നീറ്റ് ക്രമക്കേട്: കേന്ദ്ര സർക്കാരിനെതിരെ നിയമസഭയിൽ പ്രമേയം പാസാക്കി

തിരുവനന്തപുരം: നീറ്റ് പരീക്ഷാ നടത്തിപ്പിലുണ്ടായ ഗുരുതരമായ ക്രമക്കേടുകൾക്കെതിരെ സംസ്ഥാന സർക്കാർ നിയമസഭയിൽ അവതരിപ്പിച്ച പ്രമേയം പാസാക്കി. ഭരണപക്ഷത്തിനൊപ്പം പ്രതിപക്ഷവും പ്രമേയത്തെ പിന്തുണച്ചു. ബിജെപിയുടെ എതിർപ്പ് മറികടന്നാണ് പ്രമേയം സഭയിൽ പാസാക്കിയത്. ഉന്നത വിദ്യാഭ്യാസ മന്ത്രി റോജി എം ജോൺ ആണ് സഭയിൽ കേന്ദ്ര സർക്കാരിനും കേന്ദ്ര ഏജൻസിക്കുമെതിരെയുള്ള പ്രമേയം അവതരിപ്പിച്ചത്.

രാജ്യത്തെ മെഡിക്കൽ പ്രവേശനത്തിനായുള്ള ദേശീയ പരീക്ഷയുടെ വിശ്വാസ്യത, സുതാര്യത, നിഷ്പക്ഷത എന്നിവ പൂർണ്ണമായും ചോദ്യം ചെയ്യപ്പെടുന്ന സാഹചര്യമാണുള്ളതെന്ന് മന്ത്രി സഭയെ അറിയിച്ചു. ചോദ്യപേപ്പർ ചോർച്ച, പരീക്ഷ നടത്തിപ്പിലെ ഭരണപരവും സാങ്കേതികവുമായ വീഴ്ചകൾ, മാർക്ക് നിർണയത്തിലെയും ഫലപ്രഖ്യാപനത്തിലെയും അപാകതകൾ എന്നിവ ലക്ഷക്കണക്കിന് വിദ്യാർഥികളുടെ ഭാവിയെയാണ് പ്രതിസന്ധിയിലാക്കിയത്. നിരന്തരമായ പരാതികളും അന്വേഷണങ്ങളും കോടതി ഇടപെടലുകളും ഉയർന്ന സാഹചര്യത്തിൽ പരീക്ഷാ നടത്തിപ്പിലെ അപാകതകൾ അതീവ ദൗർഭാഗ്യകരമാണെന്നും മന്ത്രി വ്യക്തമാക്കി.

പ്രമേയത്തിന്മേൽ ബിജെപി വിയോജിപ്പ് അറിയിച്ചു. പരീക്ഷാ നടത്തിപ്പിലെ ക്രമക്കേടുകളിൽ നടപടിയെടുത്ത കേന്ദ്രസർക്കാരിനെ അഭിനന്ദിക്കണമെന്നാവശ്യപ്പെട്ട് ബിജെപി ഭേദഗതി നിർദ്ദേശിച്ചു. വി മുരളീധരന്റെ നിർദ്ദേശപ്രകാരമുള്ള ഈ ഭേദഗതി വോട്ടിനിട്ട് സഭ തള്ളിക്കളഞ്ഞു.

ക്രമക്കേടുകൾക്ക് ഉത്തരവാദികളായവർക്കെതിരെ കർശനമായ നടപടി സ്വീകരിക്കണമെന്നും, നിലവിലെ പരീക്ഷാ സമ്പ്രദായത്തിൽ സമൂലമായ മാറ്റങ്ങൾ വരുത്തണമെന്നും പ്രമേയം കേന്ദ്രസർക്കാരിനോട് ആവശ്യപ്പെടുന്നു. പരീക്ഷാ നടത്തിപ്പിന്റെ വിശ്വാസ്യത വീണ്ടെടുക്കാൻ അടിയന്തര ഇടപെടൽ അനിവാര്യമാണെന്ന നിലപാടാണ് സംസ്ഥാന സർക്കാരും പ്രതിപക്ഷവും സഭയിൽ സ്വീകരിച്ചത്.