ഇസ്രയേൽ തെരഞ്ഞെടുപ്പ് 27ന്: വിദ്വേഷം വിലപ്പോവുന്നില്ല, നെതന്യാഹുവിന്റെ നില പരുങ്ങലിലെന്ന് സ‍ർവേകൾ

ടെൽ അവീവ്: ഇസ്രയേലിന്റെ ചരിത്രത്തിലെ ഏറ്റവും നിര്‍ണായകമായ തെര‍ഞ്ഞെടുപ്പ് ഒക്ടോബര്‍ 27 ന് നടക്കും. പ്രധാനമന്ത്രി ബെഞ്ചമിൻ നെതന്യാഹുവിന്റെ ഭരണത്തിനുള്ള വിലയിരുത്തൽ കൂടി ആയാണ് ഈ തെരഞ്ഞെടുപ്പ് വിലയിരുത്തപ്പെടുന്നത്. 2023 ഒക്ടോബർ 7-നുണ്ടായ ഹമാസ് ആക്രണത്തിന് പിന്നാലെ മൂന്ന് വര്‍ഷമായി തുടരുന്ന വംശഹത്യാ നടപടികളുടെ പശ്ചാത്തലത്തിൽ കൂടിയാണ് തെരഞ്ഞെടുപ്പ് എത്തുന്നത്.

ഹമാസ് ആക്രമണം വീഴ്ചയായി ആരോപിക്കപ്പെട്ടതോടെ അതേ നാണയത്തിൽ പരമാവധി വിദ്വേഷവും വിഭാഗീയതയും കത്തിച്ചാണ് നെതന്യാഹുവിന്റെ മുന്നേറ്റം. രാജ്യം ഇത്രയും മാരകമായ തോതിൽ വലതുപക്ഷവൽക്കരിക്കപ്പെട്ട സാഹചര്യം ഉണ്ടായിട്ടില്ലെന്ന് ഇസ്രയേൽ മാധ്യമങ്ങൾ തന്നെ വിലയിരുത്തുന്നു. വിദ്വേഷം വിതച്ചുള്ള മുന്നേറ്റത്തിനുള്ള ശ്രമമാണ് മാരക സാഹചര്യം സൃഷ്ടിച്ചിരിക്കുന്നത്. അപ്പോഴും പക്ഷേ നെതന്യാഹുവിന്റെ നില ഭദ്രമല്ലെന്നാണ് സര്‍വേകൾ പറയുന്നത്. വര്‍ഷങ്ങളായി നെതന്യാഹുവും അദ്ദേഹത്തിന്റെ ലിക്വിഡ് പാര്‍ടിയും അധികാരം പിടിക്കാനായി ഉപയോഗിച്ച അതേ വിദ്വേഷ തന്ത്രങ്ങൾ തന്നെ എതിര്‍ പാര്‍ട്ടികളും ഏറ്റെടുത്തിരിക്കുന്നു. ഇതോടെയാണ് രാജ്യത്തെ രാഷ്ട്രീയ ചിത്രം മാറിമറിഞ്ഞത്.

ഗാസ ആക്രമണവും

നെതന്യാഹു സര്‍ക്കാരിന്റെ തുടര്‍ച്ചയും

ഇസ്രായേലിന്റെ ചരിത്രത്തിൽ 18 വര്‍ഷം പ്രധാനമന്ത്രി പദം അലങ്കരിച്ച് ഏറ്റവും കൂടുതൽ കാലം അധികാരത്തിലിരുന്ന നേതാവാണ് നെതന്യാഹു. ഇസ്രയേലിൽ പാര്‍ടികൾക്ക് ആണ് ജനങ്ങൾ വോട്ട് ചെയ്യുന്നത്. ആകെ 120 സീറ്റുകളുള്ള പാർലമെന്റിൽ സർക്കാരുണ്ടാക്കാൻ കുറഞ്ഞത് 61 സീറ്റുകൾ വേണം. രാജ്യത്തിന്റെ 78 വ‍ർഷത്തെ ചരിത്രത്തിൽ ഒറ്റ പാര്‍ടിക്കും കേവല ഭൂരിപക്ഷം നേടാൻ കഴിഞ്ഞിരുന്നില്ല. മിനിമം 3.25% വോട്ട് നേടിയാൽ ചെറിയ പാർടികൾക്കും ഭരണത്തിൽ കയറിപ്പറ്റാൻ കഴിയും.

1988 ന് ശേഷം ആദ്യമായാണ് ഒരു മന്ത്രസഭ നാലു വര്‍ഷ കലാവധി പൂര്‍ത്തിയാക്കി തെരഞ്ഞെടുപ്പിനെ നേരിടുന്നത്. 2019-നും 2022-നും ഇടയിൽ മാത്രം അഞ്ച് തവണ ജനങ്ങൾ തെരഞ്ഞെടുപ്പിൽ വോട്ട് ചെയ്തിട്ടുണ്ട്. പക്ഷേ ഇപ്പോഴത്തെ സര്‍ക്കാര്‍ നാല് വര്‍ഷം പൂര്‍ത്തിയാക്കി. ഹമാസ് കടന്നാക്രമണം ഉണ്ടായത് സര്‍ക്കാരിന്റെ തുടര്‍ച്ച ഉറപ്പാക്കുന്ന സാഹചര്യം സൃഷ്ടിക്കുന്നതിൽ നിര്‍ണായകമായി.

ചെറുപാര്‍ടികൾ നിര്‍ണായകം

പാർലമെന്റായ നെസെറ്റിൽ (Knesset) ഇടംനേടാൻ ഒരു പാർട്ടി മൊത്തം വോട്ടിന്റെ കുറഞ്ഞത് 3.25% എങ്കിലും നേടിയിരിക്കണം. ഇത് ഏകദേശം 4 സീറ്റുകൾക്ക് തുല്യമാണ്. ഇത്തവണത്തെ തെരഞ്ഞെടുപ്പിൽ വോട്ട് ചെയ്യാൻ അർഹതയുള്ളവരുടെ എണ്ണം ഏകദേശം 73.3 ലക്ഷത്തോളമാണ് ഇത് ഇസ്രായേലിന്റെ മൊത്തം ജനസംഖ്യയുടെ 71 ശതമാനത്തോളം വരും. മൊത്തം ജനസംഖ്യ ഏകദേശം 1.03 കോടിയാണ്.

ഇസ്രായേൽ ജനസംഖ്യയുടെ 20% വരുന്നത് പാലസ്തീൻ പൗരന്മാരാണെങ്കിലും കുറഞ്ഞ വോട്ടിങ് ശതമാനമാണ് ഇവിടെയുള്ളത്. ഇവര്‍ക്ക് ഭരണത്തിൽ കാര്യമായ സ്വാധീനം ലഭിച്ചിരുന്നില്ല. ഇത്തവണ ചെറു പാര്‍ടികൾക്ക് ഇടയിൽ വോട്ട് വിഭജിക്കപ്പെടുന്നതോടെ അറബ് പാര്‍ടികളുടെ സ്വാധീനവും നിര്‍ണായകമാവും എന്ന വിലയിരുത്തലുകൾ ഉണ്ട്. അതേസമയം നെതന്യാഹുവും പ്രധാന പ്രതിപക്ഷ നേതാക്കളും അറബ് പാർട്ടികളുമായി സഖ്യമുണ്ടാക്കില്ലെന്ന് പ്രഖ്യാപിച്ചാണ് വോട്ട് തേടുന്നത്.

നെതന്യാഹുവിന്റെ നേതൃത്വത്തിലുള്ള പ്രമുഖ വലതുപക്ഷ പാർട്ടിയായ ലിക്വിഡ് പാര്‍ടി മുൻ തെരഞ്ഞെടുപ്പിൽ കാൽഭാഗത്തോളം വോട്ട് നേടിയിരുന്നു. തീവ്രവലതുപക്ഷ ഓർത്തഡോക്സ് പാർട്ടികളുമായി ചേർന്നാണ് ഭരണം നിലനിർത്തിയത്. ലിക്വിഡ് പാര്‍ടി ഉൾപ്പെടെ അഞ്ച് പാര്‍ടികളായിരുന്നു ഭരണത്തിൽ. എതിര്‍ പക്ഷത്ത് അഞ്ച് പാര്‍ടികൾ മത്സര രംഗത്തുണ്ട്. രണ്ട് അറബ് കക്ഷി പാര്‍ടികളും മത്സരിക്കുന്നു.

നെതന്യാഹു കക്ഷികൾ

• ഓട്സ്മ യെഹൂദിത് (Otzma Yehudit): ഇറ്റാമർ ബെൻ-ഗ്വീർ നയിക്കുന്ന തീവ്ര വലതുപക്ഷ പാർട്ടി. മുൻ തെരഞ്ഞെടുപ്പിൽ റിലീജിയസ് സിയോണിസ്റ്റ് പാർട്ടിയുമായി ചേർന്ന് 14 സീറ്റുകൾ നേടി.
  

• ഷാസ് (Shas): ഉൽtrans-ഓർത്തഡോക്സ് വിഭാഗത്തിൽപ്പെട്ട സെഫാർഡി വോട്ടർമാരുടെ പാർട്ടി. നികുതി തട്ടിപ്പ് കേസിൽ ശിക്ഷിക്കപ്പെട്ടതിനെ തുടർന്ന് പാർട്ടി നേതാവ് ആര്യേ ദേരിക്ക് സുപ്രീം കോടതി കാബിനറ്റ് പദവി വിലക്കിയിരുന്നു.
  

• യുണൈറ്റഡ് തോറ ജൂഡായിസം (UTJ): ഓർത്തഡോക്സ് വിശ്വാസികളുടെ ആവശ്യങ്ങൾക്കായി നിലകൊള്ളുന്ന സഖ്യം. വിശ്വാസികൾക്ക് നിർബന്ധിത സൈനിക സേവനത്തിൽ നിന്ന് ഒഴിവാക്കൽ ഉറപ്പാക്കുന്ന നിയമം പാസാക്കാത്തതിൽ ഇവർ നെതന്യാഹുവിനോ
  

• റിലീജിയസ് സിയോണിസ്റ്റ് പാർട്ടി: ധനമന്ത്രി ബെസാലെൽ സ്മോട്രിച്ച് നയിക്കുന്ന തീവ്രവലതുപക്ഷ പാർട്ടി. വെസ്റ്റ് ബാങ്കിൽ കുടിയേറ്റ മേഖലകൾ വ്യാപിപ്പിക്കാൻ ഫണ്ട് അനുവദിച്ച പാർട്ടി നിലവിൽ പാർലമെന്റിലെത്താനുള്ള വോട്ട് വിഹിതത്തിനായി പൊരുതുന്നു.
  

• അംചാ യെസ്രായേൽ (Amcha Yisrael): മുൻ ജനറൽ ഓഫർ വിന്റർ ഓഗസ്റ്റിൽ രൂപീകരിച്ച പുതിയ വലതുപക്ഷ പാർട്ടി. നെതന്യാഹുവിന്റെ യുദ്ധ തന്ത്രങ്ങളിൽ അതൃപ്തിയുള്ള വലതുപക്ഷ വോട്ടർമാരെ ലക്ഷ്യമിട്ടാണ് എത്തിയതെങ്കിലും നിലവിൽ ഇവർക്കും കുറഞ്ഞ വോട്ട് വിഹിതം തികയ്ക്കാൻ കടുത്ത വെല്ലുവിളിയുണ്ട്.
  
  

നെതന്യാഹുവിന്റെ എതിര്‍ ചേരി

നെതന്യാഹുവിന്റെ എതിര്‍ ചേരിയിൽ ആയിരിക്കെ തന്നെ പല പാര്‍ടികളും തീവ്ര നിലപാടുകളിൽ മത്സരിക്കുന്നവയാണ്. വലതുപക്ഷ വിഭാഗീയ പ്രചാരണങ്ങൾ വഴി ജനങ്ങൾ വിഭജിക്കപ്പെട്ടതോടെ ഇതേ മാനസികാവസ്ഥ വളര്‍ത്തുന്നതിൽ മത്സരിക്കുന്ന സാഹചര്യമാണ്.

• യാഷാർ! (Yashar!): നെതന്യാഹുവിന്റെ പ്രധാന എതിരാളിയും മുൻ മിലിട്ടറി ചീഫുമായ ഗാഡി ഐസൻകോട്ട് നയിക്കുന്ന പുതിയ സെന്ററിസ്റ്റ് പാർട്ടി. ഗാസയിൽ വെച്ച് ഇദ്ദേഹത്തിന്റെ മകൻ കൊല്ലപ്പെട്ടിരുന്നു. സൈനിക സേവനത്തിൽ തുല്യത, ജീവിതച്ചെലവ് കുറയ്ക്കൽ, ഒക്ടോബർ 7-ലെ വീഴ്ചകളെക്കുറിച്ചുള്ള അന്വേഷണം എന്നിവയാണ് പ്രധാന പ്രചാരണ വിഷയങ്ങളാക്കുന്നത്.
  

• ബെയാചാദ് (Beyachad): മുൻ പ്രധാനമന്ത്രി നഫ്താലി ബെന്നറ്റും യായീർ ലാപിഡും ചേർന്ന സഖ്യം. ലാപിഡിന്റെ 'യേഷ് അതിദ്' മുൻ തിരഞ്ഞെടുപ്പിൽ 24 സീറ്റുകൾ നേടി വലിയ പ്രതിപക്ഷ പാർട്ടിയായിരുന്നു.

• ദി ഡെമോക്രാറ്റ്‌സ് (The Democrats): ഇടതുപക്ഷ പാർട്ടികളായ ലേബർ, മെറെറ്റ്സ് എന്നിവ ലയിച്ച് യായീർ ഗോലന്റെ നേതൃത്വത്തിൽ രൂപീകരിച്ച പാർട്ടി. ഇവർ അറബ് പാർട്ടികളെയും ജനാധിപത്യപരമായി സഖ്യത്തിൽ ഉൾപ്പെടുത്തണമെന്ന നിലപാട് അവതരിപ്പിക്കുന്നു.
  

• യിസ്രായേൽ ബെയ്തേനു (Yisrael Beyteinu): അവിഗ്ദോർ ലീബർമാൻ നയിക്കുന്ന പാർട്ടി. മുൻപ് നെതന്യാഹുവുമായി സഖ്യത്തിലായിരുന്നെങ്കിലും ഇനി അദ്ദേഹത്തോടൊപ്പം ചേരില്ലെന്ന നിലപാടിലാണ് ലീബർമാൻ.
  

• റിസർവിസ്റ്റ്സ്-ഇക്കണോമിക് പാർട്ടി: യൊആസ് ഹെൻഡൽ നയിക്കുന്ന കേന്ദ്ര-വലതുപക്ഷ പാർട്ടി. സൈനിക ഇളവുകൾ നിർലാഭമാക്കുന്നതിലും സാമ്പത്തിക പരിഷ്കാരങ്ങളിലും ഊന്നൽ നൽകുന്ന ഇവർ, നെതന്യാഹുവും ഐസൻകോട്ടും ചേർന്നുള്ള ഐക്യ സർക്കാരാണ് ലക്ഷ്യമിടുന്നത്.
  

അറബ് പാർട്ടികളുടെ പങ്ക്

ഇസ്രായേൽ ജനസംഖ്യയുടെ 20% വരുന്നത് പാലസ്തീൻ പൗരന്മാരാണെങ്കിലും കുറഞ്ഞ വോട്ടിങ് ശതമാനമാണ് ഇവിടെയുള്ളത്.

• റാം (Ra'am): മൻസൂർ അബ്ബാസ് നയിക്കുന്ന മിതവാദി ഇസ്ലാമിക് പാർട്ടി. 2021-ൽ ഭരണസഖ്യത്തിന്റെ ഭാഗമായ ആദ്യ അറബ് പാർട്ടിയാണിത്.
  

• ജോയിന്റ് ലിസ്റ്റ് (Joint List): തആൽ (Ta'al), ഹദാഷ് (Hadash), ബലാദ് (Balad) എന്നീ പാർട്ടികൾ ചേർന്ന മുന്നണി. ഗാസ യുദ്ധത്തെയും അധിനിവേശത്തെയും ശക്തമായി എതിർക്കുന്നു.