നിയന്ത്രണംവിട്ട കാർ ഡിവൈഡറിലിടിച്ചു; മൂന്ന് വയസ്സുള്ള പെൺകുട്ടി ഉൾപ്പെടെ മൂന്ന് പേർക്ക് ദാരുണാന്ത്യം

ലക്നൗ: കാർ ഡിവൈഡറിലിടിച്ച് മൂന്ന് വയസ്സുള്ള പെൺകുട്ടി ഉൾപ്പെടെ മൂന്ന് പേർ മരിച്ചു. 13 പേരുമായി സഞ്ചരിച്ച എസ്‌യുവി നിയന്ത്രണം വിട്ട് റോഡിലെ ഡിവൈഡറിലിടിക്കുകയായിരുന്നുവെന്ന് പൊലീസ് അറിയിച്ചു. സുശാന്ത് ഗോൾഫ് സിറ്റി പൊലീസ് സ്റ്റേഷൻ പരിധിയിൽ ലക്നൗ-സുൽത്താൻപുർ റെയിൽവേ ലൈനിന് മുകളിലുള്ള റെയിൽവേ പാലത്തിൽ തിങ്കളാഴ്ച വൈകിട്ട് 3.30ഓടെ ആയിരുന്നു അപകടം.

സന്തോഷ് എന്നോ സാന്തു, രാംദുലാരി, മൂന്ന് വയസ്സുള്ള ഒരു പെൺകുട്ടി എന്നിവരാണ് അപകടത്തിൽ മരിച്ചത്. ഉന്നാവോ ജില്ലക്കാരായ ഇവർ, ബരാബങ്കിയിലെ അവ്താനേശ്വർ മഹാദേവ് ക്ഷേത്രത്തിലേക്ക് ഒരു ചടങ്ങിനായി പോവുകയായിരുന്നു. വാഹനത്തിൽ നാല് കുട്ടികൾ ഉൾപ്പെടെ ആകെ 13 പേരാണ് ഉണ്ടായിരുന്നത്.

അപകടത്തിൽ 10 പേർക്ക് പരിക്കേറ്റു. ഇവരെ ലക്നൗവിലെ രണ്ട് ആശുപത്രികളിലായി പ്രവേശിപ്പിച്ചു. പരിക്കേറ്റവരുടെ നില തൃപ്തികരമാണെന്ന് പൊലീസ് അറിയിച്ചു. അപകടത്തിൽ പരിക്കേറ്റവർക്ക് മികച്ച ചികിത്സ ഉറപ്പാക്കാൻ ഡോക്ടർമാർക്ക് നിർദേശം നൽകിയിട്ടുണ്ട്.

ഡെപ്യൂട്ടി കമ്മീഷണർ ഓഫ് പോലീസ് (സൗത്ത്) മുഹമ്മദ് മുഷ്താഖ് ഉൾപ്പെടെയുള്ള മുതിർന്ന ഉദ്യോഗസ്ഥർ സംഭവസ്ഥലവും ആശുപത്രികളും സന്ദർശിച്ച് സ്ഥിതിഗതികൾ വിലയിരുത്തി. മരിച്ചവരുടെ കുടുംബാംഗങ്ങളെ വിവരം അറിയിച്ചിട്ടുണ്ടെന്നും തുടർനടപടികൾ സ്വീകരിച്ചുവരികയാണെന്നും പൊലീസ് വ്യക്തമാക്കി. സംഭവത്തിൽ പൊലീസ് കേസെടുത്തിട്ടുണ്ട്.