അയാൾ കൊടുംക്രിമിനൽ

തൃശൂർ

റിട്ട. എസ്​ഐ കെ എ മുഹമ്മദ്​ അഷറഫിന്റെ മനസ്സിൽ ഇന്നുമുണ്ട്‌ ഗോവിന്ദച്ചാമിയുടെ ക്രൂരമുഖം. ഷൊർണൂരിലെ പെൺകുട്ടിയെ അതിക്രൂരമായി പീഡിപ്പിച്ചുകൊന്ന കേസിൽ തെളിവുകളും രേഖകളും ഹാജരാക്കാൻ പ്രോസിക്യൂഷനെ സഹായിച്ച​ അഷ്‌റഫിന്റെ ഭാഷയിൽ ഗോവിന്ദച്ചാമി ‘കൊടുംക്രിമിനൽ’​.

2011 ഫെബ്രുവരി ഒന്നിന് എറണാകുളം– ഷൊർണൂർ പാസഞ്ചർ ട്രെയിനിൽയാത്രചെയ്ത ഷൊർണൂർ സ്വദേശിയായ പെൺകുട്ടിയെയാണ്​ ഗോവിന്ദച്ചാമി ആക്രമിച്ചത്. ‘ ട്രെയിനിൽനിന്ന് തള്ളിയിട്ട്‌ പെൺകുട്ടിയെ പാളത്തിലിട്ട് പീഡിപ്പിച്ചശേഷം പ്രതി രക്ഷപ്പെട്ടു. പൊലീസ് തെരച്ചിൽ നടത്തുന്നതിനിടെ പാലക്കാട് റെയിൽവേ സ്റ്റേഷനിൽ ഡിവൈഎസ്​പി സുനിൽകുമാർ പ്രതിയെ പിടികൂടി. എസ്​പി പി ദിനേശന്റെ നിർദേശപ്രകാരം അന്നത്തെ ഡിവൈഎസ്​പി പി രാധാകൃഷ്ണൻ, ചേലക്കര സിഐ കെ ശശിധരൻ എന്നിവർക്കൊപ്പം പാലക്കാട്ടെത്തി ഗോവിന്ദച്ചാമിയെ കണ്ടരംഗം ഇന്നും മറക്കാനാവില്ല’–- അന്വേഷകസംഘത്തിലുണ്ടായിരുന്ന അഷ്റഫ് പറഞ്ഞു.

‘‘കൊടുംക്രിമിനലാണ്​. സ്​ത്രീകളെ കണ്ടാൽ ഭ്രാന്താണ്​. ചോദ്യം ചെയ്യലിനിടെ ‘പാൽപ്പായസം കണ്ടാൽ കഴിക്കാതിരിക്കുമോ’ എന്നായിരുന്നു ചോദ്യം. സാക്ഷി പറയാനെത്തിയ വനിത ഡോക്ടർ, പ്രതിയുടെ നോട്ടം കണ്ട്​ ഭീതിയിലായി. വിവിധ സംസ്ഥാനങ്ങളിൽ കേസുകളുണ്ട്‌. പലയിടത്തും പേരുകൾ മാറ്റിയാണ്‌ ​നൽകിയത്‌. വിരലടയാള വിദഗ്​ധരുടെ പരിശോധനയിലാണ്​ പെൺകുട്ടിയെ പീഡിപ്പിച്ചുകൊന്ന കേസിൽ പ്രതിയാണെന്ന്​​ സ്ഥിരീകരിച്ചത്’–അഷ്‌റഫ്‌ വിശദീകരിച്ചു​.

സാക്ഷികളെയും ശാസ്​ത്രീയ തെളിവുകളും കോടതിയിൽ കൃത്യമായി നിരത്തി​. പരിശോധനയിൽ ലൈംഗിക പീഡനവും തെളിഞ്ഞു. ഇയാൾ പെൺകുട്ടിയുടെ ഫോൺ കവർന്നെടുത്ത്‌ വിറ്റതും കണ്ടെത്തി. കേസ്‌ രേഖകൾ തയ്യാറാക്കുന്നതിലും സുപ്രീംകോടതിവരെ ഹാജരാക്കി പ്രോസിക്യൂഷനെ സഹായിക്കുന്നതിലും പ്രധാനപങ്കുവഹിച്ചിരുന്നു അഷ്‌റഫ്‌.

കേസിൽ തൃശൂർ അതിവേഗ കോടതി പ്രതിക്ക്​ വധശിക്ഷയും വിധിച്ചു.

ഹൈക്കോടതി വധശിക്ഷ ശരിവച്ചെങ്കിലും സുപ്രീംകോടതി ജീവപര്യന്തമാക്കി.