ചിരിപടർത്താൻ നിവിൻ പോളി:'സര്‍വ്വം മായ' ബിടിഎസ് വീഡിയോ പുറത്ത്

കൊച്ചി: അഖില്‍ സത്യന്‍ സംവിധാനം ചെയ്യുന്ന നിവിന്‍ പോളി ചിത്രം 'സര്‍വ്വം മായയുടെ മേക്കിങ് വീഡിയോ പുറത്തുവിട്ടിരിക്കുകയാണ് അണിയറപ്രവർത്തകർ. പ്രേക്ഷകർ ഏറെ കാലമായി കാത്തിരുന്ന പഴളയ നിവിൻ പോളിയെ ഈ ചിത്രത്തിലൂടെ കാണാനാകുമെന്ന സൂചന വീ‍ഡിയോ നൽകുന്നു. ഫാന്റസി ഹൊറർ കോമഡി ജോണറിൽ ഒരുങ്ങുന്ന ചിത്രമാണിത്.

വളരെനാളുകൾക്ക് ശേഷം നിവിൻ പോളി-അജു വർഗീസ് സർവ്വം മായയിലൂടെ കയ്യടി വാങ്ങുമെന്ന പ്രതീക്ഷയുമുണ്ട്. ചിത്രം ഡിസംബർ 25 ന് ക്രിസ്മസ് റിലീസായാണ് തിയേറ്ററുകളിൽ എത്തുക. മലയാളത്തിന്റെ പ്രിയതാരങ്ങളായ ജനാർദ്ദനൻ, രഘുനാഥ്‌ പലേരി, മധു വാര്യർ, അൽതാഫ് സലിം, പ്രീതി മുകുന്ദൻ എന്നിവരും ചിത്രത്തിൽ അണിനിരക്കുന്നു.

ഫയർഫ്‌ളൈ ഫിലിംസിന്റെ ബാനറിൽ അജയ്യ കുമാർ, രാജീവ് മേനോൻ എന്നിവരാണ് ഈ ചിത്രം നിർമ്മിക്കുന്നത്. ജസ്റ്റിൻ പ്രഭാകരനാണ് സംഗീത സംവിധായകന്‍. ഛായാഗ്രഹണം ശരൺ വേലായുധന്‍. അഖിൽ സത്യൻ എഡിറ്റിംഗ് വിഭാഗം കൂടി കൈകാര്യം ചെയ്യുന്നുണ്ട്. മികച്ച സാങ്കേതിക പ്രവർത്തകരുടെ ഈ സാന്നിധ്യം 'സർവം മായ'യെ ക്രിസ്മസ് റിലീസുകളിൽ മുൻനിരയിൽ എത്തിക്കുമെന്നാണ് പ്രതീക്ഷ.