അർ‌ണബ് അതിശക്തം; ബുധനാഴ്ച പുലർച്ചെ കരതൊട്ടു, പരക്കെ നാശനഷ്ടം

അമരാവതി: ആന്ധ്രാപ്രദേശ്, യാനം തീരങ്ങളിൽ ബുധനാഴ്ച പുലർച്ചെ അര്‍ണബ് ചുഴലിക്കാറ്റ് കരതൊട്ടതായി ഇന്ത്യൻ കാലാവസ്ഥാ വകുപ്പ് (IMD) അറിയിച്ചു. ഇതിന്റെ ഭാഗമായി പ്രദേശത്ത് അതിശക്തമായ കാറ്റും മഴയും അനുഭവപ്പെടുന്നു. ചുഴലിക്കാറ്റിന്റെ കേന്ദ്രഭാഗത്ത് മണിക്കൂറിൽ 125 മുതൽ 135 കിലോമീറ്റർ വരെ വേഗതയുള്ള കാറ്റാണ് വീശുന്നതെന്നും, കാറ്റിന്റെ വേഗം മണിക്കൂറിൽ 150 കിലോമീറ്റർ വരെ ഉയരാൻ സാധ്യതയുണ്ടെന്നും ഐഎംഡി അറിയിച്ചു.

കഴിഞ്ഞ മൂന്ന് മണിക്കൂറിനിടെ മണിക്കൂറിൽ 3 കിലോമീറ്റർ വേഗത്തിൽ വടക്കുപടിഞ്ഞാറൻ ദിശയിലേക്ക് നീങ്ങിയ ചുഴലിക്കാറ്റ്, തുടക്കത്തിൽ സാവധാനത്തിൽ അതേ ദിശയിൽ നീങ്ങുമെന്നും പിന്നീട് വടക്ക്-വടക്കുപടിഞ്ഞാറൻ ദിശയിലേക്ക് സഞ്ചരിക്കുമെന്നും കാലാവസ്ഥാ വകുപ്പ് വ്യക്തമാക്കി.

“ഞങ്ങൾക്ക് എല്ലാം നഷ്ടപ്പെട്ടു”: ചുഴലിക്കാറ്റിന് പിന്നാലെ ആന്ധ്രാപ്രദേശിലെ നാട്ടുകാരൻ പറഞ്ഞു.

“ചുഴലിക്കാറ്റ് കാരണം ഞങ്ങൾക്ക് എല്ലാം നഷ്ടപ്പെട്ടു. ഞങ്ങളുടെ വീടുകൾ തകർന്നു. ഇപ്പോൾ ഞങ്ങൾ ധരിച്ചിരിക്കുന്ന വസ്ത്രങ്ങളല്ലാതെ മറ്റൊന്നും ബാക്കിയില്ല. ജീവിതം പുനർനിർമിക്കാൻ സാമ്പത്തിക സഹായവും മറ്റ് പിന്തുണയും നൽകി സർക്കാർ ഞങ്ങളെ രക്ഷിക്കണമെന്ന് അഭ്യർഥിക്കുന്നു,” വാർത്താ ഏജൻസിയായ എഎൻഐയുമായി സംസാരിക്കവെ അദ്ദേഹം പറഞ്ഞു.

ചൊവ്വാഴ്ച കാലാവസ്ഥാ സ്ഥിതി അതിവേഗം വഷളായതോടെ തുറമുഖ നഗരമായ വിശാഖപട്ടണത്ത് ശക്തമായ കാറ്റും കനത്ത മഴയും ജനജീവിതത്തെ ബാധിച്ചു. നഗരത്തിന്റെ വിവിധ ഭാഗങ്ങളിൽ ശക്തമായ കാറ്റിനൊപ്പം മഴ പെയ്തതോടെ പ്രധാന റോഡുകളിൽ വെള്ളം കയറി. താഴ്ന്ന പ്രദേശങ്ങളിൽ വെള്ളക്കെട്ട് രൂപപ്പെട്ടു. കടൽ പ്രക്ഷുബ്ധമായതിനെത്തുടർന്ന് ബീച്ച് റോഡിനോട് ചേർന്ന തീരപ്രദേശങ്ങളിലേക്ക് കൂറ്റൻ തിരമാലകൾ ആഞ്ഞടിച്ചു.

ലോസ്സൺസ് ബേ, എംവിപി കോളനി, സിരിപുരം, ഈസ്റ്റ് പോയിന്റ് കോളനി, ബീച്ച് റോഡ്, തുറമുഖ മേഖല, കിർലാംപുടി, വൺ ടൗൺ തുടങ്ങിയ പ്രദേശങ്ങളിലാണ് ചുഴലിക്കാറ്റിന്റെ ആഘാതം പ്രകടമായത്. നഗരത്തിന്റെ വിവിധ ഭാഗങ്ങളിൽ മരങ്ങളും മരച്ചില്ലകളും കടപുഴകി വീണു. ശക്തമായ കാറ്റിൽ ഇരുചക്രവാഹന യാത്രക്കാർക്ക് ബാലൻസ് നിലനിർത്താൻ പോലും ബുദ്ധിമുട്ടുണ്ടായി. ഉച്ചയോടെ കാറ്റിന്റെ വേഗം വർധിച്ചതോടെ ചില യാത്രക്കാർക്ക് വാഹനങ്ങളുടെ നിയന്ത്രണം നഷ്ടപ്പെട്ടതായും റിപ്പോർട്ടുകളുണ്ട്.

ചൊവ്വാഴ്ച രാവിലെ പത്തുമണി വരെ നഗരത്തിലെ ജനങ്ങളുടെ സഞ്ചാരം സാധാരണ നിലയിലായിരുന്നു. എന്നാൽ കാലാവസ്ഥ കൂടുതൽ മോശമായതോടെ കടകൾ അടയ്ക്കുകയും തെരുവുകച്ചവടക്കാർ കച്ചവടം അവസാനിപ്പിക്കുകയും ചെയ്തു. ചുഴലിക്കാറ്റ് തീരത്തോട് അടുക്കുന്നതിനിടെ ശക്തമായ കാറ്റ് വീശിയതോടെ നിരവധി പേർ വീടുകളിൽ തന്നെ കഴിയുകയായിരുന്നു. കടപുഴകി വീണ മരങ്ങളും നശിച്ച പച്ചപ്പും നഗരത്തിന്റെ ചില ഭാഗങ്ങളെ ചുഴലിക്കാറ്റ് ഇതിനകം തന്നെ തകർത്ത പ്രദേശങ്ങളെപ്പോലെയാക്കി.

2014-ൽ വിശാഖപട്ടണത്തെ തകർത്ത ഹുദ്ഹുദ് ചുഴലിക്കാറ്റിന്റെ ഭീതി ജനങ്ങളിൽ നിലനിൽക്കവെയാണ് വീണ്ടും ദുരന്തം.വിശാഖപട്ടണം ജില്ലയുടെ ചില ഭാഗങ്ങളിൽ അതിശക്തമായ മഴയാണ് രേഖപ്പെടുത്തിയത്. ചൊവ്വാഴ്ച വൈകിട്ട് ആറുമണി വരെയുള്ള കണക്കുകൾ പ്രകാരം ഗ്രാമീണ വിശാഖപട്ടണത്തിലെ ജാതറ പരിസരത്ത് 14.18 സെന്റിമീറ്റർ മഴ ലഭിച്ചു. പെന്ദുർത്തിയിലെ ചെമലപള്ളിയിൽ 13.8 സെന്റിമീറ്ററും ഗ്രാമീണ വിശാഖപട്ടണത്തിലെ തുളസി നഗർ പാർക്കിൽ 13.65 സെന്റിമീറ്ററും മഴ രേഖപ്പെടുത്തി. ഗോപാലപട്ടണത്തെ സിംഹാചലത്ത് 13.53 സെന്റിമീറ്റർ മഴ ലഭിച്ചപ്പോൾ പെന്ദുർത്തിയിലെ ബുച്ചിരാജുപാലം, നേതാജി പാർക്ക് എന്നിവിടങ്ങളിൽ ഏകദേശം 13.4 സെന്റിമീറ്റർ വീതം മഴ രേഖപ്പെടുത്തി.

16-ാം പോലീസ് ബറ്റാലിയൻ പരിസരത്ത് 13.29 സെന്റിമീറ്റർ മഴ ലഭിച്ചു. മധുരവാഡ സോണൽ ഓഫീസിലും ഗംഭീരത്തും യഥാക്രമം 13.08 സെന്റിമീറ്റർ, 13.05 സെന്റിമീറ്റർ മഴയാണ് രേഖപ്പെടുത്തിയത്. സമീപ ജില്ലയായ വിജയനഗരത്തിലെ ഭോഗാപുരത്തുള്ള കെവിബിആർ സ്കൂളിൽ ചൊവ്വാഴ്ച വൈകിട്ട് ആറുമണി വരെ 13.25 സെന്റിമീറ്റർ മഴ ലഭിച്ചു.

ഒക്ടോബർ 27-ന് രാവിലെ 8.30 മുതൽ ഒക്ടോബർ 28-ന് പുലർച്ചെ മൂന്ന് മണി വരെയുള്ള കാലയളവിൽ അനകപ്പള്ളി, വിശാഖപട്ടണം ജില്ലകളിലെ വിവിധ സ്ഥലങ്ങളിൽ 200 മില്ലിമീറ്ററിലധികം അതിതീവ്ര മഴ രേഖപ്പെടുത്തിയതായും ഇന്ത്യൻ കാലാവസ്ഥാ വകുപ്പ് (ഐഎംഡി) അറിയിച്ചു.

അടുത്ത മൂന്ന് മണിക്കൂറിനുള്ളിൽ ആന്ധ്രാപ്രദേശിലെ താഴ്ന്ന പ്രദേശങ്ങളിൽ ജ്യോതിശാസ്ത്രപരമായ വേലിയേറ്റ നിരപ്പിനേക്കാൾ 1.0 മുതൽ 1.5 മീറ്റർ വരെ ഉയരത്തിൽ വെള്ളം കയറാൻ ഉയർന്ന സാധ്യതയുണ്ടെന്നും അതിനുശേഷം വെള്ളക്കയറ്റത്തിന്റെ തീവ്രത കുറയുമെന്നും ഇന്ത്യൻ കാലാവസ്ഥാ വകുപ്പ് (ഐഎംഡി) ഏറ്റവും പുതിയ ബുള്ളറ്റിനിൽ അറിയിച്ചു.