ഋഷഭ് പന്ത് മുതൽ വെങ്കടേഷ് അയ്യർ വരെ; ഐപിഎൽ ചരിത്രത്തിലെ ഏറ്റവും വിലപിടിപ്പുള്ള അഞ്ച് താരങ്ങൾ

ഋഷഭ് പന്ത് (ഇടത്) ശ്രേയസ് അയ്യർ (വലത്)| Photo: Creimas, Ani
ന്യൂഡൽഹി : 2027 സീസണിന് മുന്നോടിയായി ഐപിഎൽ ലേലത്തിലെ ഏറ്റവും വിലപിടിപ്പുള്ള അഞ്ച് താരങ്ങളുടെ പട്ടിക ശ്രദ്ധേയമാകുന്നു. ഇന്ത്യൻ താരങ്ങൾക്കൊപ്പം വിദേശ താരങ്ങളും റെക്കോഡ് തുക സ്വന്തമാക്കിയ പട്ടികയിൽ ഋഷഭ് പന്താണ് ഒന്നാമത്.
2025ലെ മെഗാ ലേലത്തിൽ ലഖ്നൗ സൂപ്പർ ജയന്റ്സ് 27 കോടി രൂപയ്ക്കാണ് പന്തിനെ സ്വന്തമാക്കിയത്. 2027 ഐപിഎൽ മിനി ലേലം ഡിസംബർ 16ന് ഗോവയിൽ നടക്കാനിരിക്കെ, ലേല ചരിത്രത്തിലെ ഏറ്റവും വിലപിടിപ്പുള്ള അഞ്ച് താരങ്ങളും അവരുടെ നിലവിലെ ടീമുകളും ശ്രദ്ധേയമാകുന്നു.
ഋഷഭ് പന്ത് – 27 കോടി രൂപ (ലഖ്നൗ സൂപ്പർ ജയന്റ്സ്, 2025)
ഐപിഎൽ ചരിത്രത്തിലെ ഏറ്റവും വിലപിടിപ്പുള്ള താരമാണ് ഋഷഭ് പന്ത്. 2025ലെ മെഗാ ലേലത്തിൽ 27 കോടി രൂപയ്ക്കാണ് ലഖ്നൗ താരത്തെ സ്വന്തമാക്കിയത്. നേരത്തെ ഡൽഹി ക്യാപിറ്റൽസിന്റെ നായകനായിരുന്നു പന്ത്. ലഖ്നൗവിനായി രണ്ട് സീസണുകൾ കളിച്ച താരം 2027 സീസണിന് മുന്നോടിയായി ഡൽഹി ക്യാപിറ്റൽസിലേക്ക് തിരിച്ചെത്തി. കുൽദീപ് യാദവിനെ ഉൾപ്പെടുത്തിയ ട്രേഡ് ഇടപാടിലൂടെയാണ് പന്തിന്റെ മടക്കം.
ശ്രേയസ് അയ്യർ – 26.75 കോടി രൂപ (പഞ്ചാബ് കിങ്സ്, 2025)
2025ലെ ലേലത്തിൽ പന്ത് റെക്കോഡ് തുക സ്വന്തമാക്കുന്നതിന് തൊട്ടുമുമ്പ് ഏറ്റവും വിലപിടിപ്പുള്ള താരമായത് ശ്രേയസ് അയ്യരായിരുന്നു. 26.75 കോടി രൂപയ്ക്കാണ് പഞ്ചാബ് കിങ്സ് താരത്തെ സ്വന്തമാക്കിയത്. 2024ൽ കൊൽക്കത്ത നൈറ്റ് റൈഡേഴ്സിനെ ഐപിഎൽ കിരീടത്തിലേക്ക് നയിച്ച നായകനെന്ന മികവുമായാണ് ശ്രേയസ് ലേലത്തിനെത്തിയത്. 2025ൽ പഞ്ചാബിനെ ഫൈനലിലെത്തിച്ച താരം നിലവിൽ ടീമിന്റെ നായകനായി തുടരുന്നു.
കാമറൂൺ ഗ്രീൻ – 25.20 കോടി രൂപ (കൊൽക്കത്ത നൈറ്റ് റൈഡേഴ്സ്, 2026)
ഏറ്റവും വിലപിടിപ്പുള്ള വിദേശ താരമാണ് ഓസ്ട്രേലിയൻ ഓൾറൗണ്ടർ കാമറൂൺ ഗ്രീൻ. 2026ലെ ലേലത്തിൽ 25.20 കോടി രൂപയ്ക്കാണ് കൊൽക്കത്ത നൈറ്റ് റൈഡേഴ്സ് താരത്തെ സ്വന്തമാക്കിയത്. നേരത്തെ മുംബൈ ഇന്ത്യൻസ്, റോയൽ ചലഞ്ചേഴ്സ് ബെംഗളൂരു ടീമുകൾക്കായും കളിച്ചിട്ടുണ്ട്. 2027 സീസണിലേക്ക് കൊൽക്കത്ത താരത്തെ നിലനിർത്തിയിട്ടുണ്ട്.
മിച്ചൽ സ്റ്റാർക്ക് – 24.75 കോടി രൂപ (കൊൽക്കത്ത നൈറ്റ് റൈഡേഴ്സ്, 2024)
2024ലെ ലേലത്തിൽ 24.75 കോടി രൂപയ്ക്കാണ് ഓസ്ട്രേലിയൻ പേസർ മിച്ചൽ സ്റ്റാർക്കിനെ കൊൽക്കത്ത നൈറ്റ് റൈഡേഴ്സ് സ്വന്തമാക്കിയത്. ആ സീസണിൽ കൊൽക്കത്ത കിരീടം നേടിയപ്പോൾ സ്റ്റാർക്ക് നിർണായക പ്രകടനം നടത്തി. ഫൈനലിൽ സൺറൈസേഴ്സ് ഹൈദരാബാദിനെതിരെ രണ്ട് വിക്കറ്റും നേടി. സീസണിൽ 14 മത്സരങ്ങളിൽനിന്ന് 17 വിക്കറ്റുകളാണ് താരത്തിന്റെ സമ്പാദ്യം.
2025ലെ മെഗാ ലേലത്തിൽ 11.75 കോടി രൂപയ്ക്ക് ഡൽഹി ക്യാപിറ്റൽസ് സ്റ്റാർക്കിനെ സ്വന്തമാക്കി. എന്നാൽ 2027 സീസണിന് മുന്നോടിയായി താരം ടീമിൽനിന്ന് പുറത്തായി. തിരക്കേറിയ രാജ്യാന്തര മത്സരക്രമത്തിനിടെ ജോലിഭാരം നിയന്ത്രിക്കാനാണ് സ്റ്റാർക്ക് ഐപിഎല്ലിൽനിന്ന് വിട്ടുനിൽക്കാൻ തീരുമാനിച്ചതെന്നാണ് റിപ്പോർട്ട്.
വെങ്കടേഷ് അയ്യർ – 23.75 കോടി രൂപ (കൊൽക്കത്ത നൈറ്റ് റൈഡേഴ്സ്, 2025)
2025ലെ മെഗാ ലേലത്തിൽ 23.75 കോടി രൂപയ്ക്കാണ് കൊൽക്കത്ത നൈറ്റ് റൈഡേഴ്സ് വെങ്കടേഷ് അയ്യരെ വീണ്ടും ടീമിലെത്തിച്ചത്. 2024ൽ കൊൽക്കത്ത കിരീടം നേടിയപ്പോൾ ടീമിന്റെ ഭാഗമായിരുന്നു താരം. എന്നാൽ 2025 സീസണിന് ശേഷം കൊൽക്കത്ത താരത്തെ ഒഴിവാക്കി. 2026ലെ ലേലത്തിൽ ഏഴ് കോടി രൂപയ്ക്ക് റോയൽ ചലഞ്ചേഴ്സ് ബംഗളൂരു സ്വന്തമാക്കി. 2026 സീസണിൽ ഏഴ് മത്സരങ്ങളിൽനിന്ന് 186.60 സ്ട്രൈക്ക് റേറ്റിൽ 209 റൺസ് നേടി. 2027 സീസണിലേക്ക് ആർസിബി താരത്തെ നിലനിർത്തിയിട്ടുണ്ട്.








0 comments