തൊഴിലാളി–കർഷക പോരാട്ടങ്ങൾക്ക് കരുത്തുപകർന്ന സി എച്ച്; അനുസ്മരണം നാളെ

തിരുവനന്തപുരം: കേരളത്തിലെ കമ്യൂണിസ്റ്റ് പ്രസ്ഥാനത്തിന്റെ വളർച്ചയിൽ നിർണായക പങ്കുവഹിച്ച സി എച്ച് കണാരന്റെ 54-ാം ചരമവാർഷികം ചൊവ്വാഴ്ച ആചരിക്കും. തൊഴിലാളികളെയും കർഷകരെയും സംഘടിപ്പിച്ച് അവകാശപ്പോരാട്ടങ്ങൾക്ക് നേതൃത്വം നൽകിയ സി എച്ച്, ദീർഘകാലം സിപിഐ എം സംസ്ഥാന സെക്രട്ടറിയായി പ്രവർത്തിച്ചു. കേരളത്തിന്റെ രാഷ്ട്രീയചരിത്രത്തിൽ തൊഴിലാളിവർഗ പ്രസ്ഥാനങ്ങൾക്ക് അടിത്തറ പാകിയ നേതാക്കളിലൊരാളായിരുന്നു അദ്ദേഹം.

കർഷകരുടെയും തൊഴിലാളികളുടെയും പ്രശ്നങ്ങൾ ഏറ്റെടുത്ത് നടത്തിയ പോരാട്ടങ്ങളാണ് സി എച്ചിനെ ജനകീയ നേതാവാക്കി മാറ്റിയത്. സാധാരണക്കാരുടെ ജീവിതപ്രശ്നങ്ങൾ പരിഹരിക്കാൻ സംഘടനാപരമായ ഇടപെടലുകളും ജനകീയ പ്രക്ഷോഭങ്ങളും അനിവാര്യമാണെന്ന നിലപാടിലായിരുന്നു അദ്ദേഹം. പാർടിയെ ജനങ്ങളുമായി കൂടുതൽ അടുപ്പിക്കുന്നതിനും സംഘടനാ സംവിധാനങ്ങൾ ശക്തിപ്പെടുത്തുന്നതിനും സി എച്ച് നടത്തിയ പ്രവർത്തനങ്ങൾ കേരളത്തിലെ ഇടതുപക്ഷ മുന്നേറ്റത്തിന് കരുത്തുപകർന്നു.

കമ്യൂണിസ്റ്റ് പ്രസ്ഥാനത്തിന് കനത്ത വെല്ലുവിളികൾ നേരിടേണ്ടിവന്ന കാലഘട്ടത്തിലും സംഘടനയെ മുന്നോട്ടുനയിക്കുന്നതിൽ അദ്ദേഹം പ്രധാന പങ്കുവഹിച്ചു. തൊഴിലാളി–കർഷക ഐക്യത്തിന് പ്രാധാന്യം നൽകിയ സി എച്ച്, ജനകീയ പ്രശ്നങ്ങളെ രാഷ്ട്രീയപ്രവർത്തനത്തിന്റെ കേന്ദ്രമാക്കി. കർഷകപ്രസ്ഥാനങ്ങളെയും തൊഴിലാളി സംഘടനകളെയും ശക്തിപ്പെടുത്താനുള്ള അദ്ദേഹത്തിന്റെ ഇടപെടലുകൾ കേരളത്തിലെ കമ്യൂണിസ്റ്റ് പ്രസ്ഥാനത്തിന്റെ വളർച്ചയുമായി ചേർന്നുനിൽക്കുന്നു.

ചരമവാർഷികത്തോടനുബന്ധിച്ച് സംസ്ഥാനത്തുടനീളം സിപിഐ എം നേതൃത്വത്തിൽ അനുസ്മരണ പരിപാടികൾ സംഘടിപ്പിക്കും. പാർട്ടി ഓഫീസുകൾ അലങ്കരിച്ചും പതാകകൾ ഉയർത്തിയും അനുസ്മരണ യോഗങ്ങൾ ചേർന്നുമാണ് അനുസ്മരണ പരിപാടികൾ സംഘടിപ്പിക്കുക. വിവിധ കേന്ദ്രങ്ങളിൽ സി എച്ചിന്റെ രാഷ്ട്രീയജീവിതവും സംഘടനാപ്രവർത്തനങ്ങളും അനുസ്മരിക്കും.

തലശേരി പുന്നോലിലെ സ്മൃതിമണ്ഡപത്തിൽ ചൊവ്വാഴ്ച രാവിലെ പുഷ്പാർച്ചന നടക്കും. വൈകിട്ട് തലശേരി ടൗണിൽ വളണ്ടിയർ മാർച്ചും പ്രകടനവും സംഘടിപ്പിക്കും. തുടർന്ന് ബസ് സ്റ്റാൻഡ് പരിസരത്ത് നടക്കുന്ന അനുസ്മരണ സമ്മേളനം സിപിഐ എം പൊളിറ്റ് ബ്യൂറോ അംഗം പിണറായി വിജയൻ ഉദ്ഘാടനം ചെയ്യും. കർഷക–തൊഴിലാളി പ്രസ്ഥാനങ്ങളുടെ മുന്നേറ്റത്തിനായി ജീവിതം സമർപ്പിച്ച സി എച്ചിന്റെ സ്മരണ പുതുക്കിയാണ് സംസ്ഥാനത്താകെ ദിനാചരണം നടക്കുന്നത്.