ഇഡിയുടേത് ആസൂത്രിത ആക്രമണം; ഇല്ലാക്കഥകൾ മെനയുന്നു: കെ എൻ ബാല​ഗോപാൽ

തിരുവനന്തപുരം: കേരളത്തിൽ എൻഫോഴ്സ്മെന്റ് ഡയറക്ടറേറ്റ് നടത്തുന്നത് ആസൂത്രിതമായ ആക്രമണമെന്ന് സിപിഐ എം കേന്ദ്രകമ്മിറ്റിയംഗം കെ എൻ ബാല​ഗോപാൽ. നേരത്തെ സ്വർണക്കടത്ത് ഉപയോ​ഗിച്ച് കഥകൾ മെനഞ്ഞു, പിന്നീട് ടി വീണയുടെ കമ്പനിയായ എക്സാലോജിക് വെച്ച് മറ്റൊരു കള്ളവാർത്ത പടച്ചു. ഇതെല്ലാം പ്രതിപക്ഷത്തെ ഇല്ലാതാക്കാനുള്ള ശ്രമത്തിന്റെ ഭാ​ഗമാണെന്ന് അദേഹം പറഞ്ഞു. ഇപ്പോൾ ഇഡിയുടെ ആരോപണങ്ങളിലും യാതൊരു അടിസ്ഥാനവുമില്ലെന്ന രേഖകളാണ് പുറത്തുവരുന്നതും ബാല​ഗോപാൽ വ്യക്തമാക്കി.

ഇഡിയെ ഉപയോഗിച്ച് രാഷ്ട്രീയപ്രതിയോ​ഗികളെ ഇല്ലാതാക്കാനുള്ള ശ്രമം ഇതിനു മുൻപും ഉണ്ടായിട്ടുണ്ട്. ‌പഞ്ചാബിലുണ്ടായിട്ടുണ്ട്. ഡൽഹിയിലെ മുഖ്യമന്ത്രി ഉപമുഖ്യമന്ത്രി തുടങ്ങിയ ആളുകളെ എങ്ങനെയാണ് കൈകാര്യം ചെയ്തതെന്നും കണ്ടതാണ്. മറ്റു സംസ്ഥാനങ്ങളിലും സമാനമാണ്. കോൺ​ഗ്രസ് നേതാക്കളായ സോണിയാ ​ഗാന്ധി, രാഹുൽ ​ഗാന്ധി എന്നിവർക്കെതിരായ കേസുകൾ ഇപ്പോഴും തുടരുകയാണ്. ഇത്തരത്തിൽ രാഷ്ട്രീയ വൈരാ​ഗ്യം തീർക്കാനുള്ള ശ്രമങ്ങളുടെ ഭാ​ഗമാണ് ഇപ്പോൾ കേരളത്തിലും കണ്ടുകൊണ്ടിരിക്കുന്നതെന്ന് ബാല​ഗോപാൽ പറഞ്ഞു. ഇടതുപക്ഷത്തെ ദുർബലമാക്കാൻ ഉള്ള ശ്രമം നടക്കില്ലെന്നും അദേഹം കൂട്ടിച്ചേർത്തു.

ഇഡി ഈ തിരക്കഥ പെട്ടെന്ന് ഉണ്ടാക്കി വന്നതാണ് എന്ന് കരുതാനാകില്ലെന്നും അദേഹം പറഞ്ഞു. മൂന്നു മാസം മുൻപ് പറഞ്ഞതല്ല ഇപ്പോൾ പറയുന്നത്. ഈ കേസ് സംബന്ധിച്ച് കേരള സർക്കാരിന്റെ ​ഗ്രൗണ്ടിലേയ്ക്കാണ് ഇപ്പോൾ ഫുട്ബോൾ ഇട്ടുകൊടുത്തിരിക്കുന്നത്. ഇഡിക്ക് കേസിനകത്ത് ഇടപെട‌ണമെങ്കിൽ സംസ്ഥാന പൊലീസ് കേസെടുക്കണം. ഇത് വലിയൊരു ആസൂത്രിതമായ നീക്കമാണെന്നും ബാല​ഗോപാൽ പറഞ്ഞു.