മന്ത്രി വാക്കുപാലിച്ചു, മിഥുന്റെ കുടുംബത്തിന്​ വീട്​

കൊല്ലം: തേവലക്കര ബോയ്​സ്​ ഹൈസ്​കൂളിൽ വൈദ്യുതാഘാതമേറ്റു മരിച്ച മിഥുന്റെ കുടുംബത്തിന്​ സർക്കാർ ഉറപ്പുനൽകിയ വീട്​ യാഥാർഥ്യമാകുന്നു. 1000 സ്​ക്വയർഫീറ്റ്​ വിസ്​തൃതിയുള്ള വീടിന്​ ഞായർ രാവിലെ 10ന്​ പടിഞ്ഞാറെകല്ലട വിളന്തറയിൽ വിദ്യാഭ്യാസ മന്ത്രി വി ശിവൻകുട്ടി കല്ലിടും. ധനമന്ത്രി കെ എൻ ബാലഗോപാൽ, കോവൂർ കുഞ്ഞുമോൻ എംഎൽഎ, പൊതുവിദ്യാഭ്യാസ ഡയറക്ടർ എസ്​ ഷാനവാസ്, സ്​ക‍ൗട്ട്​സ്​ ആൻഡ്‌​ ഗൈഡ്‌സ്​ അസോസിയേഷൻ സംസ്ഥാന സെക്രട്ടറി എൻ കെ പ്രഭാകരൻ​ തുടങ്ങിയവർ പങ്കെടുക്കും.

സംസ്ഥാന പൊതുവിദ്യാഭ്യാസ വകുപ്പിന്റെ നിയന്ത്രണത്തിലുള്ള സ്​ക‍ൗട്ട്​സ്​ ആൻഡ്‌ ​ ഗൈഡ്‌സ്​ അസോസിയേഷന്റെ മേൽനോട്ടത്തിലാണ്​​ ഭവന നിർമാണം. മൂന്നുമുറിയും ഹാളും അടുക്കളയും സിറ്റ‍ൗട്ടും രണ്ട് അറ്റാച്ച്‌ഡ്‌​ ബാത്ത്​റൂമും ഉൾപ്പെടെയുള്ള സ‍ൗകര്യങ്ങളുണ്ടാകും. 10 ലക്ഷം രൂപയാണ്‌ ചെലവ്​ പ്രതീക്ഷിക്കുന്നത്‌. അഞ്ചു മാസത്തിനുള്ളിൽ നിർമാണം പൂർത്തിയാക്കും. വീട്‌ നിർമാണം പൂർത്തിയാകുന്നതുവരെ കുടുംബത്തിന്​ താമസിക്കാൻ സമീപത്തായി മറ്റൊരു വീട്​ സർക്കാർ ചെലവിൽ വാടകയ്​ക്ക്​ എടുത്തുനൽകി​. നിലവിലെ പഴകിയ വീട്​ സ്​ക‍ൗട്ട്​സ്​ ആൻഡ്‌​ ഗൈഡ്‌സ്​ അസോസിയേഷന്റെ മേൽനോട്ടത്തിൽ കഴിഞ്ഞദിവസം പൊളിച്ചുമാറ്റി സ്ഥലം ഒരുക്കി.

ജൂലൈ 17നാണ്​ വിളന്തറ മനുഭവനിൽ എട്ടാംക്ലാസ്​ വിദ്യാർഥിയായ മിഥുൻ സ്​കൂളിൽ മരിച്ചത്​. മനുവിന്റെയും സുജാതയുടെയും മൂത്ത മകനായിരുന്നു. കുടുംബത്തെ സംരക്ഷിക്കുമെന്നും എല്ലാ സഹായങ്ങളും ഉറപ്പാക്കുമെന്നും പ്രഖ്യാപിച്ച വിദ്യാഭ്യാസ മന്ത്രി വി ശിവൻകുട്ടി മിഥുന്റെ കുടുംബത്തിന്​ വീട്​ നിർമിച്ചുനൽകുമെന്നും ഉറപ്പുനൽകിയിരുന്നു. മുഖ്യമന്ത്രിയുടെ ദുരിതാശ്വാസ ഫണ്ടിൽനിന്ന്‌ 10 ലക്ഷം രൂപ, അധ്യാപക സംഘടന കെഎസ്ടിഎ 11.10ലക്ഷം, സ്​കൂൾ മാനേജ്​മെന്റ്​ 10ലക്ഷം, കെഎസ്​ഇബി 10ലക്ഷം, പൊതുവിദ്യാഭ്യാസ വകുപ്പിന്റെ മൂന്നുലക്ഷം രൂപയും മിഥുന്റെ കുടുംബത്തിന്​ ​ ധനസഹായമായി നൽകിയിരുന്നു.