റിയാസിനെതിരെ മൊഴിനൽകാൻ ഇ ഡി ഭീഷണിപ്പെടുത്തി; മകളെ കുടുക്കുമെന്ന് പറഞ്ഞു; ​ഗുരുതര വെളിപ്പെടുത്തൽ

കോഴിക്കോട്: ‌സിഎംആർഎൽ- എക്സാലോജിക് ഇടപാടുമായി ബന്ധപ്പെട്ട് സിപിഐ എം സംസ്ഥാന സെക്രട്ടറിയറ്റം​ഗം പി എ മുഹമ്മദ് റിയാസിനെതിരെ മൊഴിനൽകാൻ എൻഫോഴ്സ്മെന്റ് ഡയറക്ടറേറ്റ് (ഇ ഡി) ഉദ്യോ​ഗസ്ഥർ ഭീഷണിപ്പെടുത്തിയെന്ന് ഹസൻ വാരിസ്. നിർബന്ധിച്ച് ഉ​ദ്യോ​ഗസ്ഥർ ഒപ്പുവെപ്പിച്ച മൊഴി പിൻവലിക്കണമെന്ന് ആവശ്യപ്പെട്ട് ഹസൻ വാരിസ് ഇ ഡിക്ക് സത്യവാങ്മൂലം നൽകി. ആ​ഗസ്ത് 18ന് നൽകിയ മൊഴി നിയമപരമല്ലെന്ന് ചൂണ്ടിക്കാട്ടിയാണ് സത്യവാങ്മൂലം നൽകിയത്.

റിയാസ് തനിക്ക് വൻതുക നൽകി എന്ന് പറയാൻ ഇ ഡി ആവശ്യപ്പെട്ടു. മകളെ അറസ്റ്റ് ചെയ്യുമെന്ന് ഭിഷണിപ്പെടുത്തിയാണ് സത്യവാങ്മൂലത്തിൽ ഒപ്പുവെപ്പിച്ചത്. തോക്കുധാരികൾ ഉൾപ്പെടെ ഇരുപതോളം ഉദ്യോ​ഗസ്ഥരാണ് വീട്ടിലെത്തി പരിശോധന നടത്തിയത്. വലിയ മാനസികസംഘർഷത്തിലൂടെയാണ് കടന്നുപോയത്. ഉദ്യോ​ഗസ്ഥർ നൽകിയ മൊഴിപ്പകർപ്പിൽ തന്നെക്കൊണ്ട് നിർബന്ധിച്ച് ഒപ്പുവെപ്പിക്കുകയായിരുന്നുവെന്നും അതിനാൽ അന്ന് നൽകിയ എല്ലാവിവരങ്ങളും പിൻവലിക്കണമെന്നും ഹസൻ വാരിസ് സത്യവാങ്മൂലത്തിൽ പറയുന്നു.

റിയാസിനെതിരെ കേസ് എടുക്കണമെന്ന് ആവശ്യപ്പെട്ട് ഇ ഡി കഥകെട്ടിച്ചമച്ചത് ഈ മൊഴിപ്പകർപ്പിന്റെ അടിസ്ഥാനത്തിൽകൂടിയായിരുന്നു. മൊഴി ഭീഷണിപ്പെടുത്തി സൃഷ്ടിച്ചതാണെന്ന വെളിപ്പെടുത്തൽ വന്നതോടെ ഇ ഡിയുടെ രാഷ്ട്രീയ പകപോക്കൽ കൂടുതൽ വ്യക്തമായിരിക്കുകയാണ്.