നീറ്റ് പരീക്ഷ ക്രമക്കേട്: കെ രാധാകൃഷ്ണൻ സമിതി റിപ്പോർട്ട് സമർപ്പിച്ചു

ന്യൂഡൽഹി > നീറ്റ് പരീക്ഷ ക്രമക്കേടുമായി ബന്ധപ്പെട്ട ഉന്നതതല സമിതി റിപ്പോർട്ട് കേന്ദ്ര സർക്കാർ സുപ്രീം കോടതിക്ക് കൈമാറി. ഐഎസ്ആർഒ മുൻ ചെയർമാൻ കെ രാധാകൃഷ്ണൻ അധ്യക്ഷനായ സമിതിയാണ് റിപ്പോർട്ട് സമർപ്പിച്ചത്. നാഷണൽ ടെസ്റ്റിം​ഗ് ഏജൻസിയിൽ മാറ്റം വേണമെന്ന് സമിതി നിർദേശിച്ചതായി കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ പറഞ്ഞു. ഇത് അനുസരിച്ച് പുതിയ തസ്തികകൾ സൃഷ്ടിച്ച് ഉദ്യോ​ഗസ്ഥരെ നിയമിച്ചതായും മന്ത്രി വ്യക്തമാക്കി.

നിലവിലുള്ള പരീക്ഷാ നടത്തിപ്പിലെ പ്രശ്നങ്ങൾ പഠിച്ച് 101 ശുപാർശകൾ സമിതി നൽകിയ റിപ്പോർട്ടിലുണ്ട്. നാഷണൽ ടെസ്റ്റിം​ഗ് ഏജൻസി ഇനി മുതൽ ഉന്നത വിദ്യാഭ്യാസ ​രം​ഗത്തെ പ്രവേശന പരീക്ഷകൾ മാത്രമായിരിക്കും നടത്തുക. റിക്രൂട്ട്മെന്റ് പരീക്ഷകൾ എൻടിഎയുടെ കീഴിൽ നടത്തരുത്. മെഡിക്കൽ വദ്യാഭ്യാസത്തിനായുള്ള പ്രവേശന പരീക്ഷയായ നീറ്റ് ഓൺലൈൻ ആക്കണമെന്നും സമിതി നിർദേശിച്ചിട്ടുണ്ട്. ആരോ​ഗ്യ മന്ത്രാലയുവുമായി ചർച്ച നടത്തിയതിന് ശേഷമാകും ഇക്കാര്യത്തിൽ തീരുമാനം എടുക്കുക.

അടുത്ത വർഷം ഏജൻസി പുനക്രമീകരിച്ച് കൂടുതൽ പ്രവർത്തനക്ഷമമാക്കും. 10 പുതിയ പോസ്റ്റുകൾ ഏജൻസിയിൽ ക്രമീകരിക്കണം. പരാതികൾ പരിശോധിക്കാൻ ദേശീയ തലത്തിൽ സമിതി വേണമെന്നും റിപ്പോർട്ടിൽ ശുപാർശയുണ്ട്.