കാലടിയിലെ പരീക്ഷാവിലക്ക്; എസ്എഫ്‌ഐ സുപ്രീംകോടതിയെ സമീപിക്കും

കാലടി: ശ്രീശങ്കരാചാര്യ സംസ്കൃത സർവകലാശാലയിൽ സസ്പെൻഷനിലായ വിദ്യാർഥികൾക്ക് പരീക്ഷ എഴുതാൻ അനുമതി നൽകിയ ഉത്തരവ് ഹൈക്കോടതി ഡിവിഷൻ ബെഞ്ച് റദ്ദാക്കിയതിനെതിരെ സുപ്രീംകോടതിയെ സമീപിക്കാൻ എസ്എഫ്‌ഐ. ബുധനാഴ്ച സുപ്രീംകോടതിയില്‍ കേസ് ഫയല്‍ ചെയ്യും. പഠനസൗകര്യങ്ങൾ മെച്ചപ്പെടുത്തണമെന്നാവശ്യപ്പെട്ട് സമരം ചെയ്ത 16 വിദ്യാർഥികളെ സസ്പെൻഡ് ചെയ്തതിനെ തുടർന്നാണ് വിദ്യാർഥികൾക്ക് പരീക്ഷയെഴുതുന്നതിൽ പ്രതിസന്ധി രൂപപ്പെട്ടത്. നവംബർ നാലിന് പരീക്ഷ ആരംഭിക്കാനിരിക്കെയാണ് വിദ്യാർഥികൾക്ക് അനുകൂലമായ ഹൈക്കോടതി സിംഗിൾ ബെഞ്ച് ഉത്തരവ് റദ്ദാക്കിയത്.

സസ്പെൻഷനിലുള്ള വിദ്യാർഥികളെ പരീക്ഷ എഴുതാൻ അനുവദിക്കണമെന്നും പരീക്ഷാഫീസ് സ്വീകരിക്കണമെന്നും ഒക്ടോബർ 30ന് ഹൈക്കോടതി സിംഗിൾ ബെഞ്ച് ഉത്തരവിട്ടിരുന്നു. എന്നാൽ ഉത്തരവിനെതിരെ വൈസ് ചാൻസലർ ഡോ. സിസ തോമസും സർവകലാശാലയും ഡിവിഷൻ ബെഞ്ചിനെ സമീപിച്ചു. ചൊവ്വാഴ്ച അപ്പീൽ പരിഗണിച്ച ജസ്റ്റിസുമാരായ അനിൽ കെ നരേന്ദ്രൻ, എസ് മുരളീകൃഷ്ണ എന്നിവർ ഉൾപ്പെട്ട ബെഞ്ചാണ് സിംഗിൾ ബെഞ്ചിന്റെ ഇടക്കാല ഉത്തരവ് റദ്ദാക്കിയത്. പരീക്ഷ എഴുതുന്നതിനുള്ള ഹാജർ ഉൾപ്പെടെയുള്ള നിബന്ധനകൾ പാലിച്ചിട്ടുണ്ടെന്ന് വിദ്യാർഥികൾ വ്യക്തമാക്കിയിട്ടില്ലെന്നാണ് കോടതിയുടെ കണ്ടെത്തൽ.

സസ്പെൻഷനിലായ 16 പേരിൽ ആറുപേർ ഗവേഷക വിദ്യാർഥികളാണ്. ബാക്കി പത്തുപേർക്കാണ് നവംബർ നാലിന് ആരംഭിക്കുന്ന പരീക്ഷയുമായി ബന്ധപ്പെട്ട് നേരിട്ട് പ്രതിസന്ധിയുള്ളത്. മതിയായ ഹാജരില്ലെന്നും ഇന്റേണൽ അസസ്‌മെന്റ് പൂർത്തിയാക്കിയിട്ടില്ലെന്നുമുള്ള സർവകലാശാലയുടെ വാദമാണ് ഡിവിഷൻ ബെഞ്ച് പരിഗണിച്ചത്. എന്നാൽ 60 ദിവസത്തിലേറെയായി ക്യാമ്പസിൽ പ്രവേശിക്കാൻ അനുവദിക്കാത്തതിനാൽ ഹാജർ നേടാൻ എങ്ങനെ കഴിയുമെന്നാണ് വിദ്യാർഥികളുടെ ചോദ്യം.

പഠനസൗകര്യങ്ങൾ മെച്ചപ്പെടുത്തണമെന്നാവശ്യപ്പെട്ട് ആ​ഗസ്തിൽ നടത്തിയ പ്രതിഷേധത്തിന്റെ പേരിലാണ് വിദ്യാർഥികളെ സസ്പെൻഡ് ചെയ്തത്. തിയേറ്റർ ആർട്സ് വിഭാഗത്തിലെ കേടായ ഉപകരണങ്ങൾ നന്നാക്കുക, കുടിവെള്ളം ഉൾപ്പെടെയുള്ള അടിസ്ഥാനസൗകര്യങ്ങൾ ഉറപ്പാക്കുക തുടങ്ങിയ ആവശ്യങ്ങളാണ് സമരത്തിൽ ഉന്നയിച്ചത്. സമരത്തിനിടെ വൈസ് ചാൻസലർക്കെതിരെ അതിക്രമമുണ്ടായെന്നാണ് സർവകലാശാലയുടെ വാദം. എന്നാൽ നാടകാവതരണത്തിന്റെ ഭാഗമായി നടത്തിയ പ്രതിഷേധത്തെ തെറ്റായി വ്യാഖ്യാനിക്കുകയായിരുന്നു.

ഇതിനിടെ സസ്പെൻഷനിലായ 12 വിദ്യാർഥികൾ രേഖാമൂലം മാപ്പ് നൽകിയാൽ തിരിച്ചെടുക്കാമെന്നും നാലുപേരുടെ സസ്പെൻഷൻ രണ്ടുമാസത്തേക്ക് കൂടി നീട്ടാനും സർവകലാശാല സിൻഡിക്കറ്റ് തീരുമാനിച്ചിരുന്നു. മാപ്പെഴുതി നൽകി സമരം അവസാനിപ്പിക്കില്ലെന്ന നിലപാടിലാണ് എസ്എഫ്‌ഐ പ്രവർത്തകർ. വിദ്യാർഥികൾക്ക് പരീക്ഷ എഴുതാനുള്ള അവസരം ഉറപ്പാക്കണമെന്നാവശ്യപ്പെട്ട് സർവകലാശാലയ്ക്കുമുന്നിൽ നിരാഹാരസമരവും തുടരുകയാണ്. ഡിവിഷൻ ബെഞ്ച് ഉത്തരവിനെതിരെ നിയമപോരാട്ടം തുടരാനാണ് വിദ്യാർഥികളുടെ തീരുമാനം.