വരൾച്ചയും ചൂടും കൂടുന്നു; ജലനിരപ്പ് ഉയർത്താൻ ക്ലൗഡ് സീഡിംഗുമായി മലേഷ്യ

കോലാലംപൂർ : അണക്കെട്ടിലെ ജലനിരപ്പ് ഉയർത്തുന്നതിനും മേഖലയിലെ മൂടൽമഞ്ഞ് കുറയ്ക്കുന്നതിനുമായി മലേഷ്യ വ്യാഴാഴ്ച കിഴക്കൻ സരാവകിൽ മൂന്ന് ദിവസത്തെ ക്ലൗഡ് സീഡിംഗ് പ്രവർത്തനം ആരംഭിച്ചു. ബതാങ് ഐ, ബകുൻ, മുറം ജലവൈദ്യുത അണക്കെട്ടുകളിലെ ജലനിരപ്പ് ഉയർത്തുക ലക്ഷ്യമിട്ടാണ് ക്ലൗഡ് സീഡിം​ഗ് നടത്തിയത്.

ഒക്ടോബറിലെ ചൂടും വരണ്ടതുമായ കാലാവസ്ഥ ഉണ്ടാകാൻ സാധ്യതയുള്ളതിനാൽ ജലസംഭരണികളുടെ അളവ് വർധിപ്പിക്കുന്നതിനാണ് ഈ നടപടി സ്വീകരിച്ചത്. ക്ലൗഡ് സീഡിം​ഗിനായി സി-130 വിമാനമാണ് ഉപയോ​ഗിക്കുന്നത്. ലക്ഷ്യമിട്ട പ്രദേശങ്ങൾക്ക് മുകളിലായി 1,500 മുതൽ 2,100 മീറ്റർ വരെ ഉയരത്തിൽ മേഘങ്ങളിലേക്ക് സലൈൻ ലായനി തളിച്ചാണ് ക്ലൗഡ് സീ​ഡിം​ഗ് നടത്തുന്നത്. കാലാവസ്ഥ അനുകൂലമാകുന്ന സാഹചര്യത്തിൽ മാത്രമേ ക്ലൗഡ് സീഡിം​ഗ് നടത്തുകയുള്ളൂവെന്ന് അധികൃതർ അറിയിച്ചു.

അയൽരാജ്യമായ ഇന്തോനേഷ്യ അസാധാരണമായ വരണ്ട കാലാവസ്ഥയെ നേരിടുന്നതിനിടയിലാണ് ഈ ശ്രമം. സുമാത്രയിലും കലിമന്താനിലും കാട്ടുതീക്ക് അനുകൂലമായ സാഹചര്യങ്ങളാണ് എൽ നിനോ സൃഷ്ടിക്കുന്നത്. ജൂലൈയിൽ മാത്രം ഇന്തോനേഷ്യയിൽ ഏകദേശം 95,000 ഹെക്ടർ ഭൂമിയാണ് കാട്ടുതീയിൽ കത്തിനശിച്ചത്.