'എല്ലാം ഉത്തരവാദിത്തപ്പെട്ടവർ നോക്കും, കൂടിയാലോചിച്ചാണ് മുന്നോട്ടുപോകുന്നത്; മന്ത്രി റോജി എം ജോൺ

തിരുവനന്തപുരം: യുഡിഎഫ് കൺവീനർ അടൂർ പ്രകാശിനെതിരെ ഉന്നത വിദ്യാഭ്യാസ മന്ത്രി റോജി എം ജോൺ. പാർട്ടിയിലെ കാര്യങ്ങൾ മുഖ്യമന്ത്രിയും നേതൃത്വവുമുൾപ്പെട്ട ഉത്തരവാദിത്തപ്പെട്ടവർ നോക്കിക്കൊള്ളുമെന്നും മുന്നണിയിൽ കൂടിയാലോചിച്ച് തന്നെയാണ് മുന്നോട്ടുപോകുന്നതെന്നും റോജി എം ജോൺ പറഞ്ഞു. ചാനലുകാർ ആവശ്യപ്പെടുന്നതുപോലെ പ്രതികരിക്കാൻ മുഖ്യമന്ത്രിക്കാവില്ലെന്നും എല്ലാം നേതൃത്വം പറയുമെന്നും മന്ത്രി പറഞ്ഞു.

കഴിഞ്ഞ ദിവസമാണ് മുഖ്യമന്ത്രി വി ഡി സതീശനെതിരെ അതൃപ്തി പരസ്യമാക്കി യുഡിഎഫ് കൺവീനർ അടൂർ പ്രകാശ് രം​ഗത്തെത്തിയത്. മാധ്യമങ്ങളിലൂടെയാണ് പല സുപ്രധാന വിവരങ്ങളും അറിയുന്നത്. അത് ദുഖകരമാണ്. യുഡിഎഫുമായി കൂടിയാലോചനകൾ നടക്കാതെയാണ് മുഖ്യമന്ത്രി പല തീരുമാനങ്ങളെടുക്കുന്നതെന്നും അടൂർ പ്രകാശ് തുറന്നുപറഞ്ഞു. കെപിസിസി ആസ്ഥാനത്ത് വിളിച്ചു ചേർത്ത വാർത്താ സമ്മേളനത്തിലായിരുന്നു അടൂർ പ്രകാശിന്റെ പ്രതികരണം.

ബോർഡ്, കോർപറേഷൻ നിയമനങ്ങൾ ചർച്ച ചെയ്യാതെയാണ് നടപ്പിലാക്കിയത്. മുന്നണിയെ അറിയിക്കാതെ തീരുമാനങ്ങൾ എടുക്കുന്നത് ദുഃഖകരമാണെന്നും അദ്ദേഹം തുറന്നടിച്ചു. യുഡിഎഫ് കൺവീനർ എന്ന നിലയിൽ തന്നോട് ആലോചിക്കാതെയാണ് സംസ്ഥാനത്ത് പല കാര്യങ്ങളും നടക്കുന്നത്. വൈദ്യുതി പ്രതിസന്ധിയിൽ യുഡിഎഫ് സർക്കാർ ഫലപ്രദമായി ഇടപെടാത്തതിലും അടൂർ പ്രകാശ് കടുത്ത വിമർശനം ഉന്നയിച്ചു. വിമാന യാത്ര സംബന്ധിച്ച നിജസ്ഥിതി മുഖ്യമന്ത്രി ജനങ്ങളെ ബോധ്യപ്പെടുത്തണം. തെറ്റ് പറ്റിയിട്ടുണ്ടെങ്കിൽ അത് പറയണം. അതിന് അദ്ദേഹം ബാധ്യസ്ഥനാണെന്നും അടൂർ പ്രകാശ് കൂട്ടിച്ചേർത്തു.

ഉപതെരഞ്ഞെടുപ്പിൽ വേണ്ടത്ര സംഘാടനമുണ്ടായില്ലെന്നും, കൺവീനർ എന്ന നിലയിൽ വിവിധ ജില്ലകളിൽ പോയത് ആരുടെയും നിർദ്ദേശപ്രകാരമല്ലെന്നും അദ്ദേഹം വ്യക്തമാക്കി. ചിറയിൻകീഴിൽ രമ്യ ഹരിദാസുമായി ബന്ധപ്പെട്ട വിഷയങ്ങൾ കൈകാര്യം ചെയ്യുന്നതിൽ വീഴ്ചയുണ്ടായി. സംസ്ഥാന കമ്മിറ്റി ചേർന്നിട്ട് നാലുമാസമായെന്നും, മുന്നണിയുടെ കാര്യങ്ങളിൽ വി ഡി സതീശന്റെ നിർദ്ദേശപ്രകാരം പ്രവർത്തിക്കേണ്ട കൺവീനർക്ക് അത്തരത്തിലുള്ള ഒരു നിർദ്ദേശവും ഇതുവരെ ലഭിച്ചിട്ടില്ലെന്നും അടൂർ പ്രകാശ് കുറ്റപ്പെടുത്തി. ഈ അഭിപ്രായഭിന്നതകളും കാര്യങ്ങളും ജനങ്ങൾ അറിയേണ്ടതുണ്ട്. അതിനാലാണ് എല്ലാം തുറന്നുപറയുന്നത്. ഇക്കാര്യങ്ങൾ എഐസിസി നേതൃത്വത്തെ ഔദ്യോഗികമായി അറിയിക്കുമെന്നും അദ്ദേഹം കൂട്ടിച്ചേർത്തു.