രാഹുൽ മാങ്കൂട്ടത്തിലിനെതിരായ കേസ്; അതിജീവിതയ്ക്കു നേരെ സൈബർ ആക്രമണം, പരാതി നൽകി

തിരുവനന്തപുരം: രാഹുൽ മാങ്കൂട്ടത്തിൽ എംഎൽഎ ലൈം​ഗികമായി അതിക്രമിച്ചുവെന്ന് മുഖ്യമന്ത്രിക്ക് പരാതി നൽകിയതിന് പിന്നാലെ യുവതിക്ക് നേരെ വ്യാപക സൈബർ ആക്രമണം. സൈബർ ആക്രമണത്തിൽ യുവതി പരാതി നൽകി. ഇതിന്റെ അടിസ്ഥാനത്തിൽ ഓരോ ജില്ലകളിലും ഇത്തരം പ്രവർത്തനങ്ങൾ കണ്ടെത്തിയാൽ കേസെടുക്കാൻ എഡിജിപി എച്ച് വെങ്കിടേഷ് നിർദേശം നൽകി. കോൺ​ഗ്രസ് നേതാക്കളടക്കം പെൺകുട്ടിയുടെ ചിത്രവും വിവരങ്ങളും സാമൂഹിക മാധ്യമങ്ങളിൽ പ്രചരിപ്പിച്ചിരുന്നു. തുടർന്ന് വിവാദമായതോടെ പിൻവലിക്കുകയായിരുന്നു.

പരാതി നൽകാൻ ധൈര്യം കാണിച്ച യുവതിയുടെ സ്വകാര്യതയെ ഹനിക്കുന്നുവെന്ന് വിമർശനമുയർന്നതോടെയാണ് പലരും പോസ്റ്റുകൾ പിൻവലിച്ചത്. രാഹുൽ അനുകൂലികളായ സൈബ‌ർ പോരാളികളുടെ ഹാൻഡിലുകളാണ് ഇത്തരം ചിത്രങ്ങളും വിവരങ്ങളും പ്രചരിപ്പിച്ചത്. യുവതിയെ പിന്തുണയ്ക്കുന്നവർക്കെതിരെയും സൈബർ ആക്രമണമുണ്ടായി. ഇത്തരം പ്രവർത്തനങ്ങൾക്കെതിരെ ശക്തമായ നടപടികളെടുക്കണമെന്നാണ് നിർദേശം.

കേസിൽ രാഹുൽ മാങ്കൂട്ടത്തിലിനെ വേ​ഗത്തിൽ അറസ്റ്റ് ചെയ്യാനാണ് നീക്കം. നിലവിൽ രാഹുൽ ഒളിവിലാണ്. എഡിജിപി എച്ച് വെങ്കിടേഷിന്റെ നേതൃത്വത്തിൽ യോ​ഗം ചേർന്നു. രാഹുലിനായി സംസ്ഥാന വ്യാപകമായി പൊലീസ് അന്വേഷണം നടത്തുന്നുണ്ട്. രാഹുലിന്റെ ബന്ധുക്കളും സുഹൃത്തുക്കളും നിരീക്ഷണത്തിലാണ്. ബന്ധുക്കളിൽ ചിലരെ ചോദ്യം ചെയ്തേക്കും. അതേസമയം, രാഹുൽ കോയമ്പത്തൂരിൽ ഒളിച്ചുകഴിയുന്നതായാണ് സൂചന. തമിഴ്നാട് കേന്ദ്രീകരിച്ചും പൊലീസ് അന്വേഷണം നടക്കുന്നുണ്ട്.

യുവതിയുടെ മൊഴി ആശുപത്രി അധികൃതർ സ്ഥിരീകരിച്ചിട്ടുണ്ട്. ഗുരുതര രക്തസ്രാവത്തിന് സ്വകാര്യ ആശുപത്രിയിൽ യുവതി ചികിത്സ തേടിയിരുന്നുവെന്ന് കണ്ടെത്തി. ​ഗർഭാവസ്ഥയിലിരിക്കുമ്പോൾ ഏഴ് ആഴ്ച വരെ കഴിക്കാവുന്ന മരുന്നുകളാണ് യുവതിയെക്കൊണ്ട് നിർബന്ധിച്ച് കഴിപ്പിച്ചത്. ഈ മരുന്നുകൾ ജീവൻ നഷ്ടപ്പെടുത്താൻ വരെ സാധ്യതയുള്ള മരുന്നുകളായിരുന്നുവെന്ന് ഡോക്ടർമാർ പറയുന്നു.