ഓണാഘോഷ പരിപാടിക്കിടെ പൊലീസ് ഉദ്യോഗസ്ഥർ തമ്മിലടിച്ചു

തിരുവനന്തപുരം : തലസ്ഥാനത്ത് ഓണാഘോഷ പരിപാടിക്കിടെ പൊലീസ് ഉദ്യോഗസ്ഥർ തമ്മിലടിച്ചു. പൂജപ്പുര ജയിൽവളപ്പിൽ ഓണാഘോഷത്തിന്റെ ഭാ​ഗമായി നടന്ന ഡിജെ പാർടിക്കിടെയായിരുന്നു സംഭവം. ശനി രാത്രിയായിരുന്നു സംഭവം. കയ്യാങ്കളിയിൽ ഒരു പൊലീസ് ഉ​ദ്യോ​ഗസ്ഥന്റെ കണ്ണിന് പരിക്കേറ്റു.

ജയിൽ സബോർഡിനേറ്റ് ഓഫീസേഴ്സ് അസോസിയഷൻ എന്ന സംഘടനയുടെ നേതൃത്വത്തിലായിരുന്നു ഓണാഘോഷം. പൂജപ്പുര ജയിലിന് സമീപമുള്ള ഓപ്പൺ എയർ‌ ഓഡിറ്റോറിയത്തിലായിരുന്നു ഡിജെയടക്കമുള്ള പരിപാടികൾ. ഇതിനിടെ ഉദ്യോ​ഗസ്ഥർ തമ്മിൽ തർക്കമുണ്ടായി കയ്യാങ്കളിയിലെത്തുകയായിരുന്നു.

സ്ഥലംമാറ്റവുമായി ബന്ധപ്പെട്ടുണ്ടായ സംസാരമാണ് തർക്കത്തിലേക്കും പിന്നീട് കയ്യാങ്കളിയിലേക്കും എത്തിയതെന്ന് വിവരമുണ്ട്. ആറ്റിങ്ങൽ സബ് ജയിലിലെ ഉദ്യോ​ഗസ്ഥന്റെ കണ്ണിനാണ് പരിക്കേറ്റതെന്നാണ് വിവരം. എന്നാൽ ജയിൽ അധികൃതർ വിവരം റിപ്പോർട്ട് ചെയ്തിട്ടില്ല.