print edition ഉരുക്കോളം പോന്ന ഉറപ്പ്‌

തളിപ്പറമ്പ്​: കാലപ്പഴക്കത്താൽ ചിതലരിച്ച മേൽക്കൂരയ്ക്ക് കീഴെ ഭയാശങ്കകളോടെ ഉണ്ടുറങ്ങിയ കാലം കൊയിലേരിയൻ പുഷ്പയുടെ മനസ്സിൽ ഇപ്പഴുമുണ്ട്. 15 വർഷത്തിലേറെ പഴക്കമുള്ള വീട്ടിൽ മഴയും കാറ്റും പേടിച്ചു കഴിഞ്ഞ ആ നാളുകൾക്കാണ്‌ ഇന്ന്‌ അവസാനമായത്‌. സന്തോഷത്തിന്റെ വികസനവെളിച്ചം നിറച്ച ഉരുക്കോളം പോന്ന ഉറപ്പാണ് പുഷ്പക്ക്‌ എൽഡിഎഫ് സർക്കാർ. ഒരു കോടി രൂപ ചെലവഴിച്ച്‌ പുതുക്കിപ്പണിത തളിപ്പറമ്പിലെ നെല്ലിപ്പറമ്പ്​ അംബേദ്​കർ ഗ്രാമം ഇന്ന്‌ മറ്റൊരു കേരള മോഡലാണ്‌.

അവഗണനയിലും തീരാദുരിതത്തിലും വലഞ്ഞ്‌ തീർത്തും ഒറ്റപ്പെട്ടൊരു കാലമുണ്ടായിരുന്നു നെല്ലിപ്പറന്പ്‌ ഉന്നതിക്ക്‌. എന്നാൽ, ഇന്ന്‌ മാറിയ കേരളത്തിന്റെ മുഖമാണ്‌ ഇവിടുത്തെ കൊടിയടയാളം. അംബേദ്​കർ ഗ്രാമം പദ്ധതിയുടെ ഭാഗമായി ഉന്നതിയിലേക്കുള്ള റോഡ്‌ റീടാറിങ്​ നടത്തി. റോഡ്‌ കോൺക്രീറ്റ്‌ ചെയ്‌ത്‌ വശങ്ങൾകെട്ടി സംരക്ഷണഭിത്തി നിർമിച്ചു. ആറ്‌ നടപ്പാതകൾ ഇന്റർലോക്ക്​ വിരിച്ചും കോൺക്രീറ്റ്​ചെയ്​തും നവീകരിച്ചു. വൈദ്യുതീകരിച്ചു. സോളാർ തെരുവുവിളക്കുകൾ സ്ഥാപിച്ചു. ഓവു ചാലുകളുമൊരുക്കി. പുന്നത്തിരിയൻ മനോജിന്റേത്‌ ഉൾപ്പടെയുള്ള വീടുകളുടെ നിലം, ചുമര്, ജനലുകൾ, വാതിലുകൾ, മേൽക്കൂര തുടങ്ങിയവയെല്ലാം പുതുക്കിപ്പണിതു. പെയിന്റിങ്ങടക്കം നടത്തി. ആകെ 36 വീടാണ് ഉന്നതിയിലുള്ളത്. ഉന്നതികളുടെ സമഗ്ര വികസനത്തിന് എൽഡിഎഫ്​ സർക്കാർ നടപ്പാക്കിയ പദ്ധതിയാണ് അംബേദ്​കർ ഗ്രാമം.