ഗുജറാത്തിൽ ഭീതി പടർത്തി വീണ്ടും ചാന്ദിപുര വൈറസ്; മൂന്ന് കുട്ടികൾ മരിച്ചു

അഹമ്മദാബാദ് : ​ഗുജറാത്തിൽ ഭീതി പടർത്തി ചാന്ദിപുര വൈറസ്. രോ​ഗബാധയെ തുടർന്ന് ഇതുവരെ മൂന്ന് കുട്ടികൾ മരിച്ചു. പഞ്ച്മഹൽ ജില്ലയിൽ നിന്നുള്ള മൂന്നും നാലും വയസ് പ്രായമായ രണ്ട് കുട്ടികളുടെ മരണം റിപ്പോർട്ട് ചെയ്തതിന് പിന്നാലെ ബുധനാഴ്ച ആറ് വയസുള്ള കുട്ടിയും മരിച്ചു.

സബർകാന്ത ജില്ലയിലെ ഹിമന്ത്ന​ഗർ സിവിൽ ആശുപത്രിയിൽ ചികിത്സയിലിരിക്കെയാണ് ആറു വയുകാരൻ മരിച്ചത്. നാല് ദിവസം മുൻപാണ് കുട്ടിയെ ആശുപത്രിയിൽ പ്രവേശിപ്പിച്ചത്. മരണം സ്ഥിരീകരിച്ചതിന് പിന്നാലെ സംസ്ഥാനത്ത് ജാ​ഗ്രത കടുപ്പിച്ചിരിക്കുകയാണ്. എൻഡിടിവി പുറത്തുവിട്ട റിപ്പോർട്ട് പ്രകാരം ഹിമന്ത്ന​ഗർ സിവിൽ ആശുപത്രിയിൽ നിലവിൽ അഞ്ചോളം പേർക്ക് രോ​ഗബാധയുണ്ടെന്ന് സംശയിക്കുന്നത്. ഇതിനിടെ രണ്ട് കുട്ടികൾ രോ​ഗമുക്തരായതായും റിപ്പോർട്ടുകളുണ്ട്.

ജാ​ഗ്രതയുടെ ഭാ​ഗമായി ആരോ​ഗ്യപ്രവർത്തകർ വീടുകളിലും പരിശോധന നടത്തുന്നുണ്ട്. പനി, ഛർദ്ദി, വയറിളക്കം തുടങ്ങിയ ലക്ഷണങ്ങൾ കുട്ടികളിൽ കണ്ടാൽ ഉടൻ വൈദ്യസഹായം തേടണമെന്നാണ് അറിയിച്ചിരിക്കുന്നത്. 2024 ലും ​ഗുജറാത്തിൽ ചാന്ദിപുര വൈറസ് വ്യാപനത്തെ തുടർന്ന് നിരവധി പേർ മരിച്ചിരുന്നു.

റാബ്ഡോവിറിഡേ വിഭാഗത്തില്‍പ്പട്ട വൈറസാണ് ചാന്ദിപുര. ഒന്‍പത് മാസം മുതല്‍ പതിനാല് വയസ്സുവരെയുള്ള കുട്ടികള്‍ക്കാണ് കൂടുതല്‍ രോഗം പിടിപെടുന്നത്. പൊതുവേ മഴക്കാലങ്ങളിലാണ് ചാന്ദിപുര വൈറസ് വ്യാപനമുണ്ടാകുന്നത്.