മരട് പോലീസ് സ്റ്റേഷനിൽ ഉദ്യോഗസ്ഥരെ ആക്രമിച്ച് എംഡിഎംഎ കേസ് പ്രതി; മൂന്ന് പൊലീസുകാര്‍ക്ക് പരിക്ക്

കൊച്ചി : മരട് പൊലീസ് സ്റ്റേഷനിൽ എംഡിഎംഎ കേസിലെ പ്രതി പൊലീസുകാരെ ആക്രമിച്ചു. ആക്രമണത്തിൽ എസ്ഐ ജാക്സൺ, എഎസ്‌ഐ സുമേഷ്, സിപിഒ ഫസൽ എന്നിവർക്കാണ് പരിക്കേറ്റത്. ആലപ്പുഴ സ്വദേശി രഞ്ജിത്താണ് പൊലീസുകാരെ ആക്രമിച്ചത്. സംഭവത്തിൽ മൂന്ന് ഉദ്യോ​ഗസ്ഥർക്കും പരിക്കേറ്റു.

മരടിലെ ഒരു ഫ്ലാറ്റിൽ എംഡിഎംഎ ഉപയോ​ഗിച്ച ശേഷം പ്രതി ബഹളമുണ്ടാക്കിയെന്ന വിവരം ലഭിച്ചതിനെ തുടർന്നാണ് പൊലീസ് ഇയാളെ കസ്റ്റഡിയിലെടുത്തത്. സ്റ്റേഷനിലെത്തിച്ച ശേഷം ചോദ്യം ചെയ്യുന്നതിനിടെയാണ് പ്രതി ഉദ്യോ​ഗസ്ഥരെ ആക്രമിച്ചത്. സ്വയം ദേഹോപദ്രവം ചെയ്യാൻ ശ്രമിച്ച പ്രതിയെ തടയുന്നതിനിടെയാണ് എസ്ഐ കടന്നാക്രമിക്കുന്നതെന്നാണ് ലഭിക്കുന്ന വിവരം.

സിപിഒ ഫസലിന്റെയും എഎസ്‌ഐയുടെയും കൈ പ്രതി തിരിച്ച് ഒടിച്ചു. പരിക്കേറ്റ പൊലീസ് ഉദ്യോ​ഗസ്ഥരെ എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തെ തുടർന്ന് പ്രതി രഞ്ജിത്തിനെ മെഡിക്കൽ കോളേജ് സെല്ലിലേക്ക് മാറ്റി. ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസ്സപ്പെടുത്തിയതിനും പൊലീസുകാരെ ആക്രമിച്ചതിനും പ്രതിക്കെതിരെ പ്രത്യേക കേസും രജിസ്റ്റർ ചെയ്തിട്ടുണ്ട്.