അമിതവേ​ഗതയിലെത്തിയ കാർ ഇലക്ട്രിക് പോസ്റ്റിലേയ്ക്ക് ഇടിച്ചു കയറി; രണ്ട് മരണം, വാഹനം കത്തിനശിച്ചു

​ഗുവാഹട്ടി: അമിതവേ​ഗതയിലെത്തിയ കാർ നിയന്ത്രണം വിട്ട് ഇലക്ട്രിക് പോസ്റ്റിലേയ്ക്ക് ഇടിച്ചുകയറി. അപകടത്തിൽ കാറിന് തീപിടിച്ചു. കാറിലുണ്ടായിരുന്ന നാലുപേരിൽ രണ്ടുപേർ പൊള്ളലേറ്റ് മരിച്ചു. രണ്ടുപേർക്ക് ​ഗുരുതരമായി പരിക്കേറ്റതിനെ തുടർന്ന് വിദഗ്ധ ചികിത്സയ്ക്കായി ഗുവാഹത്തിയിലെ ആശുപത്രിയിൽ പ്രവേശിപ്പിച്ചു. അസാമിൽ നാ​ഗാവ് ജില്ലയിൽ ദേശീയപാതയിലാണ് അപകടമുണ്ടായത്.

അരുണാചൽ പ്രദേശിൽ നിന്ന് ഗുവാഹത്തിയിലേക്ക് വന്ന കാർ ആണ് അപകടത്തിൽപ്പെട്ടത്. അമിതവേ​ഗതയിലെത്തിയ വാഹനം ഡിവൈഡറിലിടിക്കുകയും നിയന്ത്രണം പൂർണമായും നഷ്ട‌പ്പെട്ട് റോഡരികിലെ ഇലക്ട്രിക് പോസ്റ്റിലേയ്ക്ക് ഇടിച്ചുകയറുകയുമായിരുന്നു. പോസ്റ്റിലിടിച്ച കാർ തലകീഴായി മറിയുകയും തൊട്ടുപിന്നാലെ തീപിടിച്ചു. മരിച്ചവരുടെയും പരിക്കേറ്റവരുടെയും വ്യക്തിവിവരങ്ങൾ ലഭ്യമായിട്ടില്ല. അമിതവേഗതയാണ് അപകടത്തിന് കാരണമായതെന്നാണ് പ്രാഥമിക നിഗമനം. സംഭവത്തിൽ പൊലീസ് അന്വേഷണം ആരംഭിച്ചു.