മണി നല്ലശിങ്കയുടെ മാണിക്യം

മലപ്പുറം: സീനിയർ സിവിൽ പൊലീസ്‌ ഓഫീസറുടെ കുപ്പായം അണിഞ്ഞുനിൽക്കുമ്പോൾ എം മണിയുടെ മുഖത്ത്‌ അഭിമാനത്തിളക്കം. കഷ്ടപ്പാടുകൾ നിറഞ്ഞ ബാല്യവും ക‍ൗമാരവും ആ മനസ്സിലൂടെ പലവട്ടം കടന്നുപോയി. മണിയെ ചേർത്തുപിടിക്കുമ്പോൾ അമ്മ ശിവയുടെയും അച്ഛമ്മ കാളിയമ്മയുടെയും കണ്ണുകൾ നിറഞ്ഞു. പാലക്കാട്‌ അട്ടപ്പാടി ഷോളയൂരിലെ നല്ലശിങ്ക ഉന്നതിയിൽനിന്നുമാണ്‌ മണിയുടെ വരവ്‌. ഒമ്പതുമാസത്തെ പരിശീലനം പൂർത്തിയാക്കി അവൻ കാക്കിക്കുപ്പായം അണിയുന്നത്‌ കാണാൻ അമ്മയും സഹോദരിമാരും അടക്കം നല്ലശിങ്ക ഉന്നതിയിൽനിന്ന്‌ 28 പേരാണ്‌ എത്തിയത്‌. മറ്റു സുഹൃത്തുക്കളും മലപ്പുറം എംഎസ്‌പി പരേഡ്‌ ഗ്ര‍ൗണ്ടിലെത്തിയിരുന്നു.

പാലക്കാട്‌ വിക്‌ടോറിയ കോളേജിൽനിന്ന്‌ ബിഎസ്‌സി മാത്‌സിൽ ബിരുദ പഠനം പൂർത്തിയാക്കി. 2010 മുതൽ പിഎസ്‌സി പരീക്ഷകൾ എഴുതുന്നുണ്ടെങ്കിലും ഇപ്പോഴാണ്‌ സർക്കാർ ജോലി എന്ന സ്വപ്‌നം പൂവണിഞ്ഞത്. മുപ്പത്തിയേഴുവയസ്സിനിടെ പല തരത്തിലുള്ള ജീവിതമാർഗങ്ങൾ തേടി. കരിങ്കൽ പണിക്കാരനായും കെട്ടിടനിർമാണ തൊഴിലാളിയായും തൊഴിലുറപ്പ്‌ തൊഴിലാളിയായുമെല്ലാം കഷ്ടപ്പാടുകൾ ഏറെ അനുഭവിച്ചു. അപകടത്തിൽ പരിക്കേറ്റ്‌ മാസങ്ങളോളം കിടപ്പിലായെങ്കിലും സ്വപ്‌നങ്ങളിൽനിന്ന്‌ പിന്തിരിയാൻ അവൻ തയ്യാറായിരുന്നില്ല. നിലവിൽ പെയിന്റിങ്‌ ജോലികൾ ചെയ്‌തുവരുന്നതിനിടെയാണ്‌ പൊലീസിലെ നിയമനം തേടിയെത്തിയത്‌. അതും സീനിയർ സിപിഒ തസ്‌തികയിലേക്ക്‌.

കേരള പൊലീസിന്റെ ഭാഗമാകാൻ കഴിഞ്ഞതിൽ ഏറെ സന്തോഷവും അഭിമാനവുമുണ്ടെന്ന്‌ കൂട്ടുകാർ ‘ഒബാമ’ എന്ന ഓമനപ്പേരുവിളിക്കുന്ന മണി പറഞ്ഞു. മണി കാക്കിക്കുപ്പായം അണിഞ്ഞുനിൽക്കുന്പോൾ അട്ടപ്പാടിയിലെ നല്ലശിങ്ക ഉന്നതിക്ക്‌ മാത്രമല്ല, അത്‌ കേരള ജനതയ്‌ക്ക്‌ ആകെ അഭിമാനനിമിഷം.