ബംഗളൂരുവിൽ സ്പാ തെറാപ്പിസ്റ്റ് മോശമായി പെരുമാറിയെന്ന് യുവതിയുടെ പരാതി

ബംഗളൂരു: ബംഗളൂരുവിലെ ആഡംബര ഹോട്ടലിലെ സ്പാ തെറാപ്പിസ്റ്റ് തന്നോട് മോശമായി പെരുമാറിയെന്ന പരാതിയുമായി കനേഡിയൻ യുവതി. മസാജ് ചെയ്യുന്നതിനിടെ തെറാപ്പിസ്റ്റ് ശരീരത്തിൽ അനാവശ്യമായി സ്പർശിച്ചതായാണ് 44-കാരിയായ യുവതിയുടെ ആരോപണം. സംഭവത്തിൽ വിധാന സൗധ പൊലീസ് കേസെടുത്ത് അന്വേഷണം ആരംഭിച്ചു.

വെള്ളിയാഴ്ച സോഷ്യൽ മീഡിയ പ്ലാറ്റ്‌ഫോമായ 'എക്സി'ലൂടെ ഒരാൾ ഈ വിവരം പങ്കുവെക്കുകയും ബെംഗളൂരു പൊലീസിനെ ടാഗ് ചെയ്യുകയും ചെയ്തതോടെയാണ് സംഭവം ശ്രദ്ധ നേടിയത്. തുടർന്ന് യുവതി നേരിട്ടെത്തി പരാതി നൽകുകയായിരുന്നു. പഞ്ചാബ് സ്വദേശിയായ യുവതി കാനഡയിലാണ് താമസം. ഔദ്യോഗിക ആവശ്യങ്ങൾക്കായി ബെംഗളൂരുവിലെത്തിയ ഇവർ ഈ ആഡംബര ഹോട്ടലിലായിരുന്നു താമസം.

പരാതിയുടെ അടിസ്ഥാനത്തിൽ പ്രതിയെ പൊലീസ് തിരിച്ചറിഞ്ഞിട്ടുണ്ട്. എന്നാൽ ഇയാളെ ഇതുവരെ അറസ്റ്റ് ചെയ്തിട്ടില്ല. അന്വേഷണം പുരോഗമിക്കുകയാണെന്നും തെളിവുകളുടെ അടിസ്ഥാനത്തിൽ അറസ്റ്റ് ഉൾപ്പെടെയുള്ള തുടനടപടികൾ സ്വീകരിക്കുമെന്നും പൊലീസ് അറിയിച്ചു. യുവതിയുടെ പൗരത്വവുമായി ബന്ധപ്പെട്ട രേഖകളും പൊലീസ് പരിശോധിച്ചുവരികയാണ്.