ലഹരി പരിശോധനയ്ക്കിടെ പൊലീസിന്‌ മർദനം ; യൂത്ത് ലീഗ് സംസ്ഥാന ജനറൽ സെക്രട്ടറിയുടെ 
സഹോദരൻ റിമാൻഡിൽ

കുന്നമംഗലം

ലഹരി പരിശോധനക്കിടെ പൊലീസിനെ ആക്രമിച്ച കേസിൽ യൂത്ത് ലീഗ് സംസ്ഥാന ജനറൽ സെക്രട്ടറി പി കെ ഫിറോസിന്റെ സഹോദരൻ പി കെ ബുജൈർ (35) റിമാൻഡിൽ. കുന്നമംഗലം കോടതിയാണ്​ റിമാൻഡ് ചെയ്തത്. പതിമംഗലം സ്വദേശിയായ ബുജൈർ ലഹരി ഇടപാട്‌ നടത്താൻ ശനി വൈകിട്ട്​ കോഴിക്കോട്‌ ചൂലാംവയൽ ബസ്​ സ്​റ്റോപ്പിനുമുന്നിൽ എത്തുമെന്ന രഹസ്യവിവരത്തിന്റെ അടിസ്ഥാനത്തിൽ പൊലീസ്​ പരിശോധന നടത്തുന്നതിനിടെയാണ് സംഭവം.

വാഹനമുൾപ്പെടെ പരിശോധിക്കണമെന്ന്​ പറഞ്ഞപ്പോൾ ബുജൈർ പൊലീസുകാരെ തള്ളുകയും മുഖത്തും നെഞ്ചിലും ഇടിക്കുകയും ചെയ്​തു. ​കുന്ദമംഗലം പൊലീസ്​ സ്​റ്റേഷനിലെ എസ്​സിപിഒ അജീഷിന്​ പരിക്കേറ്റു. രാത്രി ഒമ്പതോടെ പൊലീസ്‌ ഇയാളുടെ അറസ്​റ്റ്​ രേഖപ്പെടുത്തി​. ജാമ്യമില്ലാ വകുപ്പുപ്രകാരമാണ്‌ കേസ്‌.

ബുജൈറിന്റെ ബൈക്കിൽനിന്ന്​ ലഹരി പദാർഥങ്ങൾ പൊതിയാനുള്ള പേപ്പറും മറ്റ്‌ ഉപകരണങ്ങളും കണ്ടെടുത്തു​. ലഹരിമരുന്ന്​ കേസിൽ കഴിഞ്ഞദിവസം ചൂലാംവയലിൽ പിടിയിലായ ആമ്പ്രമ്മൽ റിയാസിന്റെ വാട്സാപ്​ ചാറ്റുകളി​ൽ ​ബുജൈറുമായിചേർന്നുള്ള​​ ലഹരി ഇടപാടുകളുടെ വിവരങ്ങളുണ്ട്‌.

ഫിറോസിനെ 
തിരിഞ്ഞുകുത്തി ‘പോസ്റ്റുകൾ’

ലഹരിക്കേസ്​ അന്വേഷിക്കാനെത്തിയ പൊലീസുദ്യോഗസ്ഥരെ ആക്രമിച്ച സംഭവത്തിൽ സഹോദരൻ അറസ്റ്റിലായതോടെ യൂത്ത്​ലീഗ്​ സംസ്ഥാന ജനറൽ സെക്രട്ടറിയെ തിരിഞ്ഞുകുത്തി സ്വന്തം സോഷ്യൽമീഡിയ പോസ്റ്റുകളും. ഫിറോസും അറസ്റ്റിലായ സഹോദരൻ ബുജൈറും നേരത്തെ ലഹരി വിഷയത്തിൽ ഫേസ്​ബുക്കിലിട്ട പോസ്റ്റുകളാണ്​ സമൂഹമാധ്യമങ്ങളിൽ ഇപ്പോൾ നിറയുന്നത്​. ബുജൈറിന്റെ മിക്ക ഫേസ്​ബുക്ക്​ പോസ്റ്റുകളും തന്റെ ലഹരി ഉപയോഗം തുറന്നു​സമ്മതിക്കുന്നവയാണ്​.

സഹോദരന്റെ ലഹരി ഇടപാടുകൾ പുറത്തുവന്നതോടെ ഫിറോസിന്റെ നിലപാടുകളിലെ ഇരട്ടത്താപ്പും സമൂഹമാധ്യമങ്ങളിൽ ചർച്ചയായിട്ടുണ്ട്​. ‘എവിടെ നിന്നാണ് കേരളത്തിലേക്ക് ഇത്രയും മയക്കുമരുന്നുകൾ വരുന്നത്?’, ‘മയക്കുമരുന്നിന്റെ വൻ ഒഴുക്ക് തടയാൻ കഴിയാത്തത്​ എന്തുകൊണ്ട്​’ ‘മയക്കുമരുന്ന് ലോബിയെ സഹായിക്കുന്നവർ കപ്പലിൽ തന്നെയല്ലേ’ തുടങ്ങിയ പോസ്റ്റുകളാണ്​ ഫിറോസ്​ നേരത്തെ ഫേസ്​ബുക്കിലിട്ടത്​. ‘6.6 ഗ്രാം എംഡിഎംഎ രണ്ട് ടീസ്പൂണിലേക്ക് പോലുമുണ്ടാകില്ല, ആ ലോഡ്‌ജിൽ മുറിയെടുത്ത കമിതാക്കൾക്ക് സ്വന്തം ആവശ്യത്തിന് തന്നെ തികയുമോന്ന് സംശയമാണ്’ എന്നാണ്​ ബുജൈറിന്റെ ഒരു പോസ്റ്റ്​. ‘വ്യക്തിപരമായി സിന്തറ്റിക്ക് താൽപ്പര്യമില്ലാത്ത ആളാണ് താനെന്നും മഷ്റൂം നല്ല അനുഭവമായിരുന്നു’വെന്നുമാണ്​ മറ്റൊരാളുടെ പോസ്റ്റിന്​ ബുജൈറിന്റെ കമന്റ്​. സിന്തറ്റിക് ഡ്രഗ് നിയന്ത്രിതമായി ലഭ്യമാക്കണമെന്നും മറ്റൊരു പോസ്റ്റിൽ ബുജൈർ ആവശ്യപ്പെടുന്നു. ഇവ സമൂഹമാധ്യമങ്ങളിൽ പ്രചരിച്ചതോടെ ലീഗും ഫിറോസും പ്രതിരോധത്തിലാണ്.