നിയമത്തിൽ തന്നെ കേന്ദ്ര സർക്കാർ മാറ്റം വരുത്തി; തൊഴിലുറപ്പ് പദ്ധതി പൊളിയാൻ പോവുകയാണ്- ടിപി രാമകൃഷ്ണൻ

തിരുവനന്തപുരം: ഒന്നാം യുപിഎ സർക്കാരിന്റെ സമയത്ത് ദാരിദ്ര ലഘൂകരണം ലക്ഷ്യമിട്ട് നടപ്പിലാക്കിയ തൊഴിലുറപ്പ് പദ്ധതി നിയമത്തിൽ തന്നെ കേന്ദ്ര സർക്കാർ മാറ്റം വരുത്തിയതായി എൽഡിഎഫ് കൺവീനർ ടിപി രാമകൃഷ്ണൻ. തൊഴിലുറപ്പ് പദ്ധതിക്ക് വരുന്ന ചെലവ് പൂർണമായും കേന്ദ്ര സർക്കാരാണ് വഹിച്ചിരുന്നത്. ഭേദ​ഗതി വരുത്തിയ പുതിയ നിയമം വരുന്നതോടെ അറുപത് ശതമാനം കേന്ദ്രവും 40 ശതമാനം കേരളവും വഹിക്കണം.

യഥാർഥത്തിൽ ഈ പദ്ധതി പൊളിയാൻ പോവുകയാണ്. ലക്ഷക്കണക്കിന് പേരാണ് തൊഴിലുറപ്പിനെ ആശ്രയിക്കുന്നത്. ഒരു വർഷത്തിൽ 200 ദിവസം ജോലി, 600 രൂപ ദിവസ വേതനം എന്നിവയാണ് തൊഴിലാളികളുടെ ആവശ്യം. എന്നാൽ ഇവ നടപ്പിലാകില്ല. പുതിയ നിയമം റദ്ദാക്കണമെന്ന് രാജ്യവ്യാപകമായി തൊഴിലാളികൾ ആവശ്യപ്പെട്ടിട്ടുണ്ടെന്നും കൺവീനർ വ്യക്തമാക്കി.