ഓർമത്തിരശീലയിൽ കാലം മാറുന്നു

''അന്നെനിക്ക് നാലോ അഞ്ചോ വയസ്സുകാണും. സേലത്തെ മോഡേൺ തിയറ്റേഴ്സ് എന്ന സ്റ്റുഡിയോയിലായിരുന്നു ഷൂട്ടിങ്‌. ഞാൻ കാൽവഴുതി കുളത്തിലേക്ക്‌ വീഴുന്ന രംഗമാണ്. പെട്ടെന്ന് അവിടെയെത്തുന്ന കരുണാകരനമ്മാവൻ (കാമ്പിശേരി കരുണാകരൻ) വെള്ളത്തിൽ കിടന്ന്‌ കരയുന്ന എന്നെ പൊക്കിയെടുത്ത് ചെറിയമ്മയുടെ (പങ്കജവല്ലി) കൈയിലേൽപ്പിച്ചു. തുടർന്നുള്ള പല രംഗങ്ങളിലും ഞാനുണ്ടായിരുന്നു. കാലം എത്ര കടന്നുപോയിരിക്കുന്നു. അന്നു ഞാൻ പങ്കജവല്ലിയമ്മയുടെ കൈയിലിരുന്ന് കരയുന്ന ഫോട്ടോ എന്റെ പക്കലുണ്ട്. ഇടയ്ക്കിടെ അതെടുത്ത്‌ നോക്കുമ്പോൾ പഴയകാര്യങ്ങൾ സിനിമയിലെന്നപോലെ ഓർമയിലെത്തും. എന്റെ അമ്മയുടെ അടുത്തബന്ധുമാണ് കാമ്പിശേരിയങ്കിൾ. ചെങ്ങന്നൂർ അങ്ങാടിക്കലിൽ ഞങ്ങളുടെ അയൽവാസിയായിരുന്നു അക്കാലത്തെ തിരക്കുള്ള നടി പങ്കജവല്ലിക്കുഞ്ഞമ്മ. രണ്ടുപേരുമായും നല്ല പരിചയവും അടുപ്പവുമുണ്ടായിരുന്നത്‌ കാരണം സിനിമാഷൂട്ടിങ്ങിനിടെ എനിക്ക് പരിഭ്രമമൊന്നും തോന്നിയില്ല. തന്നെയുമല്ല, അച്ഛനും അമ്മയും എപ്പോഴും ഒപ്പം ഉണ്ടായിരുന്നു. ചെങ്ങന്നൂരിൽ അന്ന് ഒരു സിനിമാക്കൊട്ടകയേ ഉണ്ടായിരുന്നുള്ളൂ. ഞങ്ങളുടെ യൂണിയൻ ടാക്കീസ് (കെആർ തിയറ്റർ). അവിടെയിരുന്നാണ് അച്ഛന്റെ സിനിമകളൊക്കെ കണ്ടത്.'' 1955ൽ പുറത്തിറങ്ങിയ 'കാലം മാറുന്നു' എന്ന സിനിമയിൽ പങ്കജവല്ലിയുടെ മകളായി അഭിനയിച്ച ഷീബ എന്ന ഇപ്പോഴത്തെ എഴുപത്തഞ്ചുവയസ്സുകാരി, കറുപ്പിലും വെളുപ്പിലും മിന്നിമറയുന്ന പഴയ ഓർമകൾ ഓരോന്നായി പങ്കുവയ്ക്കുന്നു.

കൈലാസ് പിക്ചേഴ്സ്

മലയാളസിനിമ പിച്ചവച്ചുതുടങ്ങിയ അന്പതുകളിൽ ശശിധരൻ, ലോകനീതി, കാലം മാറുന്നു, ത്യാഗഭൂമി, യാചകൻ, ചേച്ചി തുടങ്ങി എട്ടോളം സിനിമകൾ നിർമിച്ച കൊച്ചാരിശേരിൽ കെ കെ നാരായണന്റെ മകളാണ് ഷീബ. നാരായണനെയും അദ്ദേഹത്തിന്റെ കൈലാസ് പിക്ചേഴ്സ് എന്ന സിനിമാ നിർമാണസ്ഥാപനത്തെയും ഇന്ന് അധികമാരും ഓർക്കാനിടയില്ല. തമിഴ്, തെലുഗു, ഹിന്ദി സിനിമകൾ പണംവാരിപ്പോകുകയും മലയാളസിനിമകൾ പരാജയപ്പെടുകയും ചെയ്തുകൊണ്ടിരുന്ന അന്പതുകളിൽ, മലയാളത്തനിമയുള്ള സിനിമകൾ നിർമിച്ച്‌ മലയാളിയുടെ സിനിമാസങ്കൽപ്പങ്ങൾക്ക് മാറ്റംവരുത്താൻ ശ്രമിച്ച ആദ്യകാല സിനിമാനിർമാതാക്കളിൽ ഒരാളായിരുന്നു സ്വാമിനാരായണൻ എന്ന കെ കെ നാരായണൻ. തന്റെ ഭാര്യ പത്മാവതിയമ്മയുടെ പേരിലുള്ള പത്മ പിക്ചേഴ്സിന്റെ ബാനറിലും സിനിമകൾ നിർമിച്ചിട്ടുണ്ട്.

ഒരു കുടുംബ ആഘോഷത്തിനിടെ എടുത്ത ചിത്രം. സത്യൻ, ബഹദൂർ, പ്രേംനവാസ് എന്നിവരെയും കാണാം.മുന്നിൽ ഇടതുവശം കറുത്ത ഉടുപ്പിട്ടുനിൽക്കുന്നത് ഷീബ. (അവ്യക്തമായ ചിത്രം എഐ സഹായത്തോടെ പുനഃസൃഷ്ടിച്ചത്)

പ്രമുഖരുടെ സിനിമാ അരങ്ങേറ്റം

''പിൽക്കാലത്ത് പ്രശസ്തരായിത്തീർന്ന പലരുടെയും കഴിവുകൾ കണ്ടറിഞ്ഞ് അവരെ സിനിമാരംഗത്ത് കൊണ്ടുവന്നത് അച്ഛനാണ്. നാടകനടനായിരുന്ന കെ പി ഉമ്മർ ആദ്യമായി അഭിനയിച്ചത് അച്ഛന്റെ ‘ത്യാഗഭൂമി’ എന്ന സിനിമയിലാണ്. പല കാരണങ്ങളാൽ ആചിത്രം വെളിച്ചം കണ്ടില്ല. കവിയൂർ രേവമ്മ എന്ന ഗായികയുടെ സിനിമാരംഗത്തേക്കുള്ള അരങ്ങേറ്റം അച്ഛന്റെ ശശിധരൻ, ചേച്ചി തുടങ്ങിയ ചിത്രങ്ങളിലൂടെയായിരുന്നു. കൊട്ടാരക്കര ശ്രീധരൻനായരും ഓച്ചിറ പരബ്രഹ്മോദയ സംഗീതനടനസഭയിലെ നടിയായിരുന്ന ആറന്മുള പൊന്നമ്മയും സിനിമാരംഗത്തെത്തുന്നത് ശശിധരനിലൂടെയാണ്. ‘ശശിധരനി’ൽ രേവമ്മയും വൈക്കം മണിയും ചേർന്നു പാടിയ 'നീയെൻ ചന്ദ്രനേ...', 'ആനന്ദമേ...' തുടങ്ങിയ ഗാനങ്ങൾ അക്കാലത്തെ ഹിറ്റുകളായിരുന്നു. പടം പക്ഷേ, വിജയിച്ചില്ല. ഒ എൻ വിയും ദേവരാജൻ മാഷും ചേർന്ന് ആദ്യമായി ഒരു സിനിമയ്ക്ക് ഗാനമൊരുക്കിയത് അച്ഛൻ നിർമിച്ച ‘കാലം മാറുന്നു’ എന്ന സിനിമയ്ക്കാണ്. സുലോചനച്ചേച്ചിയും കെ എസ് ജോർജും ചേർന്നു പാടിയ 'ആ മലർ പൊയ്കയിൽ...' എന്ന ഗാനം ഇന്നും ജനപ്രിയമാണ്. ലളിത തമ്പി എന്ന ഗായിക പാടിയ 'അമ്പിളി മുത്തച്ഛൻ പിച്ചനടന്ന...' എന്ന ഗാനം മൂളിനടക്കാത്ത മലയാളി അന്നുണ്ടായിരുന്നില്ല. കെപിഎസി സുലോചന, ഒ മാധവൻ, കാമ്പിശേരി കരുണാകരൻ എന്നിവരുടെ ആദ്യ സിനിമകൂടിയാണ് കാലം മാറുന്നു.'' അപൂർവസുന്ദരമായ ആ പഴയ ഗാനങ്ങൾ ഓർത്തെടുത്തപ്പോൾ ഷീബ വികാരാധീനയായി. ആഹ്ലാദവും വേദനയും ഇടകലർന്ന എത്രയോ ഓർമകൾ മനസ്സിലേക്കു കടന്നുവന്നു. ''കൂട്ടത്തിൽ പറയട്ടെ, എന്നെ എഴുത്തിനിരുത്തിയത് കവിയൂർ രേവമ്മച്ചേച്ചിയാണ്.''

വീടുതന്നെ സിനിമാത്താവളം

''അങ്ങാടിക്കലുള്ള ഞങ്ങളുടെ വീട് സിനിമാക്കാരുടെ താവളമായിരുന്നു. സത്യൻ, തിക്കുറിശ്ശി, എസ് പി പിള്ള, ബഹദൂർ, പ്രേംനസീർ, പ്രേംനവാസ്, പങ്കജവല്ലി, മുതുകുളം രാഘവൻപിള്ള, ജി കെ പിള്ള തുടങ്ങി എത്രയോപേർ അവിടത്തെ സ്ഥിരം സന്ദർശകരായിരുന്നു. അവർക്കെല്ലാം അമ്മയുടെ വിഭവസമൃദ്ധമായ സൽക്കാരവുമുണ്ട്. ജഗതി എൻ കെ ആചാരിയും മുതുകുളം രാഘവൻപിള്ള മാമനുമൊക്കെ വീട്ടിൽ താമസിച്ചാണ് തിരക്കഥകൾ എഴുതിയത്. സിനിമക്കാർ വീട്ടിൽ ഉണ്ടെന്നറിഞ്ഞാൽ നാട്ടുകാർ വീടിനുചുറ്റും കൂടും''. ഏതോ വിശേഷസന്ദർഭത്തിൽ, ബഹദൂറും എബ്രഹാം ജോസഫ് എന്ന നടനും വീട്ടിൽവച്ച് ഒരു പന്തയംവച്ചതും അതിൽ ബഹദൂർ ജയിച്ചതും ഷീബ ഓർക്കുന്നു.

''സത്യനും ബി എസ് സരോജയും അഭിനയിച്ച ‘ലോകനീതി’ വിജയമായിരുന്നു എങ്കിലും പിന്നീട് പുറത്തിറങ്ങിയ പല സിനിമകളും വേണ്ടവണ്ണം ശ്രദ്ധിക്കപ്പെടാതെ പോയി. അച്ഛൻ പങ്കാളിയായിരുന്ന സികെഎം യൂണിയൻ (ചെങ്ങന്നൂർ കോന്നി മോട്ടോർ യൂണിയൻ) എന്ന ബസ് സർവീസും നഷ്ടത്തിലായി. വിജയലക്ഷ്മി എന്ന പേരിൽ സ്വന്തമായി ബസ് സർവീസ് ആരംഭിച്ചെങ്കിലും വിജയിച്ചില്ല. വണ്ടിപ്പെരിയാറിൽ 500 ഏക്കർ കാപ്പി ത്തോട്ടം പാട്ടത്തിനെടുത്ത്‌ നടത്തിയിരുന്നു. അവിടെ ഒരു സിനിമാ തിയറ്ററും ഉണ്ടായിരുന്നു. 1955ൽ അച്ഛൻ മരിച്ചതോടെ അമ്മയ്ക്ക് ബിസിനസുകൾ ഒറ്റയ്ക്കു നടത്താൻ പറ്റാതെയായി. 'ത്യാഗഭൂമി' എന്ന പടം ഇടയ്ക്കുവച്ച് നിർത്തേണ്ടിവന്നു. അതും വലിയ സാമ്പത്തികബാധ്യത വരുത്തിവച്ചു.'' ഷീബ തന്റെ കുട്ടിക്കാലം ചെലവഴിച്ചത് സേലത്താണ്. സിനിമകളിൽ അഭിനയിക്കാൻ താൽപ്പര്യമുണ്ടായിരുന്നെങ്കിലും അച്ഛന്റെ മരണത്തോടെ സിനിമാബന്ധങ്ങൾക്കും വിരാമമായി.

സഹോദരങ്ങളായ പ്രേംകുമാറും പ്രസന്നകുമാറും പല സിനിമകളിലും ഷീബയോടൊപ്പം മുഖം കാണിച്ചിട്ടുണ്ട്. കായംകുളത്തുള്ള അമ്മയുടെ മൂത്തചേച്ചിയുടെ കൂടെയായിരുന്നു ഷീബ പിന്നീട്. വലിയച്ഛൻ മരിച്ചതോടെ കായംകുളത്ത് സ്ഥിരതാമസമായി. പിന്നെ, കുടുംബമായി. ഇന്ന് തന്റെ രണ്ട്‌ പെൺമക്കൾക്കൊപ്പം വിശ്രമജീവിതം നയിക്കുകയാണ്. ''അച്ഛന്റെ സിനിമകൾ വീണ്ടും കാണണമെന്ന് ആഗ്രഹമുണ്ട്. ശ്രമങ്ങൾ നടത്തിയെങ്കിലും സാധിച്ചിട്ടില്ല. കുടുംബവീട്ടിൽ സൂക്ഷിച്ചുവച്ചിരുന്ന സിനിമാറീലുകളൊക്കെ എങ്ങനെയൊക്കെയോ നഷ്ടപ്പെട്ടുപോയി. ഇപ്പോൾ ശേഷിക്കുന്നത് യൂട്യൂബിലുള്ള ചില ഗാനങ്ങളും നിറംമങ്ങിപ്പോയ ഏതാനും ഫോട്ടോകളും മാത്രം''– ഷീബ പറഞ്ഞു.