വീണ്ടുമെത്തും 
പുത്തൻ ബസുകൾ ; ഒരുകോടി അധിക വരുമാനം ലക്ഷ്യമിട്ട്‌ കെഎസ്‌ആർടിസി

തിരുവനന്തപുരം

ഒരുകോടി രൂപ കലക്‌ഷൻ ലക്ഷ്യമിട്ട്‌ കെഎസ്‌ആർടിസി ആറുമാസത്തികം നിരത്തിലിറക്കുന്നത്‌ 181 ബസുകൾകൂടി. പ്ലാൻ ഫണ്ടും ബജറ്റ്‌ വിഹിതവുംചേർത്ത്‌ വാങ്ങിക്കുന്ന 269 ബസുകളിൽ 88 എണ്ണം എത്തിക്കഴിഞ്ഞു. ആദ്യഘട്ടത്തിൽ 143 ബസും രണ്ടാംഘട്ടത്തിൽ 126 ബസുമാണ്‌ വാങ്ങുന്നത്‌. രണ്ടാംഘട്ടത്തിലുള്ള നാല്‌ വോൾവോ ബസുകൾ എത്തി. ഇവ ബംഗളൂരു റൂട്ടിൽ താൽക്കാലികമായി ഓടിക്കും. നിലവിൽ പ്രതിദിന കലക്‌ഷൻ എട്ടുകോടി രൂപയ്‌ക്ക്‌ താഴെയാണ്‌. പുതിയ ബസുകൾ എത്തുന്നതോടെ ശരാശരി എട്ടര– ഒന്പത്‌ കോടിയെത്തുമെന്നാണ്‌ പ്രതീക്ഷ.

നാൽപ്പത്‌ വര്‍ഷത്തിനുശേഷം കെഎസ്‌ആർടിസി 1.57 കോടി രൂപ ഇ‍ൗമാസം എട്ടിന്‌ ലാഭമുണ്ടാക്കിയിരുന്നു. 10.19 കോടി രൂപയായിരുന്നു അന്നത്തെ കലക്‌ഷൻ. ഡ്രൈവിങ് സ്‌കൂളുകള്‍ മുഖേന ഒന്നരക്കോടി രൂപയും ലാഭമുണ്ടാക്കി. തിരുവനന്തപുരത്തും കൊച്ചിയിലും മൂന്നാറിലും സർവീസ്‌ നടത്തുന്ന ഡബിള്‍ ഡക്കര്‍ ബസുകളും ലാഭത്തിലാണ്‌. തൃശൂര്‍, കോഴിക്കോട് ജില്ലകള്‍ക്കായി ഡബിള്‍ ഡക്കര്‍ ഉടൻ വാങ്ങും. നിലവിൽ ദീർഘദൂര റൂട്ടിൽ മാത്രമുള്ള പ്രീമിയം സൂപ്പര്‍ഫാസ്റ്റ് ബസുകൾ ഹ്രസ്വദൂരത്തിലും ഇറക്കാനും തീരുമാനിച്ചിട്ടുണ്ട്‌.

കുട്ടിബസ്‌ 50, സൂപ്പർഫാസ്‌റ്റ്‌ 110, ഫ-ാസ്‌റ്റ്‌ 50, സീറ്റർ എട്ട്‌, സീറ്റർ കം സ്ലീപ്പർ 10, സ്ലീപ്പർ എട്ട്‌, ലിങ്ക്‌ ബസ്‌ 27 എന്നിവയാണ്‌ പുതിയതായെത്തുന്നത്‌. എസി ബസുകൾ കെഎസ്‌ആർടിസി സ്വിഫ്‌റ്റിന്റെ പേരിലും മറ്റുള്ളവ കെഎസ്‌ആർടിസിയുടെ പേരിലുമാണ്‌ രജിസ്‌റ്റർ ചെയ്യുക.