വീൽചെയറിലെത്തി എൽഡിഎഫ് അം​ഗങ്ങൾ; അക്രമം അഴിച്ചുവിട്ട് ബിജെപി; രജിസ്റ്റർ വലിച്ചുകീറി

തിരുവനന്തപുരം: കാപ്പ കേസിൽ ജയിലിലടയ്ക്കപ്പെട്ട കൗൺസിലർക്കുവേണ്ടി തിരുവനന്തപുരം ന​ഗരസഭയിൽ അക്രമം അഴിച്ചുവിട്ട് ബിജെപി. കൗൺസിൽ യോ​ഗത്തിന്റെ അറ്റൻഡൻസ് രജിസ്റ്റർ ബിജെപി കൗൺസിലർമാർ വലിച്ചുകീറി. പ്രതിപക്ഷ കൗൺസിലർമാരെ കയ്യേറ്റം ചെയ്തു. കാപ്പാ കേസ് പ്രതിയായ വാഴോട്ടുകോണം കൗൺസിലർ ആർ സു​ഗതനെ സംരക്ഷിക്കാനായിരുന്നു ബിജെപിയുടെ ​ഗുണ്ടായിസം.

47 ദിവസമായി കൗൺസിൽ ചേർന്നിരുന്നില്ല. സു​ഗതനെ പുറത്താക്കണമെന്ന് ആവശ്യപ്പെട്ട് എൽഡിഎഫ് പ്രക്ഷോഭത്തിലുമാണ്. സു​ഗതനെ പുറത്താക്കുന്നത് കൂടാതെ തെരുവുനായപ്രശ്‌നം, മാലിന്യസംസ്‌കരണം ഉൾപ്പെടെ ജനകീയ വിഷയങ്ങളിൽ പരിഹാരം കാണുന്നതിന് പോലും ക‍ൗൺസിൽ യോഗം ചേരാൻ മേയർ വി വി രാജേഷും സംഘവും തയ്യാറായിരുന്നില്ല.

ബിജെപി ആക്രമണത്തിൽ പരിക്കേറ്റ എൽഡിഎഫ് അം​ഗങ്ങൾ വീൽചെയറിലാണ് തിങ്കളാഴ്ചത്തെ കൗൺസിൽ യോ​ഗത്തിനെത്തിയത്. സു​ഗതനെ പുറത്താക്കണമെന്ന് ആവശ്യപ്പെട്ട് എൽഡിഎഫ് അം​ഗങ്ങൾ നടുത്തളത്തിലിറങ്ങി പ്രതിഷേധിച്ചു. എന്നാൽ അജണ്ടകൾ പാസായെന്ന് അവകാശപ്പെട്ട്, കൗൺസിൽ യോ​ഗം അവസാനിപ്പിച്ച് മേയർ ഉടനടി മടങ്ങി.

ഇതിന് ശേഷമാണ് പ്രതിപക്ഷ അം​ഗങ്ങളുടെ പക്കൽനിന്നും അറ്റൻഡൻസ് രജിസ്റ്റർ ബിജെപി കൗൺസിലർമാർ പിടിച്ചുവാങ്ങിയത്. വനിതാ കൗൺസിലർമാരെ ആക്രമിക്കുകയും ചെയ്തു. ചെമ്പഴന്തി ഉദയന്റെ നേതൃത്വത്തിലായിരുന്നു ബിജെപി കൗൺസിലർമാരുടെ അക്രമം.