ഫ്ളക്സ് ബോർഡുകൾ നീക്കാൻ എത്തിയ തെരഞ്ഞെടുപ്പ് സ്ക്വാഡ് ഉദ്യോ​ഗസ്ഥരെ മർദിച്ച് കോൺ​ഗ്രസ് പ്രവർത്തകർ

കൊച്ചി: ഫ്ളക്സ് ബോർഡുകൾ നീക്കം ചെയ്യാൻ എത്തിയ തെരഞ്ഞെടുപ്പ് സ്ക്വാഡ് ഉദ്യോ​ഗസ്ഥർക്ക് കോൺ​ഗ്രസ് പ്രവർത്തകരുടെ ക്രൂരമർദനം. തെരഞ്ഞെടുപ്പിനോട് അനുബന്ധിച്ച് പൊതുസ്ഥലങ്ങളിൽ സ്ഥാപിച്ചിരിക്കുന്ന ഫ്‌ളക്‌സ് ബോർഡുകളും പോസ്റ്ററുകളും നീക്കം ചെയ്യാനുള്ള നിർദേശത്തിന്റെ അടിസ്ഥാനത്തിൽ എത്തിയ ഉദ്യോ​ഗസ്ഥരാണ് കോൺ​ഗ്രസ് പ്രവർത്തകരുടെ ആക്രമണത്തിന് ഇരയായത്. സംഭവത്തിന്റെ ദൃശ്യങ്ങൾ പുറത്ത് വന്നു.

കൊച്ചി മണ്ഡലത്തിലെ മാലാഖപ്പടിയിലാണ് ഉദ്യോ​ഗസ്ഥർ എത്തിയത്. ഈ സമയം തന്നെ യുഡിഎഫ് സ്ഥാനാർത്ഥി മുഹമ്മദ് ഷിയാസിന് സ്വീകരണം നൽകുന്ന പരിപാടിയും സ്ഥലത്ത് നടന്നിരുന്നു. ഉദ്യോ​ഗസ്ഥർ ഫ്ളക്സ് ബോർഡുകൾ നീക്കം ചെയ്യുന്നത് കണ്ടാണ് പ്രവർത്തകർ സ്ഥലത്തേയ്ക്ക് സംഘടിച്ച് എത്തിയത്.

ഫ്‌ളക്‌സുകൾ നീക്കം ചെയ്യണമെന്ന് ഉത്തരവുണ്ടെന്ന് ഉദ്യോഗസ്ഥർ അറിയിച്ചിട്ടും അതൊന്നും കോൺ​ഗ്രസ് പ്രവർത്തകർ മുഖവിലയ്ക്കെടുത്തില്ല. പിന്നാലെ അക്രമം അഴിച്ചു വിടുകയായിരുന്നു. കൊച്ചി കോർപ്പറേഷനിലെ ഉദ്യോഗസ്ഥരായ ജസ്റ്റിൻ, രഞ്ജൻ കുമാർ, തൻബിൻ, ഷിജിൻ എന്നിവർക്കാണ് മർദനമേറ്റത്. കോൺഗ്രസ് പ്രവർത്തകരായ പീറ്റർ, ഷിനു വിൻസെന്റ് എന്നിവരുടെ നേതൃത്വത്തിലായിരുന്നു അക്രമമെന്ന് ഉദ്യോ​ഗസ്ഥർ ആരോപിച്ചു.