ശക്തമായ മഴ; അസം-മേഘാലയ അതിർത്തിയിൽ കനത്ത വെള്ളപ്പൊക്കം,ഗതാഗതം തടസ്സപ്പെട്ടു

ജൊറാബത്: അസം-മേഘാലയ അതിർത്തിയിലുള്ള ജൊറാബതിൽ പെയ്ത കനത്ത മഴയെ തുടർന്ന് വൻ വെള്ളക്കെട്ട് രൂപപ്പെട്ടു. ഇതോടെ മേഖലയിലെ ഗതാഗത സംവിധാനം പൂർണ്ണമായും തടസ്സപ്പെട്ടു.

ഗുവാഹത്തിയെ ഷില്ലോങ്ങുമായും സെൻട്രൽ-അപ്പർ അസമുകളുമായും ബന്ധിപ്പിക്കുന്ന ഏറ്റവും തിരക്കേറിയ പാതകളിലൊന്നിലാണ് വെള്ളപ്പൊക്കം കാരണം വാഹനങ്ങൾ കുടുങ്ങിയത്. തുടർന്ന് അധികൃതർ അടിയന്തരമായി ഗതാഗത നിയന്ത്രണം ഏർപ്പെടുത്തുകയും വാഹനങ്ങൾ വഴിതിരിച്ചുവിടുകയും ചെയ്തു.

അസം സംസ്ഥാന ദുരന്ത നിവാരണ അതോറിറ്റിയുടെ റിപ്പോർട്ട് പ്രകാരം സോനാപൂർ റവന്യൂ സർക്കിളിലെ ജൊറാബത്-അമേരിഗോഗ് ഉൾപ്പെടെയുള്ള പല പ്രദേശങ്ങളും വെള്ളത്തിനടിയിലാണ്. രുക്മിണിഗാവ്, വിഐപി റോഡ് തുടങ്ങിയ ഇടങ്ങളിൽ പമ്പ് ഉപയോഗിച്ച് വെള്ളം മാറ്റാനുള്ള ശ്രമങ്ങൾ പുരോഗമിക്കുകയാണ്.

തുടർച്ചയായി പെയ്യുന്ന മഴ കാരണം നോർത്ത് ഗുവാഹത്തി, രുദ്രേശ്വർ, അഭയപൂർ തുടങ്ങിയ നഗരപ്രദേശങ്ങളിലും കനത്ത വെള്ളപ്പൊക്കമുണ്ടായിട്ടുണ്ട്. കൊൽബാരി റോഡ്, രുദ്രേശ്വർ-മധുപ്പൂർ റോഡ്, അഭയപൂർ റോഡ് തുടങ്ങിയ പ്രധാന പാതകളെല്ലാം ഇപ്പോഴും വെള്ളത്തിനടിയിലാണ്.

വെള്ളം ഇറങ്ങുന്നത് വരെ ഷില്ലോങ്, അപ്പർ അസം ഭാഗങ്ങളിലേക്ക് പോകുന്ന യാത്രികർ ജാഗ്രത പാലിക്കണമെന്നും തടസ്സങ്ങൾ പ്രതീക്ഷിക്കണമെന്നും അധികൃതർ അറിയിച്ചു.