കാർ ഡിവൈഡറിലിടിച്ച് മറിഞ്ഞു: ദമ്പതികൾക്ക് ദാരുണാന്ത്യം, ദൃശ്യങ്ങൾ സിസിടിവിയിൽ

തെലങ്കാന: വാഹനാപകടത്തിൽ ദമ്പതികൾക്ക് ദാരുണാന്ത്യം. തെലങ്കാനയിലെ സംഗറെഡ്ഡി ജില്ലയിലുണ്ടായ ദാരുണമായ വാഹനാപകടത്തിൽ, രംഗറെഡ്ഡി ജില്ലയിലെ ശങ്കർപള്ളി മണ്ഡലത്തിലുള്ള ഗാജുലഗുഡെം ഗ്രാമവാസികളായ യെല്ലകൊണ്ട നരസിംഹുലു (40), ഭാര്യ മൗനിക (33) എന്നിവരാണ് മരിച്ചത്. സംഗറെഡ്ഡി കാണ്ടി ക്രോസ് റോഡിന് സമീപം അർദ്ധരാത്രിയോടെയാണ് അപകടമുണ്ടായത്.

ശങ്കർപള്ളിയിൽ നിന്നും സംഗറെഡ്ഡി ഭാഗത്തേക്ക് ഫോർഡ് കാറിലായിരുന്നു ദമ്പതികളുടെ യാത്ര. കാണ്ടി ഗ്രാമാതിർത്തിയിലെ ക്രോസ് റോഡിന് സമീപമെത്തിയപ്പോൾ ഡ്രൈവർക്ക് വാഹനത്തിന്റെ നിയന്ത്രണം പൂർണമായി നഷ്ടപ്പെടുകയായിരുന്നു. തുടർന്ന് അമിതവേഗതയിലായിരുന്ന കാർ റോഡിന് നടുവിലുള്ള സെൻട്രൽ ഡിവൈഡറിലേക്ക് ശക്തമായി ഇടിച്ചുകയറുകയും തലകീഴായി മറിയുകയുമായിരുന്നു.

ഇടിയുടെ ആഘാതത്തിൽ കാർ പൂർണമായി തകരുകയും ദമ്പതികൾക്ക് ഗുരുതരമായി പരിക്കേൽക്കുകയും ചെയ്തു. സംഭവസ്ഥലത്തുവെച്ചുതന്നെ രണ്ടുപേരുടെയും ജീവൻ നഷ്ടപ്പെട്ടു. കാർ നിയന്ത്രണം വിട്ട് ഡിവൈഡറിലിടിച്ച് പലതവണ മറിയുന്നതിന്റെ ഞെട്ടിക്കുന്ന ദൃശ്യങ്ങൾ സമീപത്തെ സിസിടിവി ക്യാമറയിൽ പതിഞ്ഞിട്ടുണ്ട്.

സംഭവമറിഞ്ഞെത്തിയ പൊലീസും പ്രാദേശികവാസികളും ചേർന്നാണ് കാറിനുള്ളിൽ കുടുങ്ങിക്കിടന്ന മൃതദേഹങ്ങൾ പുറത്തെടുത്തത്. തുടർന്ന് പോസ്റ്റ്‌മോർട്ട് നടപടികൾക്കായി മൃതദേഹങ്ങൾ സമീപത്തെ സർക്കാർ ആശുപത്രിയിലേക്ക് മാറ്റി. അപകടസമയത്തെ വാഹനത്തിന്റെ വേഗത, ഡ്രൈവർ ഉറങ്ങിപ്പോയതാണോ അതോ സാങ്കേതിക തകരാറാണോ അപകടത്തിന് കാരണമായത് എന്നതിനെക്കുറിച്ച് പൊലീസ് കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചിട്ടുണ്ട്.