ജനശതാബ്ദി ഇനി സൂപ്പർഫാസ്റ്റല്ല; നമ്പരും മാറുന്നു, നിരക്കുകളിലും മാറ്റം

നിലമ്പൂർ : കേരളത്തിലോടുന്ന രണ്ട് ജനശതാബ്ദി എക്സ്പ്രസ് ട്രെയിനുകളുടെ സൂപ്പർഫാസ്റ്റ് പദവി ഒഴിവാക്കി മെയിൽ/എക്സ്പ്രസ് വിഭാഗത്തിലേക്ക് മാറ്റുന്നു. ശരാശരി വേഗം കുറഞ്ഞതിന്റെ അടിസ്ഥാനത്തിലാണ് റെയിൽവേയുടെ നടപടി. ഇതോടെ ട്രെയിനുകളുടെ നമ്പറുകളിലും മാറ്റമുണ്ടാകും. 2027 ജനുവരി ഒന്നുമുതൽ പുതിയ നമ്പറുകൾ പ്രാബല്യത്തിൽ വരും.

കോഴിക്കോട്–തിരുവനന്തപുരം സെൻട്രൽ ജനശതാബ്ദി (12075/12076), കണ്ണൂർ–തിരുവനന്തപുരം സെൻട്രൽ ജനശതാബ്ദി (12081/12082) ട്രെയിനുകളെയാണ് സൂപ്പർഫാസ്റ്റ് വിഭാഗത്തിൽനിന്ന് മെയിൽ/എക്സ്പ്രസ് വിഭാഗത്തിലേക്ക് മാറ്റുന്നത്.

കോഴിക്കോട്–തിരുവനന്തപുരം ജനശതാബ്ദിയുടെ പുതിയ നമ്പറുകൾ 16375, 16376 എന്നിങ്ങനെയാണ്. കണ്ണൂർ–തിരുവനന്തപുരം ജനശതാബ്ദിക്ക് 16379, 16380 എന്നീ നമ്പറുകളാകും. ട്രെയിനുകളുടെ ജനശതാബ്ദി സർവീസ് പദവി തുടരും. സൂപ്പർഫാസ്റ്റ് അധികനിരക്ക് ഒഴിവാക്കി പകരം മെയിൽ/എക്സ്പ്രസ് അധികനിരക്ക് ഈടാക്കും. ഇതോടെ ടിക്കറ്റ് നിരക്കിൽ കുറവുണ്ടാകുമെന്നാണ് അറിയിപ്പ്.

ശരാശരി വേഗം കുറഞ്ഞതിന്റെ പേരിൽ സൂപ്പർഫാസ്റ്റ് പദവി ഒഴിവാക്കുന്നത് യാത്രക്കാർക്ക് നിരക്കിൽ ആശ്വാസമാകുമെങ്കിലും ട്രെയിനുകളുടെ വേഗവും യാത്രാസമയവും മെച്ചപ്പെടുത്താനുള്ള നടപടികൾ റെയിൽവേ സ്വീകരിക്കുമോയെന്ന ചോദ്യവും ഉയരുന്നുണ്ട്.