വ്യക്തി മരിച്ചാലും ആധാർ സജീവം ; വിവരാവകാശ രേഖകൾ

ന്യൂഡൽഹി

രാജ്യത്ത്‌ 14 വർഷത്തിനിടയിൽ മരിച്ച 16 കോടിയിലേറെയാളുകളിൽ 90 ശതമാനം പേരുടെയും ആധാർ സജീവമായി തുടരുന്നെന്ന്‌ റിപ്പോർട്ട്‌. ആധാർ പദ്ധതി ആരംഭിച്ച 2010 മുതൽ 2024വരെ യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) 1.14 കോടി ആധാർ നമ്പറുകൾ മാത്രമാണ്‌ നിർജീവമാക്കിയതെന്ന്‌ വിവരാവകാശ രേഖകൾ വെളിപ്പെടുത്തി.

രാജ്യത്തെ മരണനിരക്കുമായി താരതമ്യം ചെയ്യുമ്പോൾ ഇത്‌ 10 ശതമാനത്തിൽ താഴെയാണ്‌.

രജിസ്ട്രാർ ജനറൽ ഓഫ് ഇന്ത്യയി(ആർജിഐ)ൽനിന്ന്‌ ആധാർ നമ്പറുകൾക്കൊപ്പം മരണരേഖകളും ശേഖരിച്ചാണ്‌ യുഐഡിഎഐ ആധാർ നമ്പർ നിർജീവമാക്കുന്നത്‌. വിവരാവകാശ റിപ്പോർട്ട്‌ പുറത്തുവന്നതിന്‌ പിന്നാലെ, ആർജിഐയിൽനിന്ന്‌ 2022ൽ ആധാർ നമ്പറുകളുമായി ബന്ധിപ്പിച്ചിട്ടുള്ള മരണരേഖകൾ ശേഖരിച്ച്‌ ഏകദേശം 1.17 കോടി ആധാർ നമ്പറുകൾ അടിയന്തരമായി യുഐഡിഎഐ നിർജീവമാക്കി.