ബ്രിക്സ് ഉച്ചകോടിക്ക് ഇന്ന് സമാപനം; പങ്കാളി രാജ്യങ്ങളുമായി വിപുലമായ ചർച്ച

ന്യൂഡൽഹി: പതിനെട്ടാമത് ബ്രിക്സ് ഉച്ചകോടിക്ക് ഇന്ന് ന്യൂഡൽഹിയിൽ സമാപനം. രണ്ടാംദിനത്തിലെ പ്രധാന പരിപാടിയായി ബ്രിക്സ് പങ്കാളി രാജ്യങ്ങളെയും ഉൾപ്പെടുത്തി വിപുലമായ സമ്മേളനം നടക്കും. രാവിലെ പത്തിനാണ് യോഗം ആരംഭിക്കുക.

അംഗരാജ്യങ്ങൾക്ക് പുറത്തുള്ള പങ്കാളി രാജ്യങ്ങളുടെ പ്രതിനിധികളും ചർച്ചയിൽ പങ്കെടുക്കും. ആഗോള സാമ്പത്തിക സാഹചര്യങ്ങൾ, ബഹുമുഖ സഹകരണം, വികസനം, അന്താരാഷ്ട്ര സമാധാനം, വികസ്വര രാജ്യങ്ങൾ നേരിടുന്ന വെല്ലുവിളികൾ തുടങ്ങിയ വിഷയങ്ങളിലാണ് പ്രധാനമായും ചർച്ച നടക്കുക.

ചൈനീസ് പ്രസിഡന്റ് ഷി ജിൻപിങ്, റഷ്യൻ പ്രസിഡന്റ് വ്ലാദിമിർ പുടിൻ, ഇറാൻ പ്രസിഡന്റ് മസൂദ് പെസഷ്കിയാൻ ഉൾപ്പെടെയുള്ള നേതാക്കൾ ഡൽഹിയിൽ തുടരുകയാണ്. പങ്കാളി രാജ്യങ്ങളുമായുള്ള ചർച്ചകളിലൂടെ ബ്രിക്സിന്റെ സഹകരണ മേഖല കൂടുതൽ വിപുലപ്പെടുത്തുന്നതും വികസ്വര രാജ്യങ്ങളുടെ നിലപാടുകൾക്ക് ആഗോളതലത്തിൽ കൂടുതൽ പ്രാധാന്യം ഉറപ്പാക്കുന്നതുമാണ് രണ്ടാംദിന സമ്മേളനത്തിന്റെ പ്രധാന ലക്ഷ്യം. ബ്രിക്സും പങ്കാളി രാജ്യങ്ങളും ചേർന്നുള്ള കൂട്ടായ്മ ഇപ്പോൾ 21 രാജ്യങ്ങളെ ഉൾക്കൊള്ളുന്നതായി ഔദ്യോഗിക രേഖകൾ വ്യക്തമാക്കുന്നു.

അന്താരാഷ്ട്ര സാമ്പത്തിക സംവിധാനത്തിലെ മാറ്റങ്ങൾ, വ്യാപാര–നിക്ഷേപ സഹകരണം, സാങ്കേതികവിദ്യ, ഊർജസുരക്ഷ, ആഗോള സ്ഥാപനങ്ങളിൽ വികസ്വര രാജ്യങ്ങളുടെ പ്രാതിനിധ്യം തുടങ്ങിയ വിഷയങ്ങളിലും നേതാക്കൾ നിലപാട് വ്യക്തമാക്കും. ഉച്ചകോടിയുടെ ഔദ്യോഗിക പ്രമേയം പ്രതിരോധശേഷി, നവീകരണം, സഹകരണം, സുസ്ഥിരത എന്നിവയെ അടിസ്ഥാനമാക്കിയുള്ളതാണ്.

ആദ്യദിനത്തിൽ അംഗരാജ്യങ്ങൾ ഏകകണ്ഠമായി അംഗീകരിച്ച ന്യൂഡൽഹി പ്രഖ്യാപനമാണ് ഉച്ചകോടിയുടെ പ്രധാന രാഷ്ട്രീയ ഫലം. ഗാസയിലെ ആക്രമണങ്ങളിലും മാനുഷിക ദുരന്തത്തിലും കടുത്ത ആശങ്ക രേഖപ്പെടുത്തിയ പ്രഖ്യാപനം വെടിനിർത്തൽ പൂർണമായി നടപ്പാക്കണമെന്നും മാനുഷിക സഹായം തടസ്സമില്ലാതെ എത്തിക്കണമെന്നും ആവശ്യപ്പെട്ടു.

പലസ്തീൻ ജനതയെ നിർബന്ധിച്ച് കുടിയൊഴിപ്പിക്കുന്നതിനെയും ഗാസയുടെ ഭൂമിശാസ്ത്രപരവും ജനസംഖ്യപരവുമായ സ്വഭാവം മാറ്റാനുള്ള നീക്കങ്ങളെയും ബ്രിക്സ് എതിർത്തു. 1967ലെ അതിർത്തികളെ അടിസ്ഥാനമാക്കി കിഴക്കൻ ജറുസലേം തലസ്ഥാനമായ സ്വതന്ത്രവും പരമാധികാരമുള്ളതുമായ പലസ്തീൻ രാഷ്ട്രം സ്ഥാപിക്കണമെന്നും ഐക്യരാഷ്ട്രസഭയിൽ പലസ്തീന് പൂർണ അംഗത്വം നൽകണമെന്നും പ്രഖ്യാപനം ആവശ്യപ്പെട്ടു.

രണ്ടുദിവസത്തെ ചർച്ചകൾ പൂർത്തിയാക്കി വൈകിട്ടോടെ ഉച്ചകോടി സമാപിക്കും.