ലോറിയിൽനിന്ന് ഓക്സിജൻ സിലിണ്ടർ തെറിച്ചുവീണു; കെഎസ്ഇബി ജീവനക്കാരൻ മരിച്ചു

കണ്ണൂർ: കണ്ണൂർ പാപ്പിനിശ്ശേരിയിൽ ലോറിയിൽ നിന്ന് ഓക്സിജൻ സിലിണ്ടർ തെറിച്ചുവീണ് ബൈക്ക് യാത്രക്കാരനായ കെഎസ്ഇബി ഓവർസിയർ മരിച്ചു. ചിറക്കൽ പുഴാതി കെ ശ്രീജിത്ത് (48) ആണ് മരിച്ചത്. വെള്ളി രാത്രി ജോലി കഴിഞ്ഞ് മടങ്ങവെയായിരുന്നു അപകടം.

ദേശീയപാതയിൽ ചുങ്കം ഭാ​ഗത്തുവെച്ച് ഓടിക്കൊണ്ടിരുന്ന ലോറിയിൽനിന്ന് സിലിണ്ടർ ശ്രീജിത്തിന് മേൽ വീഴുകയായിരുന്നു. സിലിണ്ടർ വീണ് ശ്രീജിത്ത് ധരിച്ചിരുന്ന ഹെൽമെറ്റ് പൊട്ടിച്ചിതറി. പാപ്പിനിശ്ശേരിയിലെ സ്വകാര്യ ആശുപത്രിയിൽ ശ്രീജിത്തിനെ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. തളിപ്പറമ്പ് കെഎസ്ഇബി ഓഫീസിലെ ജീവനക്കാരനാണ്. മൃതദേഹം പരിയാരം മെഡിക്കൽ കോളേജ് ആശുപത്രിയിൽ.