അത്യാധുനിക കോൾ സെന്റർ ; കെ–ഫോണിൽ അതിവേഗം പരാതി പരിഹാരം

തിരുവനന്തപുരം

ഉപഭോക്തൃ സേവന സംവിധാനം കൂടുതൽ ശക്തമാക്കി കെ –ഫോൺ ടെക്‌നിക്കൽ കോൾ സെന്റർ. അത്യാധുനിക സൗകര്യങ്ങളോടെ പ്രവർത്തിക്കുന്ന കോൾ സെന്റർ സംസ്ഥാനത്തുടനീളം ഉപഭോക്താക്കൾക്ക് അതിവേഗം സേവന പിന്തുണ ഉറപ്പാക്കും. കെ ഫോൺ ആസ്ഥാനമായ തിരുവനന്തപുരത്താണ് കോള്‍ സെന്റര്‍ പ്രവർത്തിക്കുന്നത്.

ടെക്‌നിക്കൽ ബിരുദധാരികളായ 37 പേരടങ്ങുന്ന സംഘമാണ് കോൾ സെന്ററിലുള്ളത്. ഇവരിൽ 60 ശതമാനം സ്ത്രീകളാണ്‌. പരാതികൾ വേഗത്തിൽ പരിഹരിക്കാനായി മൂന്നുതലത്തിലാണ്‌ പ്രവർത്തനം. ഏറ്റവും അത്യാവശ്യമുള്ള, പ്രഥമ പരിഗണന നൽകേണ്ട പ്രശ്നങ്ങൾ രണ്ടുമുതൽ മൂന്നുവരെ മണിക്കൂറിനുള്ളിൽ പരിഹരിക്കും. മറ്റു പരാതികൾ പരാതിയുടെ ഗൗരവമനുസരിച്ച്‌ എട്ടു മുതൽ 48 മണിക്കൂറിനുള്ളിലും.

ആധുനിക ടിക്കറ്റിങ്‌ സോഫ്റ്റ്‌വെയറിലൂടെ പരാതികൾ രജിസ്റ്റർ ചെയ്യുമ്പോഴും പരിഹരിച്ചു കഴിയുമ്പോഴും വിവരം ഉപഭോക്താക്കളെ എസ്‌എംഎസിലൂടെ അറിയിക്കും. കൂടുതൽ സാങ്കേതിക ഇടപെടൽ ആവശ്യമായ സാഹചര്യങ്ങളിൽ നെറ്റ്‌വർക്ക് ഓപ്പറേഷൻസ് സെന്റർ പ്രവർത്തനങ്ങൾ കൈകാര്യം ചെയ്യും. അംഗീകൃത സർവീസ് പങ്കാളികളിലൂടെ ഓൺ-സൈറ്റ് പരിഹാരം നൽകുകയും ചെയ്യും.എന്റർപ്രൈസസ് ഉപഭോക്താക്കൾക്കുണ്ടാകുന്ന സേവനതടസ്സങ്ങൾ മുൻകൂട്ടി കണ്ടെത്തി 24 മണിക്കൂറിനുള്ളിൽ പരിഹാരം ഉറപ്പാക്കും. ഉപഭോക്താക്കൾക്ക് 18005704466 എന്ന ടോൾ-ഫ്രീ നമ്പർ വഴിയോ ‘എന്റെ കെ -ഫോൺ’ മൊബൈൽ ആപ്പ് വഴിയോ പരാതി രജിസ്റ്റര്‍ ചെയ്യാം. https://bss.kfon.co.in/ എന്ന സെൽഫ് കെയർ പോർട്ടലിലൂടെ യൂസർ ഐഡിയും പാസ്‌വേഡും ഉപയോഗിച്ച് ലോഗിൻ ചെയ്‌തും പരാതി രജിസ്റ്റർ ചെയ്യാം. മലയാളത്തിലും ഇംഗ്ലീഷിലും ഉപഭോക്തൃ സേവനം ലഭ്യമാകും.