ജീവിതം പൂവിടും വീടുകൾ; കണ്ണൂർ ജില്ലയിൽ 241 സ്‌നേഹവീടുകൾ

തലശേരി : മഴയിൽ ചോർന്നൊലിക്കുന്ന, എപ്പോൾ വേണമെങ്കിലും തകരാവുന്ന വീട്. കിടപ്പുരോഗിയായ അമ്മയെ തനിച്ചാക്കി ഭിന്നശേഷിക്കാരനായ ചന്ദ്രശേഖരൻ ലോട്ടറിവിൽക്കാൻ പോവുമ്പോൾ മനസ്‌ നിറയെ ആധിയായിരുന്നു. തുണയായി സിപിഐ എം എത്തി. മുറ്റംനിറയെ പൂക്കളുള്ള മനോഹരമായ വീട്‌ നിർമിച്ചുനൽകി. എരഞ്ഞോളി ചോനാടത്തെ മള്ളേരിവീട്ടിൽ കെ പി ചന്ദ്രശേഖരൻ സിപിഐ എമ്മിന്റെ സ്‌നേഹവീടിന്റെ തണലിലാണിപ്പോൾ.

‘ഇങ്ങനൊരു വീടൊന്നും സ്വപ്‌നത്തിലേ ഉണ്ടായിരുന്നില്ല. ജീവിതത്തിലേക്ക്‌ കൈപിടിച്ചത്‌ പാർടിയാണ്‌. മഴയും വെയിലുമേൽക്കാതെ ഇപ്പോൾ കിടന്നുറങ്ങാം. ഇ‍ൗ പാർടി എന്നും ഹൃദയത്തിലുണ്ടാകും. മറക്കില്ല മരിക്കുവോളം’– ലോട്ടറിവിൽപ്പനക്കാരനായ ചന്ദ്രശേഖരൻ പറയുന്നു. നാലുസെന്റിലെ കട്ടപ്പുരയിലായിരുന്നു ചന്ദ്രശേഖരനും കിടപ്പുരോഗിയായ അമ്മ ലീലയും താമസിച്ചിരുന്നത്‌. സിപിഐ എം വീടുനിർമാണം ഏറ്റെടുത്തതോടെ എല്ലാം അതിവേഗമായി. കല്ലും പൂഴിയും സിമന്റും സംഭാവന നൽകി രാഷ്‌ട്രീയഭേദമന്യേ സുമനസ്സുകൾ സഹകരിച്ചു.


ബിരിയാണി ചാലഞ്ചിലൂടെയും പണം സമാഹരിച്ചു. 12 ലക്ഷത്തോളം രൂപ ചെലവിൽ പണിത വീട്‌ 2020 ജൂലൈ ഏഴിന്‌ അന്നത്തെ ജില്ലാ സെക്രട്ടറി എം വി ജയരാജൻ കൈമാറി. പുതിയ വീട്ടിൽ രണ്ടുവർഷത്തോളം താമസിച്ച ശേഷമാണ്‌ ചന്ദ്രശേഖരന്റെ അമ്മ ലീല (87) അന്തരിച്ചത്‌. കണ്ണൂർ ജില്ലയിലാകെ 241 സ്‌നേഹവീടുകളാണ്‌ ഇതിനകം പാർടി കൈമാറിയത്‌.