ഡൽഹി വിമാനത്താവളത്തിൽ അപകടം; വിമാനങ്ങൾ കൂട്ടിയിടിച്ചു

ന്യൂഡൽഹി: ഡൽ‌ഹി അന്താരാഷ്ട്ര വിമാനത്താവളത്തിൽ വിമാനങ്ങൾ കൂട്ടിയിടിച്ച് അപകടം. ആകാശ എയറിന്റെയും സ്പൈസ് ജെറ്റിന്റെയും ചിറകുകൾ തമ്മിലിടിക്കുകയായിരുന്നു. അപകടത്തിൽ ആളപായമില്ല.

ഹൈദരാബാദിലേക്ക് യാത്രക്കാരുമായി പുറപ്പെടാൻ തയ്യാറെടുക്കുകയായിരുന്നു ആകാശ എയർ. ഈ സമയത്ത് അതേ പാർക്കിങ് ബേയിലേക്ക് എത്തിയ സ്പൈസ് ജെറ്റ് വിമാനത്തിന്റെ ചിറക് വന്നിടിക്കുകയായിരുന്നു. ഉടൻ തന്നെ യാത്രക്കാരെ എല്ലാം പുറത്തിറക്കി സുരക്ഷിതരാക്കി.

സ്പൈസ് ജെറ്റ് വിമാനത്തിന്റെ ഒരുഭാ​ഗം ഒടിഞ്ഞിട്ടുണ്ട്. യാത്രക്കാരെ മറ്റൊരുവിമാനത്തിൽ ഹൈദരാബാദിലേക്ക് പോകാനുള്ള സംവിധാനം ഒരുക്കിയെന്ന് ആകാശ എയർ അറിയിച്ചു. ഇരുവിമാനങ്ങളും അറ്റകുറ്റപ്പണികൾക്കായി മാറ്റി.