ഹർഗിലകൾക്ക് ഒരു പോറ്റമ്മ

‘പരിസ്ഥിതിയില്ലാതെ നമ്മളില്ല. പരിസ്ഥിതിയെ സംരക്ഷിക്കാതെ നമുക്കു മുന്നോട്ടുപോകാനുമാകില്ല. മനുഷ്യൻമാത്രമല്ല ഓരോ ജീവജാലവും പരിസ്ഥിതിയുടെ ഭാഗമാണ്. ഭൂമിയുടെ നിലനിൽപ്പിൽ അതിനോരോന്നിനും അതിന്റേതായ സ്ഥാനമുണ്ട്. ഒരുപക്ഷേ മനുഷ്യനേക്കാൾ പ്രാധാന്യമർഹിക്കുന്ന രീതിയിൽ. ആ സത്യം തിരിച്ചറിയുക എന്നതാണ് നമുക്കുവേണ്ട പ്രാഥമിക പാഠം’. ഇത്തവണത്തെ ടൈംസ് മാഗസിൻ അന്താരാഷ്ട്ര പുരസ്‌കാരം നേടിയ ജീവശാസ്ത്രജ്ഞയും വന്യജീവിസംരക്ഷകയും അസമിലെ അരണ്യം വൈൽഡ് ലൈഫ് അക്കാദമി ഡയറക്ടറുമായ ഡോ. പൂർണിമാദേവി ബർമന്റെ വാക്കുകളാണിത്. സ്റ്റോർക്ക് എന്നറിയപ്പെടുന്ന എല്ലുതീനി കൊക്കുകളെയും അവയുടെ ആവാസവ്യവസ്ഥയെയും സംരക്ഷിക്കുന്ന പ്രവർത്തനങ്ങൾക്കാണ് ഡോ. പൂർണിമയ്‌ക്ക്‌ അന്താരാഷ്ട്ര ബഹുമതി.

പ്രകൃതിയിൽ മൊട്ടിട്ട ബാല്യം

അസമിലെ കാമരൂപ് ജില്ലയിലെ ഉൾഗ്രാമത്തിൽ ഭബാനി കാന്താ ശർമയുടെയും മനോമതിദേവിയുടെയും മകളാണ്‌ പൂർണിമ. അഞ്ചാംവയസ്സിൽ ബ്രഹ്മപുത്രയുടെ തീരത്തുള്ള വീട്ടിൽ മുത്തശ്ശിക്കൊപ്പം കഴിയുമ്പോൾ അവിടെ അപൂർവഭംഗിയുള്ള ഗ്രേറ്റർ അഡ്ജറ്റന്റ് സ്റ്റോർക്ക് എന്ന ഭീമൻ എല്ലുതീനിക്കൊക്കുകളെ കണ്ടു. ആ പറവകൾ അന്യംനിന്നുപോകുന്നുവെന്നും അവ ഇല്ലാതായാൽ ഭൂമിയിൽ ഉണ്ടാകാവുന്ന പാരിസ്ഥിതികപ്രശ്നങ്ങളെക്കുറിച്ചും ദീർഘവീക്ഷണമുള്ള മുത്തശ്ശി കുട്ടിയെ ബോധ്യപ്പെടുത്തി. അന്നുതൊട്ട് തുടങ്ങിയ ഹർഗിലസ്നേഹമാണ് പൂർണിമയുടെ ഇതുവരെയുള്ള പരിസ്ഥിതിപ്രവർത്തനങ്ങൾക്കും നേട്ടങ്ങൾക്കും പിന്നിൽ. പാലസ് ബാരി അഞ്ചലിക് ഹൈസ്കൂളിലെ പഠനശേഷം മിർസയിലെ ഡികെ കോളേജിൽനിന്ന് ഡിഗ്രി, മാസ്റ്റേഴ്സ് പഠനം പൂർത്തിയാക്കി. പിന്നീട് ഗുവാഹത്തി യൂണിവേഴ്സിറ്റിയിൽനിന്ന്‌ ഡോക്ടറേറ്റ് നേടി. ഫോറെജിങ് ഇക്കോളജി, ബ്രീഡിങ് സക്സസ്സ് ആൻഡ് ജനറ്റിക് സ്റ്റാറ്റസ് ഓഫ് ഗ്രേറ്റർ അഡ്ജറ്റന്റ് സ്റ്റോർക്സ് എന്ന വിഷയത്തിൽ പ്രൊഫ. വി കെ ശർമയുടെ കീഴിലായിരുന്നു പഠനം.

എല്ലുതീനിക്കൊക്കുകൾ

ലെപ്റ്റോപ്ടൈലോസ് ഡബിയസ് (Leptoptilos dubius) എന്ന ശാസ്ത്രനാമമുള്ള കൊക്കുവർഗമാണ് ഹർഗില എന്ന എല്ലുതീനിക്കൊക്കുകൾ. പേരുപോലെതന്നെ എല്ലുകളും ശവങ്ങളും ഭക്ഷിക്കുന്നതുകൊണ്ടാണ് ഇവയ്‌ക്ക് ഈ പേര് വന്നത്. ഒന്നര മീറ്റർ ഉയരവും നല്ല വലിപ്പവും കാണാൻ ഏറെ ഭംഗിയുമുള്ള കൊറ്റിവർഗമാണിത്. നീണ്ട കാലുകളും കൂർത്ത് കട്ടിയുള്ള കൊക്കും കറുത്ത പൊട്ടുള്ള വെള്ളാരങ്കണ്ണുകളും ഓറഞ്ചും മഞ്ഞയും തവിട്ടും കലർന്ന, തൂങ്ങിയ ചർമമുള്ള കഴുത്തുമാണ് ആകർഷണം. കറുപ്പും വെളുപ്പും ചാരനിറവുമുള്ള ഒന്നര മീറ്ററോളം വിരിയാൻ ശേഷിയുള്ള ചിറകുകൾ ഇവയ്‌ക്കുണ്ട്. പറക്കുമ്പോൾ കറുപ്പുചേലയിൽ വെളുത്ത വരപോലെയുള്ള ചിറകുകളും. വനമരങ്ങളിലും ചതുപ്പുകളോട് ചേർന്ന വൃക്ഷങ്ങളിലുമാണ് ഇവയുടെ വാസം. അസം ഉൾപ്പെടെ ഇന്ത്യയുടെ വടക്കുകിഴക്കൻ സംസ്ഥാനങ്ങളിലും നേപ്പാൾ, തായ്‌ലൻഡ്, കംബോഡിയ തുടങ്ങിയ രാജ്യങ്ങളിലുമാണ് ഹർഗിലകളെ കാണുന്നത്‌.

ഹർഗില ആർമി ​

ജന്തുശാസ്ത്രത്തിൽ ബിരുദാനന്തര ബിരുദവും ഡോക്ടറേറ്റുമുള്ള പൂർണിമ ഗവേഷണപ്രബന്ധം തയ്യാറാക്കുന്നതിനിടയിൽ ഹർഗിലക്കുഞ്ഞുങ്ങളെ സംരക്ഷിക്കാനുള്ള പദ്ധതികൾക്കും തുടക്കമിട്ടു. 2007ൽ ഹർഗില ആർമിക്ക് തുടക്കമിട്ടു. പലരും ഇത് ഏറ്റെടുക്കാൻ വിമുഖത കാട്ടി. മാംസഭോജികളും ശവംതീനികളുമായ കൊക്കുകളെ ശാപംപിടിച്ച പക്ഷിയായും അപശകുനമായും കരുതിപ്പോന്ന ഗ്രാമവാസികൾക്കിടയിലായിരുന്നു പൂർണിമ തന്റെ പദ്ധതികളുമായി ഇറങ്ങിച്ചെന്നത്. പൂർണിമ തന്റെ ഉദ്യമത്തിൽനിന്ന് പിന്മാറിയില്ല. മത്സ്യമാംസാവശിഷ്ടങ്ങൾ കുമിഞ്ഞുകൂടാതെ തടയുന്ന പരിസ്ഥിതിസൗഹൃദപദ്ധതിയുടെ പ്രധാന പങ്കാളികളാണ് ഹർഗിലയെന്നും അവയെ നിലനിർത്തേണ്ടത് അനിവാര്യതയാണെന്നുമുള്ള തിരിച്ചറിവ് ജനങ്ങൾക്ക് പകർന്നുനൽകി. നിരന്തര ബോധവൽക്കരണത്തിലൂടെ സ്ത്രീകളെ മുന്നിൽ നിരത്തി ഹർഗില ആർമിക്ക് തുടക്കമിട്ടു. 2007ൽ ആരംഭിച്ച ഹർഗില ആർമിയിൽ ഇന്ന് പതിനായിരത്തിലധികം സ്ത്രീകളുണ്ട്.

വേറിട്ട മാതൃക

ഹർഗിലകളുടെ ആവാസവ്യവസ്ഥകൾ സന്ദർശിച്ചും അവയുടെ ജീവിതരീതിയെക്കുറിച്ച് പഠിച്ചും മനസ്സിലാക്കിയും കാടും മേടും താണ്ടിയുള്ള തുടർപ്രവർത്തനങ്ങളിലൂടെയാണ് ഹർഗില ആർമിയുടെ പ്രയാണം. പരിക്കുപറ്റിയ കുഞ്ഞുങ്ങളെ പരിപാലിച്ച് അവയുടെ വളർച്ചഘട്ടങ്ങളെ നിരന്തരമായി നിരീക്ഷിച്ച് ജീവിതത്തിലേക്ക് തിരിച്ചുവിടുന്നു. ഹർഗിലത്തലയുള്ള തൊപ്പികളണിഞ്ഞും പക്ഷിക്കുഞ്ഞുങ്ങൾക്ക് തൊട്ടിൽ ഒരുക്കിയും ആർമി പ്രവർത്തകർ ജോലിയിൽ ആഹ്ലാദം കണ്ടെത്തുന്നു.

വിശേഷാവസരങ്ങളിലും ഉത്സവനാളുകളിലും പാചകമത്സരങ്ങളും കലാമത്സരങ്ങളും നടത്തി ആളുകളെ ബോധവൽക്കരിക്കുന്നു. സാമൂഹ്യ ബോധവൽക്കരണവും സാമ്പത്തികോന്നമനവും ലക്ഷ്യമിട്ട് വൈവിധ്യമാർന്ന സ്വയംതൊഴിൽ സംരംഭങ്ങൾക്ക് വഴിയൊരുക്കി. നൂൽനൂൽപ്പും ഹർഗിലച്ചിത്രങ്ങളുള്ള വസ്ത്രനിർമാണവും ആഭരണനിർമാണവും നടത്തി. സാരി, ബ്ലൗസ്, ഷാളുകൾ, അലങ്കാരവസ്ത്രങ്ങൾ, മാലകൾ, വളകൾ, കമ്മലുകൾ, ലോക്കറ്റുകൾ തുടങ്ങിയവ സ്വന്തമായി നിർമിച്ചും ധരിച്ചും പ്രചരിപ്പിച്ചും സ്ത്രീകൾ കരുത്തരായി. കാമരൂപ് ജില്ല ലോകത്തിലെ ഏറ്റവും വലിയ സ്റ്റോർക്കുകളുടെ പ്രജനന കോളനിയായി മാറി. ഹർഗിലകൾ വസിക്കുന്ന ഇനത്തിൽപ്പെട്ട 45,000 വൃക്ഷത്തൈകൾ പലയിടങ്ങളിലായി നട്ടുവളർത്തി. വീണ്ടും 60,000 തൈകൾകൂടി നടാൻ പദ്ധതിയിട്ടു. ഒപ്പം മാലിന്യമുക്തമായ പരിസ്ഥിതിസൂക്ഷിപ്പിനുള്ള പദ്ധതികളും തുടങ്ങി. പ്ലാസ്റ്റിക് നിരോധനം, തണ്ണീർത്തടസംരക്ഷണം, വനസംരക്ഷണം എന്നിവയെക്കുറിച്ച് സമൂഹത്തെ ബോധവൽക്കരിച്ചു.

2007ൽ ഹർഗില ആർമി തുടങ്ങുന്ന കാലത്ത് 450 ഹർഗിലകൾമാത്രമേ അസമിൽ ഉണ്ടായിരുന്നുള്ളൂ. ഇന്നിപ്പോഴത് 1800 ആയി. 2030ഓടെ അത് 5000ത്തിൽ എത്തിക്കുക എന്നതാണ് ലക്ഷ്യം. ഇപ്പോൾ ലോകത്താകമാനമുള്ളത് 3800 ഹർഗിലകൾമാത്രമാണ്– പൂർണിമ പറഞ്ഞു. പ്രവർത്തനങ്ങൾക്ക് കരുത്തും പിന്തുണയുമേകി ഭർത്താവ്, വൈൽഡ് ലൈഫ് ട്രസ്റ്റ് ഓഫ് ഇന്ത്യ ജോയിന്റ് ഡയറക്ടർ ഡോ. രത്തിൻ ബർമനും മക്കൾ സംപ്രീതി ബർമനും സംസ്കൃതി ബർമനും കൂടെയുണ്ട്.

കൂട്ടായ്‌മയുടെ വിജയം

ടൈംസ് പുരസ്കാരം ഉൾപ്പെടെയുള്ള ബഹുമതികളെല്ലാം കൂട്ടായ്മയുടെ വിജയമാണ്. വേൾഡ് ഫീമെയിൽ റേഞ്ചർ അവാർഡ്, ഗ്രീൻ ഓസ്കാർ അവാർഡ്, വിറ്റ്ലി ഗോൾഡ് അവാർഡ്, ചാമ്പ്യൻസ് ഓഫ് എർത്ത് അവാർഡ്, യുണൈറ്റഡ് നേഷൻസ് ഹൈയെസ്റ്റ് എൻവിറോൺമെന്റ് അവാർഡ് തുടങ്ങി പല ബഹുമതികൾ കിട്ടിയിട്ടുണ്ട്. ഇവയെല്ലാം ഹർഗില -പരിസ്ഥിതിസംരക്ഷണ പ്രവർത്തനങ്ങൾക്കുള്ള അംഗീകാരങ്ങളാണ്.