എസ്‌ഐആർ; ബംഗാളിൽ വോട്ടർപട്ടികയിൽ നിന്ന് പുറത്താക്കിയതിന്റെ പേരിൽ മൂന്നുപേർ ജീവനൊടുക്കി

കൊൽക്കത്ത: പശ്ചിമ ബംഗാളിൽ വോട്ടർപട്ടിക പരിഷ്കരണത്തിന്റെ ഭാഗമായി ലക്ഷക്കണക്കിന് ആളുകളുടെ പേര് ഒഴിവാക്കുന്നത് വലിയ മാനുഷിക പ്രതിസന്ധിയിലേക്ക് നീങ്ങുന്നു. വോട്ടർപട്ടികയിൽ നിന്ന് പേര് നീക്കം ചെയ്യപ്പെട്ടതിനെത്തുടർന്ന് രാജ്യം നഷ്ടപ്പെടുമെന്ന ഭീതിയിൽ ഇതിനോടകം നിരവധി പേർ ആത്മഹത്യ ചെയ്തതായാണ് റിപ്പോർട്ടുകൾ.

വടക്കൻ ബംഗാളിലെയും അതിർത്തി ജില്ലകളിലെയും സാധാരണക്കാരാണ് കേന്ദ്ര ഏജൻസികളുടെയും തിരഞ്ഞെടുപ്പ് കമ്മീഷന്റെയും നടപടിയിൽ ഏറ്റവും കൂടുതൽ ആശങ്കയിലായിരിക്കുന്നത്. ദേശീയ പൗരത്വ പട്ടിക നടപ്പിലാക്കുന്നതിന്റെ മുന്നോടിയായാണ് ഈ നീക്കമെന്ന അഭ്യൂഹം ശക്തമായതോടെയാണ് ജനങ്ങൾക്കിടയിൽ പരിഭ്രാന്തി പടർന്നത്.

വോട്ടർ പട്ടികയിൽ നിന്ന് പേര് വെട്ടിയതോടെ തങ്ങൾ വിദേശികളായി മുദ്രകുത്തപ്പെടുമോ എന്ന ഭയമാണ് ആത്മഹത്യകളിലേക്ക് നയിക്കുന്നത്. കഴിഞ്ഞ ഏതാനും ദിവസങ്ങൾക്കിടയിൽ മാത്രം മൂന്നോളം പേർ ഈ കാരണത്താൽ ജീവനൊടുക്കിയതായാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്.

ഒരു അറിയിപ്പും കൂടാതെയാണ് വർഷങ്ങളായി വോട്ട് ചെയ്യുന്നവരുടെ പേര് പട്ടികയിൽ നിന്ന് നീക്കം ചെയ്തതെന്ന് ആക്ഷേപമുണ്ട്. പതിറ്റാണ്ടുകളായി ബംഗാളിൽ താമസിക്കുന്ന പാവപ്പെട്ട കർഷകരും തൊഴിലാളികളുമാണ് രേഖകളിലെ നിസ്സാര പിഴവുകൾ കാരണം പട്ടികയ്ക്ക് പുറത്തായിരിക്കുന്നത്. കേന്ദ്ര സർക്കാരിന്റെ പൗരത്വ നയങ്ങൾക്കെതിരെ സംസ്ഥാനത്തുടനീളം വലിയ രീതിയിലുള്ള പ്രതിഷേധങ്ങൾക്കും ഈ സംഭവം കാരണമായിട്ടുണ്ട്.