വേനൽക്കാലം നല്ല മഴക്കാലം; കഴിഞ്ഞ അഞ്ചുകൊല്ലത്തിനിടെ മികച്ച മഴ ലഭിച്ച വർഷം

തിരുവനന്തപുരം: അഞ്ചുവർഷത്തിനിടെ മികച്ച മഴ ലഭിച്ച വേനൽക്കാലമാണ് ഇത്തവണത്തേതെന്ന്‌ കാലാവസ്ഥാ വിദഗ്‌ധർ. മാർച്ച്‌ ഒന്നുമുതൽ മെയ്‌ നാലുവരെ സംസ്ഥാനത്ത്‌ പെയ്തത്‌ 214 മില്ലീ മീറ്റർ മഴയാണ്‌. ഇക്കാലയളവിൽ കിട്ടേണ്ടത്‌ 157.1 മില്ലീമീറ്റർ ആയിരുന്നു. മെയ്‌ നാലുദിവസം 17.1 മില്ലീമീറ്റർ മഴ ലഭിക്കേണ്ടയിടത്ത്‌ പെയ്തത്‌ 27.1 മില്ലീമീറ്റർ.

വേനൽക്കാലം അവസാനിക്കുന്നതോടെ കേരളത്തെ കാത്തിരിക്കുന്ന തെക്കുപടിഞ്ഞാറൻ മൺസൂണും സാധാരണയിൽ കൂടുതൽ പെയ്യുമെന്നാണ്‌ കേന്ദ്ര കാലാവസ്ഥാ വകുപ്പിന്റെ പ്രവചനം. മാർച്ച്‌, ഏപ്രിൽ മാസങ്ങളിലൊന്നും 40 ഡിഗ്രി സെൽഷ്യസ്‌ താപനില രേഖപ്പെടുത്തിയിട്ടില്ല.

കേരളത്തിൽ ഒറ്റപ്പെട്ട മഴ വരും ദിവസങ്ങളിലും തുടരുമെന്നാണ്‌ പ്രവചനം. ബുധൻ, വ്യാഴം ദിവസങ്ങളിൽ വിവിധ ജില്ലകളിൽ മഞ്ഞ അലർട്ട്‌ പ്രഖ്യാപിച്ചിട്ടുണ്ട്‌. ബുധനാഴ്ച പത്തനംതിട്ട, ഇടുക്കി, പാലക്കാട് എന്നീ ജില്ലകളിലും വ്യാഴാഴ്ച പത്തനംതിട്ട, പാലക്കാട്, വയനാട് ജില്ലകളിലും മഞ്ഞ അലർട്ടാണ്‌.