശക്തമായി തുടരുമെന്ന് പരിസ്ഥിതി മന്ത്രാലയം അറിയിച്ചു.

വായുനിലവാരം മെച്ചപ്പെടുന്നത് സാധാരണക്കാരായ ജനങ്ങൾക്കും കച്ചവടക്കാർക്കും വലിയ ആശ്വാസമാണ് നൽകുന്നത്. അതേസമയം, ഡൽഹിയിൽ എയർ പ്യൂരിഫിയറിന്റെ ജിഎസ്ടി താത്കാലികമായി കുറയ്ക്കണമെന്ന് കേന്ദ്രസർക്കാരിനോട് ഡൽഹി ഹൈക്കോടതി ആവശ്യപ്പെട്ടിട്ടുണ്ട്.