'കഞ്ചാവ് തന്നില്ലെങ്കിൽ താഴേക്കില്ല'; ആന്ധ്രയിൽ മൊബൈൽ ടവറിന് മുകളിൽ കയറി യുവാവിന്റെ ആത്മഹത്യാ ഭീഷണി

പ്രകാശം (ആന്ധ്രാപ്രദേശ്): കഞ്ചാവ് വാങ്ങി നൽകിയില്ലെങ്കിൽ താഴേക്ക് ചാടുമെന്ന ഭീഷണിയുമായി യുവാവ് മൊബൈൽ ടവറിന് മുകളിൽ കയറി. ആന്ധ്രാപ്രദേശിലെ പ്രകാശം ജില്ലയിലാണ് സംഭവം. മണിക്കൂറുകൾ നീണ്ട നാടകീയ രംഗങ്ങൾക്കൊടുവിലാണ് ഇയാളെ താഴെയിറക്കാൻ കഴിഞ്ഞത്.

ഹനുമന്തു എന്ന യുവാവാണ് മൊബൈൽ ടവറിന് മുകളിൽ കയറി ഒരു പാക്കറ്റ് കഞ്ചാവിനായി ആത്മഹത്യാ ഭീഷണി മുഴക്കിയത്. ടവറിന്റെ അപകടകരമായ ഉയരത്തിലിരുന്ന് ഇയാൾ ഉച്ചത്തിൽ നിലവിളിക്കാൻ തുടങ്ങിയതോടെയാണ് നാട്ടുകാരുടെ ശ്രദ്ധയിൽപ്പെട്ടത്. താഴെ ആളുകൾ കൂടിയതോടെ തനിക്ക് കഞ്ചാവ് വേണമെന്ന ആവശ്യത്തിൽ ഇയാൾ ഉറച്ചുനിൽക്കുകയായിരുന്നു.

"ഞാൻ നിങ്ങളുടെ കാലുപിടിക്കാം സാർ... എനിക്ക് ഒരു പാക്കറ്റ് കഞ്ചാവ് വാങ്ങിത്തരൂ സാർ..." എന്ന് ഇയാൾ താഴെ നിന്നവരോടും ഉദ്യോഗസ്ഥരോടും വിളിച്ചുപറയുന്നുണ്ടായിരുന്നു. യുവാവ് താഴേക്ക് ചാടുമോ എന്ന ഭയത്താൽ നാട്ടുകാരും പരിഭ്രാന്തരായി. ഇതിന്റെ ദൃശ്യങ്ങൾ ഇപ്പോൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.

സംഭവമറിഞ്ഞ് പൊലീസും ഫയർഫോഴ്‌സും അടങ്ങുന്ന അടിയന്തര രക്ഷാപ്രവർത്തകർ സ്ഥലത്തെത്തി. യുവാവുമായി പൊലീസ് മണിക്കൂറുകളോളം ചർച്ച നടത്തുകയും കൗൺസിലിങ് നൽകുകയും ചെയ്തു. ഒടുവിൽ ഏറെ പണിപ്പെട്ടാണ് ഇയാളെ സുരക്ഷിതമായി താഴെയിറക്കിയത്.

തുടർന്ന് വൈദ്യപരിശോധനകൾക്കും ചികിത്സയ്ക്കുമായി ഹനുമന്തുവിനെ സമീപത്തുള്ള സർക്കാർ ആശുപത്രിയിലേക്ക് മാറ്റി. കടുത്ത മാനസിക സമ്മർദ്ദമോ അല്ലെങ്കിൽ മയക്കുമരുന്നിന്റെ ലഹരിയിലോ ആകാം യുവാവിനെ ഇത്തരമൊരു പ്രവൃത്തിക്ക് പ്രേരിപ്പിച്ചതെന്നാണ് പൊലീസിന്റെ പ്രാഥമിക നിഗമനം.