യൂത്ത്​ കോൺഗ്രസിന്റെ ഫണ്ട്​ വെട്ടിപ്പ് ; കൂടുതൽ പറയിപ്പിക്കരുതെന്ന്​ 
ഡിസിസി ജനറൽ സെക്രട്ടറി

കണ്ണൂർ

യൂത്ത്​ കോൺഗ്രസിന്റെ മുണ്ടക്കൈ ഫണ്ട്​ വെട്ടിപ്പിനെക്കുറിച്ച്​ കൂടുതൽ പറയിപ്പിക്കരുതെന്ന വെല്ലുവിളിയുമായി ഡിസിസി ജനറൽ സെക്രട്ടറി. കർഷക കോൺഗ്രസ്​ മുൻ സംസ്ഥാന പ്രസിഡന്റും കണ്ണൂർ ഡിസിസി ജനറൽ സെക്രട്ടറിയുമായ കെ സി വിജയനാണ്​ ഒ‍ൗദ്യോഗിക വാട്സാപ്​ ഗ്രൂപ്പിൽ യൂത്ത്​ കോൺഗ്രസ്​ ജില്ലാ പ്രസിഡന്റിനെ വെല്ലുവിളിച്ചത്​. വാട്​സാപ്പിലെ ശബ്‌ദ സന്ദേശം പുറത്തായതോടെ ഫണ്ട്​ വെട്ടിപ്പിനെക്കുറിച്ച്​ കോൺഗ്രസ്​ നേതാക്കൾക്കും ധാരണയുണ്ടെന്ന്‌​ വ്യക്തമായി​.

കോൺഗ്രസ്​ ശ്രീകണ്​ഠപുരം ബ്ലോക്ക്​ ലീഡേഴ്​സ്​ എന്ന വാട്​സാപ്​ ഗ്രൂപ്പിൽനിന്നുള്ള ചാറ്റാണ്​ ചോർന്നത്​. യൂത്ത്​ കോൺഗ്രസ്​ ജില്ലാ പ്രസിഡന്റ്​ വിജിൽ മോഹനനും ഡിസിസി ജനറൽ സെക്രട്ടറി കെ സി വിജയനും തമ്മിലുള്ളതായിരുന്നു ചാറ്റ്‌.

നേതാക്കളുടെ പ്രവർത്തനം സംബന്ധിച്ച ചർച്ചയ്​ക്കിടെ വിജിൽ മോഹനൻ വ്യക്തിപരമായ പരാമർശം നടത്തിയതോടെയാണ്​ കെ സി വിജയൻ പ്രകോപിതനായത്​. ഇതോടെ യൂത്ത്​ കോൺഗ്രസ്​ സംസ്ഥാന പ്രസിഡന്റ്​ രാഹുൽ മാങ്കൂട്ടത്തിലിനെ രൂക്ഷമായി വിമർശിച്ച്‌ കെ സി വിജയൻ ഓഡിയോ സന്ദേശമയച്ചു​.

‘കള്ളവോട്ട്​ വാങ്ങിയും​ വ്യാജ ഐഡന്റിറ്റി കാർഡുണ്ടാക്കിയുമാണ്​ വിജിൽ യൂത്ത്​ കോൺഗ്രസ്​ ജില്ലാ പ്രസിഡന്റായത്​. അതിന്റെ മുകളിലുള്ളവനും അങ്ങനെത്തന്നെ. തട്ടിപ്പുനടത്തി ജീവിക്കുന്നവർക്ക്​ എന്ത്‌ മാന്യത. വയനാട്ടിലേക്ക്​ ഇവിടെനിന്ന്​ എത്ര പണം പിരിച്ചുവെന്ന്​ എനിക്ക്​ നന്നായി അറിയാം.

അവിടെ എത്ര കൊടുത്തുവെന്നും. ബാക്കി കാര്യം എന്നെക്കൊണ്ട്​ പറയിപ്പിക്കരുത്​.’ ഇതാണ്​ ഓഡിയോ ക്ലിപ്. ഏരുവേശി പഞ്ചായത്തിലെ കോൺഗ്രസ്​ സംഘടനാ കാര്യങ്ങൾ കഴിഞ്ഞദിവസം യോഗംചേർന്ന്​ ചർച്ചചെയ്​തിരുന്നു. ഇതിന്റെ തുടർച്ചയാണ്​ വാട്​സാപ്​ ഗ്രൂപ്പിൽ വന്നത്​.

ജില്ലയിൽ ഇരിക്കൂർ, പയ്യന്നൂർ ​ ബ്ലോക്കുകളെ യൂത്ത്​ കോൺഗ്രസ്​ സംസ്ഥാന കമ്മിറ്റിക്ക്​ ഫണ്ട്​ കൈമാറിയുള്ളൂ. രണ്ടരലക്ഷമാണ്​ ഒരു ബ്ലോക്ക്കമ്മിറ്റി സംസ്ഥാന കമ്മിറ്റിക്ക്​ കൈമാറേണ്ടത്​. എന്നാൽ, ഇതിലുംകൂടുതൽ പിരിച്ചിരുന്നുവെന്നാണ്​ വിജയന്റെ വാക്കുകളിൽനിന്ന്​ വ്യക്തമാകുന്നത്​. മറ്റ്​ ബ്ലോക്ക്​ കമ്മിറ്റികളും പണം പിരിച്ചതായി സൂചനയുണ്ട്.

കഴിഞ്ഞദിവസം കണ്ണൂരിൽ നടന്ന ക്യാമ്പിൽ ഇതുസംബന്ധിച്ച്​ വിമർശനമുയർന്നിരുന്നു. തട്ടിപ്പ്​ വിവാദം നാണക്കേടുണ്ടാക്കിയെന്നാണ്​ രാഹുൽ മാങ്കൂട്ടത്തിലിനെ ഇരുത്തി വിമർശനമുയർന്നത്​.