വിദ്യാലയങ്ങൾ ശാന്തമായ അന്തരീക്ഷത്തിൽ പോകണം: മന്ത്രി വി ശിവൻകുട്ടി

തിരുവനന്തപുരം : പള്ളുരുത്തി സെന്റ് റീത്താസ്‌ സ്‌കൂളിലെ ശിരോവസ്ത്ര വിലക്കിൽ സ്‌കൂൾതലത്തിൽ സമവായം ഉണ്ടായിട്ടുണ്ടെങ്കിൽ നല്ലതാണെന്ന്‌ മന്ത്രി വി ശിവൻകുട്ടി പറഞ്ഞു. എല്ലാ വിദ്യാലയങ്ങളും ശാന്തമായ അന്തരീക്ഷത്തിൽ പോകണം. ജാതിയുടെയോ മതത്തിന്റെയോ വസ്‌ത്രത്തിന്റെയോ ഭക്ഷണത്തിന്റെയോ പേരിൽ സംഘർഷം പാടില്ല

ഭരണഘടന വിഭാവനം ചെയ്യുന്ന അവകാശങ്ങളും കോടതിവിധികളും മുൻനിർത്തിയാണ് പ്രവർത്തിക്കേണ്ടതെന്നും മന്ത്രി വാർത്താസമ്മേളനത്തിൽ പറഞ്ഞു. കുട്ടിയുടെ പഠിക്കാനുള്ള അവകാശം എന്തിന്റെ പേരിലും നിഷേധിക്കാൻ ആർക്കും അവകാശമില്ല. അതിനാലാണ്‌ സർക്കാർ വിഷയത്തിൽ ഇടപെട്ടത്‌. ശിരോവസ്ത്രം ധരിച്ചതിനാൽ കുട്ടിയെ ക്ലാസിൽ ഇരുത്തിയില്ല എന്ന സംഭവം വിദ്യാഭ്യാസ ഉപഡയറക്ടർ അന്വേഷിക്കുകയും സ്കൂൾ അധികൃതരുടെ തീരുമാനം ചട്ടവിരുദ്ധമാണെന്ന്‌ റിപ്പോർട്ട് നൽകുകയും ചെയ്തു. മാനേജ്‌മെന്റിന്റെ വിശദീകരണം ആവശ്യപ്പെട്ടിട്ടുണ്ട്.ഇത്തരം സംഭവങ്ങളുടെ പേരിൽ വർഗീയ വേർതിരിവിന്‌ ചില വിഭാഗങ്ങൾ ശ്രമിക്കുന്നു.

വിദ്യാഭ്യാസരംഗത്തെ വ്യവസ്ഥകളും നിയമങ്ങളും ഏതെങ്കിലും ഒരു വിഭാഗത്തിന്‌ മാത്രം ഇളവ്‌ ചെയ്യാനാകില്ല. വിഷയത്തിൽ കോടതിയെ സമീപിക്കാൻ സ്‌കൂൾ മാനേജ്‌മെന്റിന്‌ അവകാശമുണ്ടെന്നും മാധ്യമങ്ങളുടെ ചോദ്യത്തിന്‌ മറുപടിയായി മന്ത്രി പറഞ്ഞു.