Deshabhimani

കേരള സർവകലാശാല; സിൻഡിക്കറ്റ് അം​ഗങ്ങളുടെ സിറ്റിങ് ഫീയും യാത്രാബത്തയും കുത്തനെ വർധിപ്പിച്ചു, നടപടി സാമ്പത്തിക പ്രതിസന്ധിക്കിടെ

kerala university
വെബ് ഡെസ്ക്

Published on Nov 16, 2026, 12:50 PM | 1 min read

തിരുവനന്തപുരം: കേരള സർവകലാശാല സിൻഡിക്കറ്റ് അംഗങ്ങളുടെ സിറ്റിങ് ഫീസും യാത്രാബത്തയും വർധിപ്പിച്ചു. കടുത്ത സാമ്പത്തിക പ്രതിസന്ധിക്കിടെയാണ് അംഗങ്ങളുടെ ആനുകൂല്യങ്ങളിൽ വലിയ വർധന വരുത്തിയത്. സിറ്റിങ് ഫീസ് 750 രൂപയിൽനിന്ന് 2000 രൂപയായും യാത്രാബത്ത കിലോമീറ്ററിന് ഒമ്പത് രൂപയിൽനിന്ന് 15 രൂപയായുമാണ് ഉയർത്തിയത്. യാത്രാബത്തയിൽ 67 ശതമാനത്തോളവുമാണ് വർധന. യുഡിഎഫ് സർക്കാർ സർവകലാശാല സിൻഡിക്കറ്റ് പുനഃസംഘടിപ്പിച്ചതിന് പിന്നാലെയാണ് തീരുമാനം. സെപ്തംബർ 15ന് ചേർന്ന സിൻഡിക്കറ്റ് യോഗത്തിലാണ് പുതിയ നിരക്കുകൾ സംബന്ധിച്ച തീരുമാനമുണ്ടായത്.


സർവകലാശാല സാമ്പത്തിക പ്രതിസന്ധി നേരിടുന്നതിനിടെയാണ് സിൻഡിക്കറ്റ് അംഗങ്ങളുടെ ആനുകൂല്യങ്ങൾ വർധിപ്പിക്കുന്നത്. ഇത് അധിക സാമ്പത്തിക ബാധ്യത സൃഷ്ടിക്കുമെന്ന വിമർശനം ഉയർന്നിട്ടുണ്ട്. വിദ്യാർഥികളുടെ പഠനവും സർവകലാശാലയുടെ പ്രവർത്തനങ്ങളും സംബന്ധിച്ച സാമ്പത്തിക ആവശ്യങ്ങൾ നിലനിൽക്കുമ്പോൾ ഇത്തരം ചെലവുകൾക്ക് മുൻഗണന നൽകുന്നതിനെതിരെ പ്രതിഷേധം ശക്തമാണ്.


സിറ്റിങ് ഫീസും യാത്രാബത്തയും വർധിപ്പിക്കാനുള്ള തീരുമാനത്തെ ഇടതുപക്ഷ സിൻഡിക്കറ്റ് അംഗങ്ങൾ യോഗത്തിൽ എതിർത്തിരുന്നു. സർവകലാശാലയെ കൂടുതൽ സാമ്പത്തിക പ്രതിസന്ധിയിലേക്ക് തള്ളിവിടുന്ന തീരുമാനം നടപ്പാക്കരുതെന്നും അംഗങ്ങൾ ആവശ്യപ്പെട്ടു. സിൻഡിക്കറ്റ് അംഗങ്ങളുടെ ആനുകൂല്യവർധന അപലപനീയമാണെന്ന് കേരള യൂണിവേഴ്‌സിറ്റി എംപ്ലോയീസ് യൂണിയനും പ്രതികരിച്ചിരുന്നു. സർവകലാശാലയുടെ സാമ്പത്തികസ്ഥിതി പരിഗണിക്കാതെയുള്ള തീരുമാനമാണിതെന്നാണ് വിമർശനം.


സിൻഡിക്കറ്റ് യോഗങ്ങളിൽ പങ്കെടുക്കുന്ന അംഗങ്ങൾക്ക് നൽകുന്ന സിറ്റിങ് ഫീസും യാത്രാബത്തയും ഉയരുന്നതോടെ സർവകലാശാലയുടെ ചെലവ് വർധിക്കും. എന്നാൽ പുതിയ നിരക്കുകൾ നടപ്പാക്കുന്നതിലൂടെ വർഷത്തിൽ എത്ര രൂപയുടെ അധിക ബാധ്യതയുണ്ടാകുമെന്ന കണക്ക് വ്യക്തമല്ല. സർവകലാശാലകളുടെ സാമ്പത്തികസ്ഥിതിയെക്കുറിച്ച് ആശങ്കകൾ നിലനിൽക്കുന്നതിനിടെ ഭരണസമിതി അംഗങ്ങളുടെ ആനുകൂല്യങ്ങൾ വർധിപ്പിച്ച തീരുമാനം പുതിയ ചർച്ചകൾക്ക് വഴിയൊരുക്കുകയാണ്.



deshabhimani section

Related News

View More
0 comments
Sort by

Deshabhimani
Home