നെയ്യാറ്റിൻകരയിൽ ഭാര്യയെ ഭർത്താവ് കുത്തികൊന്നു ‌

നെയ്യാറ്റിൻകര: ഭാര്യയെ ഭർത്താവ് കുത്തികൊലപ്പെടുത്തി. നെയ്യാറ്റിൻകര വ്ളത്താങ്കരയിലാണ് അരുംകൊല നടന്നത്. വ്‌ളാത്താങ്കര ആർസി ചർച്ചിൽ സമീപം താമസിക്കുന്ന വിഷ്ണു (36) ആണ് ഭാര്യ അൽമയെ (33) കൊലപ്പെടുത്തിയത്. ഇന്ന് രാവിലെ 9 മണിയോടുകൂടിയാണ് കൊലപാതകം നട‌ന്നത്. സംഭവത്തിൽ പ്രതിയെ പൊലീസ് കസ്റ്റഡിയിലെടുത്തു. ഒമ്പത് വർഷം മുൻപാണ് ഇരുവരും വിവാഹിതരായത്. കൊലപാതകത്തിലേയ്ക്ക് നയിച്ചതിന്റെ കാരണം വ്യക്തമായിട്ടില്ല.

കുടുംബ വഴക്കാണ് അരുംകൊലയിൽ കലാശിച്ചതെന്നാണ് പ്രാഥമിക നി​ഗമനം. ഇരുവരും തനിച്ചാണ് താമസം. മക്കളില്ല. പി എസ് സി ട്രെയിനിങ് സെന്ററിലെ അധ്യാപകൻ കൂടിയാണ് പ്രതി വിഷ്ണു. സംഭവ സമയം വീട്ടിൽ മറ്റാരും ഉണ്ടായിരുന്നില്ല. കൊലപാതകശേഷം വിഷ്ണു സമീപത്തെ വീട്ടിലെത്തി കൊലപാതക വിവരം അറിയിക്കുകയായിരുന്നു. ഉടൻ പൊലീസ് സ്ഥലത്തെത്തി വിഷ്ണുവിനെ കസ്റ്റഡിയിലെടുക്കുകയായിരുന്നു.