ഡിജെ പാർട്ടിക്കിടെ സംഘർഷം; യുവാവിന്‌ കുത്തേറ്റു

കൊച്ചി : ഡിജെ പാർട്ടിക്കിടെ കതൃക്കടവ് ഇടശേരി ബാറിൽ സംഘർഷം. കതൃക്കടവ് മില്ലേനിയം ബാറിലാണ് ശനി രാത്രി 11ഓടെ സംഘർഷമുണ്ടായത്. ഡിജെ പാർട്ടിക്ക് എത്തിയ ഉദയംപേരൂർ സ്വദേശി ജിനിഷ സാ​ഗറിനോട് തൊടുപുഴ സ്വദേശി രാമൻകുളത്ത് വീട്ടിൽ ബഷീർ (39) അപമാര്യാദയായി പെരുമാറിയതാണ് സംഘർഷത്തിനിടയായത്. മോശമായി പെരുമാറിയ ബഷീറിനെ ജിനിഷ ബിയർ ​ഗ്ലാസുകൊണ്ട് കഴുത്തിന് പിന്നിൽ കുത്തിമുറിവേൽക്കുകയായിരുന്നെന്ന് നോർത്ത് പൊലീസ് പറഞ്ഞു. നിസാര പരിക്കേറ്റ ഇയാളെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചു. സ്ഥലത്തെത്തിയ എറണാകുളം നോർത്ത് പൊലീസ് ഡിജെ പാർട്ടി നിർത്തിവപ്പിച്ച് യുവതിയെ കസ്റ്റഡിയിലെടുത്തു.