Deshabhimani

ജപ്തി ഭീഷണിയെത്തുടർന്ന് വീട്ടമ്മ ജീവനൊടുക്കിയ സംഭവം; വായ്പ എഴുതിത്തള്ളാമെന്ന് ബാങ്ക് അധികൃതർ

perambra

ബാങ്കിന് മുന്നില്‍ നാട്ടുകാര്‍ നടത്തിയ പ്രതിഷേധം

ഫോട്ടോ: ബിനുരാജ്
വെബ് ഡെസ്ക്

Published on Nov 16, 2026, 03:08 PM | 1 min read

കോഴിക്കോട്: പേരാമ്പ്രയിൽ വീട് ജപ്തി ചെയ്യാനെത്തിയതിന് തൊട്ടുമുമ്പ് വീട്ടമ്മ ജീവനൊടുക്കിയ സംഭവത്തിൽ ബാങ്ക് വായ്പ പൂർണമായി എഴുതിത്തള്ളാമെന്ന് അധികൃതർ. ഡിസംബർ 15 വരെ ജപ്തി നടപടികൾ നിർത്തിവയ്ക്കുമെന്നും വായ്പ എഴുതിത്തള്ളുന്നതുമായി ബന്ധപ്പെട്ട അന്തിമ തീരുമാനം യോ​ഗത്തിൽ ബോർഡ് ഓഫ് ഡയറക്ടേഴ്സ് സ്വീകരിക്കുമെന്നും ബാങ്ക് അധികൃതർ അറിയിച്ചു.


കോഴിക്കോട് മെഡിക്കൽ കോളേജ് മോർച്ചറിയിൽ സൂക്ഷിച്ചിരുന്ന മൃതദേഹവുമായി നാട്ടുകാരും ബന്ധുക്കളും നടുവണ്ണൂരിലെ സൗത്ത് ഇന്ത്യൻ ബാങ്ക് ശാഖയ്ക്ക് മുന്നിൽ നടത്തിയ പ്രതിഷേധത്തെത്തുടർന്നാണ് ബാങ്ക് അധികൃതരുടെ ഉറപ്പ്. നഷ്ടപരിഹാരം ഉൾപ്പെടെയുള്ള കാര്യങ്ങളിൽ ബോർഡ് ഓഫ് ഡയറക്ടേഴ്സ് യോഗം ചേർന്ന് അന്തിമ തീരുമാനമെടുക്കുമെന്നും ബാങ്ക് അധികൃതർ അറിയിച്ചു.


കവിതയുടെ മരണത്തിന് ഉത്തരവാദികളായ ബാങ്ക് അധികൃതർക്കെതിരെ കൊലക്കുറ്റത്തിന് കേസെടുക്കുക, കുടുംബത്തിന്റെ കടം പൂർണമായി എഴുതിത്തള്ളുക, നഷ്ടപരിഹാരം നൽകുക എന്നീ ആവശ്യങ്ങൾ ഉന്നയിച്ചാണ് തിങ്കളാഴ്ച നാട്ടുകാർ ബാങ്കിന് മുന്നിൽ ഉപരോധ സമരം നടത്തിയത്.


വെള്ളിയാഴ്ച പകൽ പതിനൊന്നോടെയായിരുന്നു കൂത്താളി കുഞ്ഞോത്ത് കോയ്യോടൻകണ്ടി കവിത (42) ജീവനൊടുക്കിയത്. വീട് നിർമാണത്തിനായി കവിതയും ഭർത്താവ് ബാബുവും ചേർന്ന് അഞ്ച് വർഷം മുമ്പ് നടുവണ്ണൂർ ശാഖയിൽ നിന്ന് 17 ലക്ഷം രൂപ വായ്പ എടുത്തിരുന്നു. തിരിച്ചടവ് മുടങ്ങിയതിനെത്തുടർന്ന് ബുധനാഴ്ച ബാങ്ക് അധികൃതർ വീട്ടിലെത്തി ജപ്തി നോട്ടീസ് നൽകിയിരുന്നു. പണമടയ്ക്കാൻ ഒരാഴ്ച സമയം തേടി വ്യാഴാഴ്ച കുടുംബം ബാങ്കിലെത്തിയെങ്കിലും അധികൃതർ സമയം അനുവദിച്ചില്ലെന്ന് ഭർത്താവ് ബാബു പറഞ്ഞു.


വെള്ളിയാഴ്ച രാവിലെ ഭർത്താവ് ജോലിക്കും മക്കൾ കോളേജിലും സ്കൂളിലും പോയ സമയത്താണ് കവിത ജീവനൊടുക്കിയത്. ബാങ്ക് മാനേജരും ജീവനക്കാരും പൊലീസിനൊപ്പം ജപ്തിക്കായി എത്തിയപ്പോഴാണ് സംഭവം വീട്ടുകാർ അറിയുന്നത്. ബാബു വടകരയിലെ വർക്ക്ഷോപ്പിൽ സ്പ്രേ പെയിന്ററാണ്. മക്കൾ: ആര്യശ്രീ, തേജശ്രീ.





deshabhimani section

Related News

View More
0 comments
Sort by

deshabhimani section

Dont Miss it

deshabhimani section

Recommended

Deshabhimani
Home